ⅩⅬⅢ
Nyasae okoria eira gotooria abanto baye
Ⅰ Inwe abanto b’ororeeria rwa Yakobo, inwe Abaisraeli,
aya nar’Omonene oria obatongete na kobabomba agoteeba;
“Timoiroka, ekiagera inche nababooririe;
nabarangeirie ase amarieta aino;
inwe nabaane.
Ⅱ Ekero morabe mogoeta ase amaache ime, nimbe amo nainwe;
namoba mogoeta ase chindooche, tichikobamera.
Namoete ase omorero, timogosambwa,
gose omorero ekebemberi tokobasiria.
Ⅲ Inche ninche Omonene, Nyasae oino,
ninche Omochenu bw’Abaisraeli, ninche Omotooria oino.
Nigo naruete Abamisiri bakaba embooria ase engencho yaino,
nkarua Abaetiopia na Abaseba ribaga riaino.
Ⅳ Inwe nigo more ab’engencho enene ase amaiso aane,
mwabeire mosikire, nainche nigo mbanchete;
ase ayio nindue abanto b’ebisaku basirigwe ribaga riaino,
erinde obogima bwaino botoorigwe.
Ⅴ Ase ayio, timoiroka, inche nigo inde amo nainwe.
“Nindete abanto b’ororeeria rwaino korwa moocha,
na korwa bosongo nimbasangererie.
Ⅵ Nintebie chinse chia sugusu: Tiga abanto baane barue agwo,
ne chinse chia Irianyi: Timobatanga!
Renta abamura baane korwa aare,
na abaiseke baane korwa ase chinsinyo chi’ense.
Ⅶ Kera omonto okorokwa ase erieta riane,
oyio inche natongete anyore obonene bwane,
kera oyomo oyio inche nabombete na komotonga, tiga ache.”
Abaisraeli nigo bare birori ba Omonene
Ⅷ Renta abanto bonsi bare emeuko nonya babwate amaiso,
na abare emetino nonya babwate amato.
Ⅸ Tiga abanto b’ebisaku bionsi bache amo,
ee, tiga abanto bonsi basangererekane bache.
Ning’o ore ase egati yabo oranyare koraria amang’ana aya?
Ning’o oranyare gotworokia amang’ana ayabeete kare?
Tiga barente birori biabo, erinde baorokie oboronge bwabo,
na ekero baraigwe bateebe: “Nekeene mogoteeba.”
Ⅹ Omonene nigo agoteeba iga:
“Inwe nigo more birori baane,
abasomba baane nachorire,
erinde monyare komanya inche na konyegena,
naende momanye ng’a inche ninche Ere.
Enyasae ende teri yantang’anerete,
ende teri erabombwe magega yane.
Ⅺ Inche ninche Omonene,
ninche bweka inde Omotooria, naende onde tari.
Ⅻ Nigo narentete ogotooreka,
nkabarareria ayio, nainwe mokayaigwa,
na enyasae engeni tiyarenge ase egati yaino;
inwe nigo more birori baane ng’a inche ninche Nyasae.”
Naboigo Omonene atebiire.
ⅩⅢ Ee, inche ninche Nyasae;
nigo ngendererete koba oyio oyio.
Omonto tari oranyare gotooria omonto onde korwa ase okoboko kwane,
nigo ngokora emeremo, na onde tari oranyare koyetanga.
Ogotoorigwa korwa Babiloni
ⅩⅣ Aya nar’Omonene, Omobooria oino oyore Omochenu bw’Abaisraeli, agoteeba:
“Ase engencho yaino nintome abasikari gochia Babiloni
baserie abanto b’aroro, erinde batame;
ee, Abakalidayo abwo baserigwe gochia ase chimeeri chiabo echio bagokerete.
ⅩⅤ Inche ninche Omonene, Omochenu oino,
ninche omotongi oino inwe Abaisraeli, ninche inde omorwoti oino.”
ⅩⅥ Omonene oroisetie enchera ase enyancha ime,
ee, oboeto ase amaache amange are ne chinguru,
ⅩⅦ akarenta aroro chigari chi’esegi ne chibarasi,
na abasikari amo ne chituoni chiabo,
erio akabaiyeria inse, tibatenena naende;
nigo basiretigwe bakarima buna orotambe rw’etaya.
Aya nar’Omonene oyio agoteeba:
ⅩⅧ Timobaisa koinyora amang’ana a kare,
gose korengereria igoro y’ebinto biaetire.
ⅩⅨ Naama! Ninkore ring’ana riyia;
ring’ana erio riachakire kooroka;
Inee! Timorirochi?
Nindoisie enchera ase erooro,
nintubokie chindooche ase ense enyomo,
ⅩⅩ erinde ching’iti chi’orosana amo
nebibwe ne chisagero chinywe chintogie.
Ekero ekio nintubokie amaache ase erooro,
ne chindooche ase ense enyomo,
ng’ee abanto baane, abwo nachorire, amaache banywe,
ⅩⅪ abanto abwo netongeire, erinde bararie ogotogigwa kwane.
Ebibe bi’Abaisraeli
ⅩⅫ Inwe abanto b’ororeeria rwa Yakobo, timwandangeretie,
ee, inwe Abaisraeli, timwanyechanderete.
ⅩⅩⅢ Inwe timwandeterete ching’ondi chiaino chibe ekeng’wanso ki’ogosaambwa,
gose timwansigete ase okonduera ebing’wanso biaino.
Inche timbaroseti ase okonduera okoruegwa kw’endagera,
gose timbachandeti ase ogonsambera ubani.
ⅩⅩⅣ Timwangorerete ebinto bigotioka buya ne chitaabu chiaino.
Timwang’isanegetie nebitinya bi’ebing’wanso biaino.
Taibo! Korende nigo mwandosirie nebibe biaino;
mwanchandire nogosaria kwaino.
ⅩⅩⅤ Inche ninche bweka ngotinyia ogosaria kwao,
ase engencho yane inche omonyene,
na tinkoinyora ebibe biao.
ⅩⅩⅥ Ong’inyorie, tokwane komo, aye na inche;
okwane amang’ana ao,
erinde onyore oboronge bwao.
ⅩⅩⅦ Sokoro yao bw’eritang’ani nigo akorete ebibe,
na abaarenge abakwani b’amang’ana ao bagasaria ase ’nde,
ⅩⅩⅧ Ase ayio ngatiga abanene b’Aase Achenu bakaba abatachenegeti,
nkarua abanto ba Yakobo bakaba okoragererigwa,
ee, nkarua Abaisraeli ase ogochaywa.