ⅩⅬ
Amang’ana ’ogosemeria
Ⅰ Remia abanto baane! Ee, remia abanto baane!
Nabo Nyasae oino atebiire.
Ⅱ Kwana amang’ana ’obwororo ase Yerusalemu,
moyorarerie ng’a emechando yaye yaerire,
na ebibe biaye biabeirwe,
naende ng’a Yerusalemu onyorire okwaberwa ara kabere
korwa ase okoboko kw’Omonene
ase ebibe biaye bionsi.
Ⅲ Igwa eriogi ri’oyogoaka egeturi ogoteeba:
“Roisia enchera y’Omonene ase erooro;
rongeyia enchera enene ase Omonene, Nyasae oito, agwo ase erooro.
Ⅳ Kera rigoko nditichwe rimokerere igoro,
na kera egetunwa na ekegoro nabiiranigwe inse,
aase atareng’aini nareng’anigwe,
na aase are ebitunwa‐tunwa naaranigwe.
Ⅴ Obonene bw’Omonene mboorokigwe,
na Mwanyabaanto bonsi mbaborore bare amo.
Omonene nere okwanire amang’ana ayio.”
Ⅵ Eriogi rigoteeba,
“Raria amang’ana!”
Na erinde rikoboria, “Mang’ana ki nkoraria?”
“Raria ng’a Mwanyabaanto bonsi nigo banga buna obonyansi,
obuya bwabo bwonsi nigo bonga egesicha kere mogondo.
Ⅶ Obonyansi nigo bokwoma, na ebisicha boigo,
ekero Omonene abiuteire omoika oye;
naboigo na Mwanyabaanto banga buna obonyansi.
Ⅷ Ee, obonyansi nigo bokwoma, na ebisicha boigo,
korende ring’ana ria Nyasae oito nigo rirabeo goika kare na kare.”
Ⅸ Aye Sayoni, omoraria bw’amang’ana amaya,
tiira gochia ase ebitunwa ebitambe igoro.
Aye Yerusalemu, omoraria bw’amang’ana amaya,
aka eriogi riao ne chinguru;
ee, aka eriogi mono, toiroka;
teebiaemechie y’Abayuda iga:
“Rora Nyasae oino!”
Ⅹ Rora, Omonene ngocha are ore nokobua,
okoboko kwaye nkobe gokogaamba.
Naama! Nigo agocha obwate eng’eria yaye,
na ebiasakoire nigo bire ase obosio bwaye.
Ⅺ Narisie riicho riaye buna omorisia akorisia ching’ondi chiaye,
nasangererie chimanwa chi’eching’ondi achiagate,
nachibogorie ase egekuba kiaye,
na echi chire ne chimanwa ching’are nachiraae ng’ora ng’ora.
Nyasae bw’Abaisraeli tari koreng’anigwa na onde
Ⅻ Ning’o orengire amaache e chinyancha noroe rw’okoboko kwaye?
Ning’o oramboire ebiara bi’amaboko aye korenga igoro?
Ning’o obekire orotu rw’ense ase ekerengero,
gose ning’o orengire ebitunwa na ebigoro nekerengero?
ⅩⅢ Ning’o okoraa Omoika bw’Omonene,
gose ning’o okomosemia na komoteebereria?
ⅩⅣ Ning’Omonene akoboria amosemie amang’ana buya?
Ning’o omworokereretie oboeto bw’oboronge,
na komworokia okomanya,
gose komworokia enchera y’okomanya?
ⅩⅤ Naama! Ebisaku nigo binga buna entonyi y’amaache egotonya korwa ase enyongo.
Nigo bireng’anirie norotu orosinini rore ase esani ekorengera;
rora, nigo akoimokia ebisinka buna orotu orosinini.
ⅩⅥ Emete ye rinani ria Lebanoni tegoisana ebe chinko chigouterwa omorero,
ne ching’iti chionsi chireo tichigoisana chibe ekeng’wanso ki’ogosaambwa.
ⅩⅦ Ebisaku bionsi nigo bire bosa ase obosio bwaye,
nigo abibarete buna negento bosa, bitaisaini kende.
ⅩⅧ Nyasae, ning’o moramoreng’anie,
gose mogwekano ki moramoreng’anie?
ⅩⅨ Omogwekano bw’ogosasimwa nigo okobombwa nomooroisia ebinto,
erio omoturi oyooma netaabu,
naende oyoroiseria ebinyuri bi’efeta.
ⅩⅩ Omonto ore omotaka otabwati ebinge akorua
nigo agochora omote otari kogunda,
origia omooroisia omong’aini omanyete kobaacha,
ere omobaachera omogwekano otari gosuka.
ⅩⅪ Inee! Timwana komanya?
Timwana koigwa?
Timwana goteebigwa amang’ana ayio korwa omochakano?
Timwana koyamanya korwa omochakano bw’oboroso bw’ense?
ⅩⅫ Ere nere oikaransete ase orosingo rw’ense,
na abamenyete ase ense nigo banga buna ebisase;
nere okorambora igoro chionsi buna egetambaa gekoramborwa,
ee, nigo agochirambora buna eema ekomenywa ekoramborwa.
ⅩⅩⅢ Omonene nigo agokeyia abagaambi baba bosa,
na abagaambi ebiina b’ense boigo baba bosa.
ⅩⅩⅣ Abwo nigo banga buna ebimeri bisimekire masomberera,
bitaireti emeri inse.
Omonene nigo akobaguseria embeo, boma,
na omoubera noro obairurukia buna okoirurukia obonyansi obwomo.
ⅩⅩⅤ Oyore Omochenu nigo akoboria iga:
“Ning’o rende moranyare kondeng’ania,
ng’a imbe buna oyio?”
ⅩⅩⅥ Rigereria gochia igoro morore!
Ning’o otongete ebinto ebio bionsi?
Nere oria okoraa emeganda y’ebitongwa ebio ase omobaro obo,
na koroka kera ekemo erieta riaye.
Okobua kwaye nokonene mono,
ne chinguru chiaye nigo chire nokobua,
ase ayio kende tikeremeti nonya nekemo.
ⅩⅩⅦ Inwe abanto ba Yakobo, inwe Abaisraeli,
nase ki mogoteeba ng’a Omonene
taroochi chinchera chiaino,
naende ng’a ere Nyasae obarinire oboronge bwaino?
ⅩⅩⅧ Inee! Timwana komanya gose koigwa,
ng’a Omonene nigo are Nyasae o kare na kare,
na Omotongi bwe chinsinyo chi’ense?
Ere tari kogoya gose korosa.
Obong’aini bwaye tibokorigigwa bomanyekane buna bore.
ⅩⅩⅨ Ere nigo akoa omonto oyo ogoyire chinguru,
na oyo otari na nguru nigo akomomentera chinguru.
ⅩⅩⅩ Abasae mbagoye na korosa,
na abamura mbagochwe bagwe inse,
ⅩⅩⅪ korende abwo baganyete na gosemeri’Omonene mbaegwe chinguru chinyia,
mbairuruke gochia igoro ne chimbaaba buna echi’ebiongo;
mbabe bakominyoka batari korosa,
mbabe bagotaara batari kogoya.