ⅩⅬⅡ
Omosomba bw’Omonene
Ⅰ “Rora, omosomba one oyio inche nabekire chinguru ime yaye; omochore one omoyo one ogokirie nere.
Namobekeire Omoika one,
nere oraarente oboronge ase abanto b’ebisaku.
Ⅱ Ere takorera, gose tagoaka eriogi rinene,
gose takoritiga riigugwe ase chinchera.
Ⅲ Egetonto giatachetwe tagokebuna,
gose orotambe rw’etaya rokoimoka erioki takororimia.
Ase obwegenwa bwaye narente oboronge.
Ⅳ Ere takorosa gose gokwa omoyo;
goika abe orentire oboronge ase ense na kobokong’ia,
na ebisinka, ne chinse chire ang’e nenyancha nchibe chiganyete amachiiko aye.”
Ⅴ Nyasae, oyotongete igoro chionsi na gochirambora,
oyo bwarete ense na bionsi ebikorwao,
oyo oete abanto bareo obogima,
na kobaa omoika abwo bagotaara aroro,
nigo agoteeba iga:
Ⅵ “Inche ninche Omonene, nakorangeirie ase oboronge;
nakobwatire okoboko kwao nkorendete.
Goetera asore ninkore okobwatana kw’ogotianania nabaanto,
obe omobaso bw’abaanto b’ebisaku.
Ⅶ Oramokie amaiso ’emeuko,
osibore abasibwa korwa ase echela,
na abwo bamenyete ase omosunte korwa ase obosibwa bwabo.
Ⅷ “Inche ninche Omonene, erio nario erieta riane;
tindi koa omonto onde obonene bwane;
tinkoa emegwekano egosasimwa ogotogigwa kwane.
Ⅸ Rora, amang’ana nateebete agwo kare aikeranire,
na bono nigo nkobaraareria amang’ana amayia,
nkobayamanyia atarakorekana.”
Ogoteera kw’ogotogia
Ⅹ Moterere Omonene ogoteera okoyia;
motogie korwa ase chinsinyo chi’ense!
Inwe abaeti ase enyancha amo n’ebinto bionsi bire imeo,
inwe abamomenyete ase ebisinka na ase chinse chire ang’e nenyancha,
motogie Omonene!
Ⅺ Tiga erooro na emechie ereo biake amariogi,
na abamenyete ase emechie ya Kedari boigo.
Abanto bamenyete ase omochie o Sela mbatere nomogooko,
baake eriogi korwa ase ebichuria bi’ebitunwa igoro.
Ⅻ Abwo bonsi batogie Omonene
na koraria obonene bwaye ase ebisinka na ase chinse chire ang’e nenyancha.
ⅩⅢ Omonene naoroke buna etuoni y’esegi,
na buna omorwani esegi abokie omokia oye;
nigo agoaka eriogi ri’esegi na kwoga mono,
nigo akweorokia ng’a nare nokobua igore y’ababisa baye.
Nyasae okoria eira ng’a nakonye abanto baye
ⅩⅣ Inche nabeire nkirete‐kiri ase engaki entambe,
nabeire ngendererete gwetanga na gokira;
korende bono ning’ake eriogi buna eri’omokuungu okobina aibore;
ning’use omoika na goita egekoe.
ⅩⅤ Ninsarie kegima ebitunwa na ebigoro,
ninyomie ebimeri biabo bionsi;
ning’onchore chindooche chibe ense enyomo,
ninkamie amatibo.
ⅩⅥ “Nindaae abanto bare emeuko ase enchera batana komanya,
nimbatang’ane ase oboeto batana komanya.
Ning’onchore omosunte ore bosio bwabo obe oborabu,
aase atareng’aini naaranigwe.
Ayio naro ndabakorere,
tingotiga goikerania amang’ana aane.
ⅩⅦ Korende abanto basemeretie emegwekano egosasimwa
mbairanigwe magega, basookigwe,
ekiagera nigo bagoteebia emegwekano eyio ebombire;
Inwe ninwe chinyasae chiaito.”
Abaisraeli bagosinywa kweorokereria
ⅩⅧ “Inwe abamore emetino, tegerera moigwe,
nainwe abamore emeuko, rigereria monyare korora!
ⅩⅨ Ning’o ore omouko otatiga omosomba one?
Ning’o ore omotino buna omonto one natomire?
Ning’o ore omouko buna omwegenwa one,
gose buna omosomba one inche Omonene?
ⅩⅩ Omosomba one nigo akorora ebinto ebinge,
korende tari kobirengereria ng’a nebi’engencho enene;
nigo atinogete amato aye, korende tari koigwa.”
ⅩⅪ Ase engencho y’oboronge bwaye
Omonene nigo agogete koa amachiiko aye okobua na ogosikwa.
ⅩⅫ Korende abanto aba baibirwe na gosakorwa,
bonsi bategirwe na kogwa ase chiirima;
nigo babisire ase chinyomba chi’obosibwa;
bairirwe, onde tari orabatoorie,
boosirwe, onde tari ogoteeba: “Tiga bairanigwe.”
ⅩⅩⅢ Ning’o ase more oranyare gotegerera amang’ana aya,
erio ayarengererie na koyaigwera ase chingaki chigochi‐gocha.
ⅩⅩⅣ Ning’o oruete abanto b’ororeeria rwa Yakobo ase amaboko ’abasakori?
Ning’o oruete Abaisraeli ase amaboko ’abauri?
Inee! Tari Omonene oria twakorete ebibe asare?
Tokaanga kobwatia chinchera chiaye,
naende tokaanga koigwera amachiiko aye.
ⅩⅩⅤ Ase ayio Omonene akaumora ekeririanda kiaye ase abanto,
akabaumorera endamwamu yaye
ekobera, na esegi entindi.
Abanto bakaba bagosambwa nomorero ase chinsemo chionsi,
ko tibamanyete kende,
ee, omorero oria okabasamba,
korende tibaarengereretie ayio ime ase chinkoro chiabo.