RIRUUBE RIA GATATO RIA
YOHANA
Ogochaakera
Riruube ri’agatato korwa ase Yohana nigo riarigetwe n’omogaka gochia ase omorani bw’ekanisa okorokwa Gayo. Omoriki nigo agotogia Gayo ase engencho y’obokonyi bwaye gochia ase abakristo bande, nakomokurera igoro y’omosaacha okorokwa Dioterefe.
Okobagwa kw’egetabu eke
Ogochaakera 1-4
Gayo ogotogigwa 5-8
Dioterefe okogambigwa 9-10
Demeturio ogokwanwa buya 11-12
Ogokoorera 13-15
Ⅰ
Ⅰ Korwa ase omogaka ngokorikera nde aye Gayo, omwanchani, oyonyanchete ase ekeene.
Ⅱ Omwanchani, nasabire ng’a ogenderere buya ase amang’ana onsi, naende obe nobogima obuya, buna omoyo oo ore buya.
Ⅲ Naki igo nagogete mono ekero abaminto bachete baganteebia igoro y’obwegenwa bwao ore nabwo ase ekeene, na buna ogendererete ase ekeene.
Ⅳ Tindi nomogooko onde omonene kobua oyo, koigwa ng’a abana baane mbagendererete ase ekeene.
Gayo ogotogigwa
Ⅴ Omwanchani, igo ore omwegenwa ase onsi ayagwakoreire abwo bare abaminto, nonya bare abamenyi.
Ⅵ Barabwo babeire kirori ase ekanisa igoro y’obwanchani bwao. Nokore buya korabakonye ase orogendo rwabo, buna egwenerete ase okomokorera Nyasae.
Ⅶ Naki ase engencho y’erieta ria Yeso bagasooka isiko, tibaira gento korwa ase abanto b’Ebisaku.
Ⅷ Nabo etogwenerete intwe koroisia abanto bare buna abwo, erinde tobe abakori emeremo amo nabarabwo ase ekeene.
Dioterefe na Demeturio
Ⅸ Nabarikerete abekanisa amang’ana, korende Dioterefe, oyobwanchete koba oyo bw’eritang’ani ase bare, tatwancheti.
Ⅹ Ase ayio, kondache ning’inyore ogokora kwaye are gokora, buna are gokwana amang’ana amabe igoro ase tore. Ere taisanegeti nayio, ere omonyene tari koroisia abaminto, naende atanga baria barigetie kobaroisia, na aosokia barabwo korwa ase ekanisa.
Ⅺ Omwanchani, tibwega obobe, korende bwege ekere ekiya. Ere oyogokora amaya noyo o Nyasae, korende ere oyogokora amabe tarochi Nyasae.
Ⅻ Demeturio obereirwe kirori nabaanto bonsi, naende nekeene ekenyene, ng’a nomuya are. Na intwe boigo twarorire, na aye kwamanyire ng’a oborori bwaito nobw’ekeene.
Amakwania ogokoorera
ⅩⅢ Nabwate amang’ana amange nanga nakoriikera, korende tindigeti gokoriikera ase ewino na ekaramu.
ⅩⅣ Ninsemeretie kororana naye, na igo tokwane komo obosio ase obosio.
ⅩⅤ Omorembe obe amo naye. Abasani bao bagokwanirie. Tokwanerie abasani baito, kera omonto ase erieta riaye.