ⅩⅬⅨ
Omosomba bw’Omonene nere Omobaso na Omotooria bw’abaanto b’ebisaku bionsi
Ⅰ Inwe abanto momenyete ase ebisinka,
na ase chinse chionsi chire aare,
tegerera monyigwe!
Omonene nigo andangeretie konde ase enda ya baba,
nigo andogete erieta konde enda ime.
Ⅱ Agatieria omonwa one okaba buna omoro omwoge,
akambisa ime ase ekiriri gi’okoboko kwaye;
agantieria nkaba buna ensara enyoge,
agansoyia ase omobirangwa ime, akambisa aroro.
Ⅲ Erio aganteebia: “Aye nomosomba one Israeli,
ase engencho yao nintogigwe.”
Ⅳ Korende ngateeba: “Nabeire ngokora emeremo emekong’u bosa,
natugutire chinguru chiane bosa, ntanyoreti gento kende;
nonya naboigo, ekeene, oboronge bwane nigo bokorwa ase Omonene,
na eng’eria yane nigo ekorwa ase Nyasae one.”
Ⅴ Nateebigwe ring’ana n’Omonene, oria ontongete ase enda ya baba
ng’a nimbe omosomba oye,
erinde ng’iranie ororeeria rwa Yakobo gochia asare,
na nsangererie Abaisraeli gochia asare.
Inche nanyorire amasikani ase obosio bw’Omonene,
Nyasae one obeire chinguru chiane.
Ⅵ Nigo agoteeba iga: “Ayio tagoisana asore obe omosomba one
ase okoiraneria ab’ebisaku bia Yakobo amaya abo,
na koirania abatigari b’Abaisraeli boka.
Boigo ningokore obe omobaso bw’abaanto b’ebisaku;
erinde ogotooreka kwane kogende goike ase chinsinyo chi’ense.”
Ⅶ Aya naro Omobooria bw’Abaisraeli, Omochenu obo,
oria ochayetwe kegima na kogechwa na Mwanyabaanto;
oria ore omosomba bw’abagaambi, atebiire:
“Abarwoti mbarore ayio, bagororoke batenene,
na abagaambi batung’ame,
ase engencho y’Omonene oyore omwegenwa,
oyio ore Omochenu bw’Abaisraeli, oyio ogochorire.”
Yerusalemu ogokorwa omoyia
Ⅷ Aya nar’Omonene agoteeba:
“Ase engaki yancheire, nakoiraneretie ogosaba kwao,
ase rituko ri’ogotooreka, naoboseemiate,
nabeire nkorendete, na goetera asore nakorire okobwatana kw’ogotianania nabaanto,
erinde oiranerie ense amaya aye na gwatanana emiando yasaretigwe.
Ⅸ Otebie abasibwa: Soka korwa ase obosibwa,
na oteebie abare ase omosunte: Eorokie!
Barabwo mbabe bakoragerigwa ekero bare ase orogendo,
mbanyore oborisia bwabo ase ebigoro na ase ebitunwa biarenge bosa.
Ⅹ Tibakoba nenchara, gose erang’o,
eguru‐gura na omobaso tibikobasamba,
ekiagera Omonene oria obaroreire amaabera nabaraae,
nabatang’ane gochia ase chinsoko chi’amaache.
Ⅺ “Nindoisie chinchera ase ebitunwa biane bionsi,
ne chinchera chiane chinene nchiroisigwe chiimokerere igoro.
Ⅻ Rora, abanto mbache korwa chinse chi’aare,
abande barue sugusu, na abande bosongo,
na abande barue ense ya Sinimu.”
ⅩⅢ Inwe igoro chionsi, tera nomogooko;
naye ense, aka eriogo ri’omochengo;
inwe ebitunwa, tera mono,
ekiagera Omonene oremirie abanto baye,
ororeire abachandegete baye amaabera.
ⅩⅣ Korende abanto ba Sayoni nigo bagoteeba:
“Omonene ototigire,
Omonene oito otwebire.”
ⅩⅤ “Inee! Omokungu neebe omwana oye akogonkia,
erinde tarorera omwana aiborete amaabera?
Ee, abakungu nabo bareebe,
korende inche tinkobeeba inwe.
ⅩⅥ Rora, nigo imang’erete amarieta aino ase ebisanyi bi’amaboko aane;
ne chindwaki chigoetanaine nigo
chire ase obosio bwane botambe.
ⅩⅦ “Abana bao nigo bakoayerera gocha,
na abagosaretie nigo bagotama korwa asore.
ⅩⅧ Ramokia amaiso ao, origererie orore;
bonsi mbasangererekane amo bachiche asore.
Omonene oteebire ng’a ekeene, buna Ere are moyo,
abwo bonsi babe buna ogwechabera kwao,
nigo oreboyie buna omoriakari akweboyia.
ⅩⅨ “Ekeene, ense eyio yaino yasaretigwe kegima, egatigwa bosa,
korende bono nebe enke mono,
ekiagera abaramenyeo nigo barayebuchere;
abanto abwo baabakorerete bobe batamire gochia aare mono.
ⅩⅩ Nebe ase engaki eyio abana kwauretwe
barakwane ase oigwete, bateebe:
Aase aiga naagote mono,
togareerie tonyore aase tokomenya.
ⅩⅪ Erio nokwane ase enkoro yao, bweborie:
Ning’o onyiborerete abana aba?
Nigo nasiretie abana baane,
ngatigwa inde bosa buna omogomba,
nigo noosetwe nkana‐gotayaya.
Inee! Ning’o ondererete abana aba?
Naama! Nigo natigetwe inde bosa,
abana aba ng’ai baarenge?”
ⅩⅫ Aya nar’Omonene agoteeba:
“Rora, nindambore okoboko kwane gochia ase abanto b’ebisaku,
nintenenie ekemanyererio kiane bakerore;
erio abanto abwo mbarente abana bao abamura, baababeegete bikuba,
na abana bao abaiseke baababeegete mareko.”
ⅩⅩⅢ Abarwoti mbabe abareri b’abana bao,
ne chiting’ana chiabo chibe chikobarageria.
Abwo mbatung’ame inse, baumame ase obosio bwao,
bamene ebuse y’amagoro ao.
Erio nonyare komanya ng’a ninche Omonene;
abwo bansemeretie tibagosookigwa.
ⅩⅩⅣ Inee! Omonto ore ne chinguru naurwe egiasakoire?
Gose oyore noboronge naurwe abasibwa baye?
ⅩⅩⅤ Ee, aya nar’Omonene agoteeba:
“Nonya nabasibwa b’oyore ne chinguru mbarusigweo,
na egiasakoretwe noyore omotindi ngetoorigwe,
inche Omonene ning’amereranie noyio ogokoamereria,
nintoorie abana bao.
ⅩⅩⅥ Abanto abwo bakogochanda nimbabetererie barie chinyama chi’emebere yabo abanyene,
na banywe amanyinga abo,
abatindie buna edivai egotindia.
Erio abanto bonsi mbamanye ng’a ninche Omonene inde Omotooria oo,
na Omobooria oo, Omobui o Yakobo.”