RIRUUBE RIA KABERE RIA
YOHANA
Ogochaakera
Riruube eri ria kabere ria Yohana nigo riarikire “Nomogaka gochia ase omokungu omwanchua n’abana baye”, kero kende nekanisa n’ababwatani baye. Amang’ana ameng’e nogosorora abanto banchane barabwo ase barabwo boigo nogokurerwa ase aborokia b’oborimo n’amegerio abo.
Okobagwa kw’egetabu eke
Ogochaakera 1-3
Obonene bw’obwanchani 4-6
Ogokuurerwa gw’okwerenda korwa ase okworokereria kw’obong’ainereria 7-11
Ogokoorera 12-13
Ⅰ
Ⅰ Korwa ase omogaka gochia ase omokungu omochore amo nabana bao, inwe abwo nyanchete ase ekeene. Tari inche bweka mbanchete, korende nabaria bonsi abamanyete ekeene.
Ⅱ Twabanchire ase engencho y’ekeene eke geikaransete ime yaito, kerokio inakebe amo naintwe goika kare na kare.
Ⅲ Obuya, na amaabera, na omorembe bikorwa ase Nyasae Tata na ase Yeso Kristo, Omwana o Tata, nigo birabe amo naintwe ase ekeene na ase obwanchani.
Ekeene n’obwanchani
Ⅳ Nagookire mono ekiagera narorire abande ase abana bao bagendererete ase ekeene, buna Tata atochikerete.
Ⅴ Na bono, omokungu, nakoboririe ng’a twanchane intwe ase intwe. Tari ng’a nogochika okoyia ngokoriikera, korende nkoria twarenge nakorokwo korwa ritang’ani.
Ⅵ Obo nabwo obwanchani ng’a togenderere ase amachiiko aye. Oko nakwo ogochika koria mwaigwete korwa ritang’ani, ng’a mogenderere ase obwanchani.
Ⅶ Naki abang’ainereria abange baasokire gochia ase ense, abatari koorokia Yeso Kristo ng’a ochire ase omobere. Oyore buna abwo, nere oria omong’ainereria, naende nomobisa o Kristo.
Ⅷ Erigererie inwe abanyene timosiria aya twabarenteire, korende monyoore eng’eria eng’ikeranu.
Ⅸ Onde bwensi oragenderere goetania, na tari gotenena ase okworokereria gwa Kristo, oyio tari na Nyasae. Ere oyogotenena ase okworokereria okwo, oyio nigo are nabwo babere, Ise na Omwana.
Ⅹ Omonto karache ase more, na ere tarenteti okworokereria okwo, timomooroisia ase enyomba yaino, gose timomokwania.
Ⅺ Naki ere oyoramokwanie igo obwatanire nemeremo yaye emebe.
Amang’ana ogokoorera
Ⅻ Nonya mbwate amang’ana amange nanga nabariikera, tindigeti koyarika ase ekaratasi na egwino, korende ninsemeretie gocha ase more gokwana nainwe obosio ase obosio, erinde omogooko oito oikeranigwe.
ⅩⅢ Abana ba mosubati omino omochoore bagokwanirie.