ⅩⅬⅣ
Omonene nere bweka ore Nyasae
Ⅰ “Aye Yakobo, omosomba one,
aye Israeli nagochorire, bono igwa!
Ⅱ Omonene, oria ogotongete ase enda ya nyoko, naende okogokonya,
nigo agoteeba iga:
Aye Yakobo, omosomba one,
aye Yerusalemu, omochore one, toiroka.
Ⅲ “Ning’umore amaache ase abare nerang’o,
nintubokie chindooche ase ense enyomo.
Ning’umore Omoika one igoro ase abanto b’ororeeria rwao,
ninsesenie abana bao.
Ⅳ Abwo mbakine buna obonyansi,
bakine buna emesobeti ere ase chindooche mbarabare.
Ⅴ Oyomo nateebe ng’a noyo bw’Omonene are,
na oyonde eroke erieta ria Yakobo,
na oyonde arike ase okoboko kwaye ng’a ere noyo bw’Omonene,
erio eroke Omoisraeli, erieta ri’ogosikwa.”
Ⅵ Aya nar’Omonene, omorwoti bw’Abaisraeli na Omobooria obo,
oyore Omonene b’Emeganda, agoteeba:
“Ninche oyo bw’eritang’ani, na oyo bw’omoerio;
onde tari, otatiga inche bweka inde Nyasae.
Ⅶ Ning’o oranyare kobana buna inche,
buna nabaanete korwa ekero keria nabegete abanto abwo ba kare?
Tiga ararie amang’ana ayio na koyanyorokia.
Oyio tiga ateebie abanto amang’ana are bosio agochia gokoreka.
Ⅷ Timoiroka, gose kwoboa!
Inee! Tinabateebeetie amang’ana ayio korwa kare na kobayamanyia?
Inwe nigo more birori baane.
Inee! Nyasae onde nareo, otatiga inche?
Getare kende tikeri. Nimanyete ng’a kende tikeri.”
Emegwekano y’ogosasimwa egochaywa
Ⅸ Abanto abwo bonsi bakoroisia emegwekano y’ogosasimwa nigo bare bosa, na emegwekano eyio teri kobarentera buya bonde. Abwo bakoyebera birori tibakorora, gose tibakomanya gento kende; ase igo mbasookigwe.
Ⅹ Ning’o okwebaachera enyasae na kwebombera ogosasimwa bitari gokonya nonyang’ake?
Ⅺ Naama! Abatunyani bonsi b’emegwekano eyio mbasookigwe, na abakoyeroisia nigo bare Mwanyabaanto. Abwo bonsi tiga basangererekane amo, bache bosio; bonsi amo nigo baraondoke, basooke.
Ⅻ Omoturi ebioma nigo akobogoria enturago yaye otura ekioma. Nigo agokebeeka igoro ase omorero bw’amakara, ogesamba, erio okebomba ase ogokebaraga nokoboko kwaye kore ne chinguru. Ekero agendererete koroisia omogwekano oyio, nigo akoba nenchara na erang’o ogoya.
ⅩⅢ Omosenia chibao nigo akorambora ekerengo, bwata omong’ororia nekaramu ase ebao. Erio oyesenia neranda, oyeng’ororia ekeringerera, naende oyebaacha yaba omogwekano bw’omonto omonyakieni, oyobeeka nyomba ime.
ⅩⅣ Omonto nigo akogenda ase rinani ogecha emecharake, gose bwechorera Emealuni, oyetiga egokina agwo ase rinani, gose bwesimekera omobunduki, embura yaba ekoyokinia.
ⅩⅤ Omote oria gokinire nigo okoba chinko chi’omonto oria; ere nigo akonyonacha ekeng’ese outera omorero agwota na korugera endagera, na ekeng’ese kende okebacha kiaba enyasae agosasiima, nigo gekoba omogwekano ere oba okoyosasiima.
ⅩⅥ Ase ekeng’ese kende omonto oria nigo agoutera omorero, osambera chinyama, ochiria na koigota, na ekero autire omorero oria nigo agoteeba, “Ee, bono nabeire ne riberera; omorero oyo nomuya!”
ⅩⅦ Ekeng’ese egetigari ki’omote oria nigo agokebaacha ogekora enyasae, omogwekano agosasiima; nigo agotungama bosio bwaye oyosasiima oteeba, “Ntoorie, ekiagera naye enyasae yane!”
ⅩⅧ Abanto bagokora ayio nabariri, tibamanyeti kende. Amaiso abo aukoire, tibakonyara korora, na ebirengererio biabo biasarigwe, tibakonyara komanya.
ⅩⅨ Monto onde tari ase abwo okorengereria mono, gose ore nobong’aini na okomanya erinde ateebe: “Ekeng’ese ki’omote oyio nageutera omorero, nkayorugera endagera, boigo nkayosambera chinyama nkaria. Inee! Korwa ase ekio egetigari ningekore egento gi’okogechia? Ningekore enyasae ngosasiima, eroisirie korwa ase omote?”
ⅩⅩ Oyio nigo asemeretie ayare buna ribu; enkoro yaye yang’ainekire, yamosiririe, takonyara gwetooria na goteeba, “Egento eke mbwate koboko kwane gw’okorio neki’oborimo.”
Omonene nere Omotongi na Omotooria
ⅩⅪ “Inwe abanto ba Yakobo, inwe Abaisraeli,
inyora amang’ana aya, ekiagera inwe nabasomba baane.
Inwe Abaisraeli, tinkobeeba.
ⅩⅫ Natinyirie ogosaria kwaino buna ngotinyia riire,
na ebibe biaino buna ngotinyia ritaturi.
Ing’iranere, ekiagera nababooririe.”
ⅩⅩⅢ Inwe igoro chionsi, tera nomogooko, ekiagera Omonene oikeranirie ayio;
naye ense yonsi, aka eriogi ri’omochengo!
Inwe ebitunwa, na amanani, na kera omote ore aroro,
tera nechinguru chinyinge,
ekiagera Omonene obooririe abanto ba Yakobo,
neorokie ase egati y’Abaisraeli ore nobonene.
ⅩⅩⅣ Aya nar’Omonene, Omobooria oo, oyogotongete ase enda ya nyoko,
agoteeba:
“Ninche Omonene natongete ebinto bionsi;
ninche bweka naramborete igoro chionsi,
nkaara ense gochia chinsinyo chionsi,
na onde tarengeo onkonyete.
ⅩⅩⅤ Inche nigo ngosaria ebimanyererio bi’ababani b’oborimo
na gokora abaringoria baba chiosi.
Nigo nkoirania magega obong’aini bw’abang’aini
na gokora okomanya kwabo kwaba oboriri.
ⅩⅩⅥ Inche nigo ngokora ring’ana ri’omosomba one riaba ne chinguru
na goikerania emeroberio y’abatomwa baane.
Ninche ngoteeba igoro ya Yerusalemu ng’a nomenywe,
na igoro y’emechie y’Abayuda ng’a neagachwe naende;
ninche ndatenenie amaagacho ayio agwete inse.
ⅩⅩⅦ Ninche ngoteeba igoro ye chindiba chie chinyancha ng’a chiome pa,
ninche ndakamie chindooche chiaye.
ⅩⅩⅧ Nigo ngoteeba igoro ya Koresi ng’a namobekire abe omorisia bw’abaanto baane;
ere naikeranie ogwancha kwane gwonsi,
na ateebe igoro ya Yerusalemu ng’a oagachwe naende,
naende ateebe igoro ye Hekalu ng’a oboroso bwaye bobekwe naende.”