ⅩⅬⅠ
Nyasae okoenekeria Abaisraeli ng’a nigo are amo nabarabwo
Ⅰ “Inwe ebisinka ne chinse chire ang’e nenyancha,
mokire‐kiri, montegerere,
tiga abanto b’ebisaku banyore chinguru chinyia,
tiga basuke gocha ang’e, bakwane;
toche amo, toike ang’e ase ekiina.
Ⅱ “Ning’o orangeretie n’oboronge oyomo korwa moocha,
oria oumeranete nobobui aande onsi ase agendete?
Ere nigo akobeeka abanto b’ebisaku inse y’okobua kwaye,
erinde atachere abarwoti inse y’amagoro aye;
oyio nigo agoita abanto b’ebisaku n’omoro, obakora baba buna orotu,
na ase obota bwaye nigo akobasiarera buna obonyansi obwomo.
Ⅲ Nigo akobabwatia, oeta na orendire buya,
ase chinchera atana goeta rinde.
Ⅳ Ning’o okorete na goikerania aya?
Ning’o orangeretie ebiaare bi’abaanto korwa omochakano?
Ninche Omonene, ninche oyo bw’omochakano;
ninche oyo bw’omoerio, ninche Ere.”
Ⅴ Ebisinka ne chinse chire ang’e nenyancha chiarorire ayio chiamwoboire,
chinsinyo chi’ense nigo chigotengechigwa;
chiasukire gocha ang’e.
Ⅵ Kera omonto nigo agokonya omogisangio oye;
oyomo oteebiaoyonde, “Kabe omoremu!”
Ⅶ Omosenia bwe chibao nigo akobeeka omoturi bw’etaabu omokia,
na omoturi ebioma obeeka omoturagi chinguru,
oteeba, “Oborembo bw’okobwatania nobuya.”
Erio babwatania omogwekano nemesumari tonyegera.
Ⅷ “Korende inwe Abaisraeli, abasomba baane,
inwe nabaanto ba Yakobo nachorete,
inwe nigo more ab’ororeeria rwa Aburaamu, omosani one.
Ⅸ Nigo nabarusetie korwa ase chinsinyo chi’ense,
nkabarangeria korwa ase chinsinyo chi’aare mono,
nkabateebia: Inwe nabasomba baane,
nabachorire, timbaangeti.
Ⅹ Ase ayio timoiroka, inche nigo inde amo nainwe,
timoichana, inche ninche Nyasae oino;
nimbabeeke chinguru, mbakonye,
nimbasiire nokoboko gw’okorio kw’oboronge bwane.
Ⅺ “Rora, abwo bonsi baabagechete mbasookigwe na gotantanigwa;
abwo bakobaengereria mbabe bosa basirigwe.
Ⅻ Nigo morabarigie abwo bakobasoera, ko timokobanyora;
abwo baarenge kobarwania nigo barabe bosa kegima.
ⅩⅢ Ninche Omonene, Nyasae oino,
nimbabwate amaboko aino a borio.
Ninche nkobateebia inwe: Timoiroka, nimbakonye.
ⅩⅣ “Inwe ororeeria rwa Yakobo ronga buna rikonde, inwe ekeombe egeke ki’Abaisraeli, timoiroka!
Inche Omonene nimbakonye.
Ninche Omochenu bw’Abaisraeli inde Omobooria oino.”
Nab’Omonene atebiire.
ⅩⅤ “Rora, nimbakore inwe mobe egekorero gi’okoora, kere ekiya na kere namaara amoge; inwe moore ebitunwa, mobisamunyore, imokore ebigoro bibe buna omoiriro.
ⅩⅥ Mobisiare, na omwaga obirurukie gochia aare,
erio ekembugu‐mbugu kebisiarere.
Inwe abanyene mogoke ase Omonene
na komwetogeria oyore Omochenu bw’Abaisraeli.
ⅩⅦ “Ekero abataka na abaremeire barabe bakorigia amaache na tibayanyora,
ekero chimeme chiabo chirabe chiabwatanire namang’ang’ura;
inche Omonene nimbaigwe,
inche Nyasae bw’Abaisraeli tinkobatiga.
ⅩⅧ Nindete chindooche korwa ase ebigoro ebiomo,
ne chinsoko nchituboke ase amagoko ime;
ning’onchore erooro ebe ritibo ri’amaache,
na ense enyomo ebe ne chinsoko chire namaache.
ⅩⅨ Nimerie emecharake ase erooro,
boigo nimerie aroro emekonge, na emeadasi, na emezeituni.
Ee, nimerie emetarakwa na emete
ⅩⅩ ende egwekaine emeuru, na emebeno amo,
erinde abanto mbarore na komanya,
naende mbaarengererie bamanye bonsi amo,
ng’a nokoboko kw’Omonene gwakorire ayio,
ee, ere oyore Omochenu bw’Abaisraeli nere otongete ebio bionsi.”
Omonene okoamererania ne chinyasae chi’oborimo
ⅩⅪ Omonene, Omorwoti bw’abaanto ba Yakobo, nigo agoteeba iga:
Renta amang’ana aino,
renta oborori bwaino botoenekerie.
ⅩⅫ Tiga baborente bototeebie aya agochia koba;
tiga bototeebie amang’ana a kare buna arenge,
erinde tonyare koyarengereria
na komanya buna aikeranetigwe,
naende botoorokerie buna amang’ana agochia koba.
ⅩⅩⅢ Toteebie aya agochi‐gocha,
erinde tomanye ng’a inwe ne chinyasae;
kora amang’ana amaya, gose amabe erinde tokorora ayio tokumie.
ⅩⅩⅣ Naama! Inwe nigo more bosa
kegima, na emeremo yaino nero mbosa kegima;
oyo obachorire inwe na kobasasiima nigo are okogechia.
ⅩⅩⅤ “Inarangeretie omonto korwa sugusu, ere ochire;
ee, nigo namorusirie korwa moocha,
ere narangerie erieta riane akonywe, natiringere abagaambi inse buna esike egotiringwa,
na buna omokori chinyongo agotiringa esike.
ⅩⅩⅥ Ning’o obaanete amang’ana ayio agwo kare,
erinde tonyare komanya ng’a amang’ana oyio ateebete n’ayoboronge?
Onde tari nonya noyomo oyaorogetie na koyararia;
onde tari oigwete komokoyakwana.
ⅩⅩⅦ Ninche Omonene nigo narenge omotang’ani goteebia Sayoni:
Rigereria, morore abwo!
Ninche narenterete Yerusalemu abwo bararetie amang’ana amaya.
ⅩⅩⅧ Korende ekero narigereretie tinaroche monto onde,
nonya nase egati yabo mosemia onde tarengeo;
ekero naboretie, onde tarengeo ongiraneretie.
ⅩⅩⅨ Naama! Chinyasae echio chionsi mbosa.
Emeremo eyio y’abanto nigo ere bosa kegima,
ee, emegwekano eyio abanto babombete nigo enga embeo bosa.”