ⅬⅠ
Amang’ana akoremia abanto ba Sayoni
Ⅰ Inwe aba mokorigia oboronge,
ee, inwe aba mokondigia inche Omonene, tegerera monyigwe!
Rigereria egetare ase mwabaachetwe korwa,
Ⅱ ee, rigereria Aburaamu, sokoro yaino,
na engoro ase mwakunyetwe korwa,
na Sara oyo obaiborete.
Ekero Aburaamu arenge bweka, nigo namorangeretie,
nkamosesenia, nkamomentekania.
Ⅲ Omonene naremie Sayoni,
naremie abatigarete bare ase amaturi.
Naroisie aase aye abeete erooro, abe buna omogondo o Edeni,
na ense enyomo yaye ebe buna omogondo Omonene.
Omogoko na omochengo mbibe bikoigweka ime yaye,
boigo okoiraneria ng’a mbuya mono, na amatera ay’ogotogia, mbibeo.
Ⅳ Inwe abanto baane, inyigwere;
inwe abanto b’egesaku kiane, tegerera monyigwe!
Nindue ogochika kwane,
na oboronge bwane mbobe omobaso ase abanto bonsi.
Ⅴ Oboronge bwane nigo bore ang’e,
ogotooreka kwane ngocha kore,
amaboko aane nagambie abanto bonsi ekiina kia boronge;
abanto bamenyete ase ebisinka na ase chinse chire ang’e nenyancha nigo bang’anyete,
basemerie okoboko kwane.
Ⅵ Imokia amaiso aino morigererie igoro,
naende morigererie ense inse aa.
Igoro chionsi nchisire buna erioki,
na ense negote buna eanga.
Abanto bamenyeteo nigo barakwe buna ebichuni,
korende ogotooreka kwane nkogenderere kobao kare na kare,
na oboronge bwane tibokoera nonya ng’ake.
Ⅶ “Inwe abamomanyete oboronge, ntegerera moigwe,
inwe aba amachiiko aane are ime ase chinkoro chiaino;
timoiroka abwo bakobachaya,
gose timoondoka ekero bakobachecheria.
Ⅷ Ebigwankwa mbirie abanto abwo buna bikoria chianga,
na amakonde nabarie buna akoria amarionya e ching’ondi;
korende oboronge bwane nigo boragenderere kobao kare na kare,
na ogotooreka kwane ase ebiaare bionsi.”
Ⅸ Aye okoboko kw’Omonene, imoka, bwebeke chinguru, imoka!
Imoka buna kwaimogete ase amatuko a kare,
ee, imoka buna kwaimogete ase ebiaare bia kare.
Inee! Tari aye kwanachanete Rahabu,
okabeta enchoka eria?
Ⅹ Inee! Tari aye gwakametie amaache ’enyancha,
amaache e chindiba chintambe chi’enyancha,
erio okaroisia enchera aroro, erinde ababooretigwe bakaambokerao?
Ⅺ Abatooretigwe n’Omonene mbairane, bache Sayoni bagotera;
omogooko o kare na kare nobe igoro ase emetwe yabo;
mbabe nomogooko na omochengo.
Obororo na omoichano mbiere kegima.
Ⅻ “Inche ninche nkobaremia.
Aye naye ng’o okoiroka Mwanyabaanto abwo bagokwa?
Mwanyabaanto abwo bagosira buna obonyansi.
ⅩⅢ Aye kwebire Omonene, Omotongi oo,
oyio bwarete igoro, na akabeeka oboroso bw’ense.
Omobaso boira aye nigo ogendererete kwoboa ekeririanda ki’omochandi oo
buna nigo are ang’e kogoseria.
Korende ng’ai ekeririanda ki’omochandi kere?
ⅩⅣ Oria bwosetwe na agasibwa nasiborwe bwango;
ere tagokwa na koirwa ase embeera,
na takoborwa endagera.
ⅩⅤ “Inche ninche Omonene, Nyasae oo,
nigo ngoturubania enyancha, emerindo yaye yaba ekoeera.
Omonene bw’Emeganda, nario erieta riane.
ⅩⅥ Nabekire amang’ana aane ase omonwa oo,
naende nakobisire ase ekiriri gi’okoboko kwane.
Nindambore igoro mbeeke oboroso bw’ense,
ninteebie abanto ba Sayoni:
Inwe nabaanto baane.”
Omoerio bw’emechando ya Yerusalemu
ⅩⅦ Inwe abanto ba Yerusalemu, boka, imoka motenene!
Inwe mwanyure korwa ase okoboko kw’Omonene
egekombe ki’endamwamu yaye;
inwe mwanyure korwa ase egekombe ekio,
mwanyuereranirie eturubo mwatindire.
ⅩⅧ Ase abamura bonsi aiborete onde tari okomoraa,
ase abwo arerete, onde tari okomobwata okoboko.
ⅩⅨ Amang’ana aya abere akonyorire:
Ogosirigwa na ogotigwa bosa,
ogoitwa nenchara na emioro.
Ning’o orakororere amabeebe?
Gose ning’o orakoremie?
ⅩⅩ Abamura bao bagoyire,
nigo baraire ase amatabeekania e chinchera chionsi,
buna chingabi chiabwatirwe nemeeto.
Omonene oo obeire nendamwamu ase bare, obaeire egesusuro.
ⅩⅪ Ase ayio, aye ochandegete,
aye gwatindire, ko tari ase ogotinda kw’edivai, igwa amang’ana aya:
ⅩⅫ Aya nar’Omonene agoteeba,
oyio ore Omonene, Nyasae oo,
okorwanerera abanto baye:
“Naama, narusirie korwa ase amaboko ao egekombe ekio okonywera na gotinda,
egekombe ki’endamwamu yane togokenywera naende.
ⅩⅩⅢ Egekombe ekio ninkebeke ase amaboko ay’abakogochanda,
abwo bagotebirie:
Ekumbe, toete igoro yao.
Aye gwakorire omogongo oo koba buna riroba rigotachwa,
naende buna enchera ase abanto bagoeta.”