Ⅼ
Ⅰ Aya nar’Omonene akoboria:
“Ng’ai riruube ri’ogotigana rire,
riria naete nyoko ng’a totigane?
Gose monto ki nabwate esira yaye nkabaoonia inwe asare?
Taibo! Ebibe nabio biagerete mokaoonigwa,
na ogosaria kwaino nakwo kwagerete nyoko agaserigwa.
Ⅱ “Nase ki ntanyorete nonya nomonto oyomo ekero nachete?
Nase ki nonya nomonto oyomo atanyitaberete ekero narangeretie?
Inee! Okoboko kwane nigo kweng’eire gotanyare kobooria?
Gose inche nigo naborirwe chinguru chi’ogotooria?
Naama! Ekero ngotogonyera enyancha, amaache nigo agosira;
nigo ngokora chindooche chiaba erooro;
chinswe chireo nigo chikoborwa amaache, chiakwa chiagunda.
Ⅲ Nigo nkoboyia igoro nomosunte,
erio nayetuba neanga y’okweumia.”
Ⅳ Omonene ong’eire oromeme buna orw’abeorokereretie,
erio nario ndamanye gokwana ring’ana rikorenta oboremu ase oyo orosire.
Emambia ase emambia nigo agontura, otabobora amato aane,
nigo agontabobora inyigwe buna oyo okworokererigwa.
Ⅴ Ee, Omonene otinoire amato aane;
nainche tinyangeti koigwera,
gose tinaonchogete gochia magega.
Ⅵ Nigo naonchorete omogongo one gochia ase abwo bayoagete,
na ekenyinyiro kiane ase abwo basunyorete chinderu chiane.
Tinabisete obosio bwane korwa ase abwo banchaaye na gontwera amate.
Ⅶ Omonene nankonye;
ase ayio tinkobugwa nogochaywa;
na ase ayio nakorire obosio bwane bwabeire obokong’u buna rigena,
nimanyete ng’a tingosookigwa.
Ⅷ Ere oyokong’a oboronge bwane nigo are ang’e nainche.
Onye nabo, ning’o oranyare koamererania nainche?
Tiga ache totenene amo.
Oyo ogonsoera, ng’ai are?
Tiga ache ang’e nainche.
Ⅸ Naama! Omonene nankonye; monto ki oranyare konachera ekiina ng’a nomomochi inde?
Rora, abwo bonsi nabagote buna eanga,
mbariegwe buna eanga ekoriegwa nebigwankwa.
Ⅹ Ning’o ore ase more omoirogete Omonene
na koigwera eriogi ri’omosomba oye?
Oyio ogotaara ase omosunte otari korora omobaso,
tiga egene erieta ri’Omonene
na amosemerie Nyasae.
Ⅺ Naama! Inwe mwensi aba mogouta omorero,
na gwesiberania ebieri,
genda mosambwe nomorero oino,
na ase ebieri biaino mwatongirie!
Aya naro moranyore korwa ase okoboko kwane,
moraare inse more nobororo.