ⅩⅬⅧ
Nyasae nere Omonene bw’amatuko agochi‐gocha
Ⅰ Inwe ab’enyomba ya Yakobo,
aba mokorokwa Abaisraeli,
na more ab’ororeeria rwa Yuda,
naende mogotiana ase erieta ri’Omonene
na komoorokia Nyasae bw’Abaisraeli,
korende tari ase ekeene na oboronge,
igwa amang’ana aya!
Ⅱ Inwe nigo mokweroka ng’a nab’omochie omochenu more,
naende ng’a nigo mosemeretie Nyasae bw’Abaisraeli,
oyokorokwa Omonene bw’Emeganda.
Ⅲ Amang’ana akorekanete agwo kare,
inche konya nayararirie ritang’ani;
amang’ana ayio nigo aruete ase omonwa one nkabayamanyia.
Erio mobosokano nkayakora na koyaikerania.
Ⅳ Nigo namanyete ng’a inwe nabamwenu more,
naende nigo mobwate ebigoti ebikong’u binga buna ekioma,
na amasio aino namakong’u buna etai.
Ⅴ Ase ayio inabaraareretie amang’ana ayio kare konya ataraba,
ekero konya ataraikerana nkabayateebia;
nigo nakorete bo, erinde timobaisa gocha goteeba:
Emegwekano yaito togosasiima, eyebaachire, gose eyebombire,
nero yarenta ayio.
Ⅵ “Inwe mwaigure amang’ana ayio, bono yarore onsi!”
Inee! Timokoyaorokia?
Korwa bono na kogenderera nkobaorokeria inde amang’ana amayia,
amang’ana konya abisekanete motana komanya.
Ⅶ Amang’ana ayio mbono atongirwe, tarengeo kare,
timwana koyaigwa rinde, otatiga rituko ria reero;
igo nario motabaise goteeba ng’a nkorwa kare mwayamanyete.
Ⅷ Korwa amatuko a kare timwana koyaigwa, gose koyamanya,
naki amato aino tatinoretwe moyaigwe.
Nigo namanyete ng’a timwarenge koba abegenwa,
ekiagera mwabeire abasaria korwa okoiborwa kwaino.
Ⅸ Nateebanirie endamwamu yane ase engencho y’erieta riane,
na ase engencho y’ogotogigwa kwane nayetangire,
timbaisa kobasiria.
Ⅹ Rora nabachenire, ko tari buna efeta egochenwa;
nabateemire ase okobaetia ase omorero bw’emechando.
Ⅺ Nigo nakorire ayio ase engencho yane,
ee, ase engencho yane inche omonyene,
tingotiga erieta riane rikorwe ribe eritachenegeti.
Tinkoa onde obonene bwane.
Koresi nere omoraai Omonene achorete
Ⅻ “Inwe ab’ororeeria rwa Yakobo,
inwe Abaisraeli, aba narangeretie, ntegerere!
Inche ninche Ere, ninche omochakano na omoerio.
ⅩⅢ Okoboko kwane nakwo kwabegete oboroso bw’ense,
na okoboko kwane gw’okorio gokarambora igoro chionsi;
ekero nkorangeria igoro na ense,
nigo chigotenena amo.
ⅩⅣ “Sangererekana amo inwe mwensi, moigwe!
Ning’o ase chinyasae echio obaanete amang’ana aya?
Omonto oyi’Omonene anchete
nere oraikeranie okogania kw’Omonene igoro ya Babiloni,
nere orarwanie Abakalidayo.
ⅩⅤ Inche ninche nakwanire na komorangeria,
namorentire, nimosesenie ase ogokora kwaye.
ⅩⅥ “Inchuo ang’e ase ’nde, moigwe amang’ana aya:
Korwa omochakano tinabeete ngokwana bobisi,
korwa ekero keria amang’ana aya abeete,
inche nao narenge.”
Bono Omonene ontomire amo n’Omoika oye.
Omoroberio bw’Omonene ase abanto baye
ⅩⅦ Aya nar’Omonene, Omobooria oo, Omochenu bw’Abaisraeli, agoteeba:
“Inche ninche Omonene, Nyasae oo,
ninche ngokworokereria okore aya agokorentera amaya,
ninche nkogotang’ana ase enchera ogwenerete kobwatia.
ⅩⅧ “Naki y’are koba buya onye nkwaigwera amachiiko aane!
Rirorio omorembe nigo orenge kogochera buna amaache a rooche
na oboronge bogochere buna emerindo y’enyancha.
ⅩⅨ Oroiboro rwao nigo rware gocha koba oronge buna omokenye,
na ororeeria rwao robuche robe oronge buna chinche chi’omokenye.
Amarieta abo tarenge gocha korusigwa, gose gosirigwa,
korwa ase obosio bwane.”
ⅩⅩ Soka korwa Babiloni, tama korwa ase ense y’Abakalidayo;
raria amang’ana aya neriogi ri’omogooko,
ee, moyararie!
Toma amang’ana ayio gochia ase chinsinyo chi’ense,
moteebe, “Omonene obooririe abanto ba Yakobo, omosomba oye.”
ⅩⅪ Ekero Omonene aetetie abanto baye ase erooro, tibabete nerang’o,
nigo abatubokeretie amaache korwa ase egetare,
akabochora egetare, na amaache agatimboka gocha isiko.
ⅩⅫ Omonene oteebire, “Omokori amabe tabwati omorembe.”