ⅩⅪ
Ayubu
Ⅰ Bono Ayubu akairaneria, akabora:
Ⅱ Tegerera mono moigwe amang’ana aane,
ayio naro arabe okoremia kwaino ase ’nde.
Ⅲ Remereria, erinde nkwane;
na ngokoora gokwana, mogenderere gonchecheria.
Ⅳ Inee! Inche Mwanyabaanto nkwemurunganeria?
Nase ki rende ndaremererie tinyemurungania?
Ⅴ Indigererie na moichanigwe;
erio motube emenwa yaino namaboko, mokire.
Ⅵ Ekero nkoinyora amang’ana aya, obwoba nigo bogonsoa,
na omobere one oiguswa.
Ⅶ Nase ki abakori amabe bakogenderera koba moyo
na kwegotera bare ne chinguru na okobua?
Ⅷ Abana babo nigo bakoba nokogenderera okuya amo nabarabwo,
na ororeria rwabo boigo.
Ⅸ Chinka chiabo nigo chire buya, bwoba tiboiyo,
gose Nyasae tari kobaa egesusuro.
Ⅹ Chiombe chiabo nigo chikonyora amarieme buya,
naende chiabiara chitari korekera.
Ⅺ Abana babo nigo bagotomwa isiko banga buna amaicho,
nigo bakoba bagotenga.
Ⅻ Nigo bagotera bakobugia chinchigiri na amakano,
naende bagokera amariogi ’ebiroria.
ⅩⅢ Nigo bakogenderera kwegokia nobotenenku bwabo;
bakwa bagenda aase abakuure bare nomorembe.
ⅩⅣ Barobwo nigo bagoteebia Nyasae: totige intwe!
Titoganeti komanya chinchera chiao.
ⅩⅤ Oria Omobui ninki are goika tomokorere?
Mbitoki ki toranyore ase okomosaba?
ⅩⅥ Rora, ogosesenigwa kwabo tikori ase amaboko abo;
ogosemia kw’abakori amabe nigo kore aare nainche.
ⅩⅦ “Inee! Ng’ara karenga chitaaya chi’abakori amabe chikorimigwa?
Ng’ara karenga emechando ekobacheera?
Inee! Ara karenga Nyasae akobaa emechando ase engencho y’endamwamu yaye?
ⅩⅧ Gose barabwo nkoirurukigwa bare buna chimboba,
na buna omoiriro okoirurukigwa nomwaga?
ⅩⅨ “Inwe nigo mogoteeba ng’a Nyasae nigo akogachera abana ebibe bi’abaise.
Tiga Omonene aakane abanto abanyene ebibe biabo,
erio nario baranyare kobimanya.
ⅩⅩ Tiga barore ogosirigwa kwabo namaiso abo,
naende banyoosigwe endamwamu y’Omonguru.
ⅩⅪ Ekero emetienyi yabo yaerire na bakuure,
Inee, mbabe bagwechandera chinka chiabo?
ⅩⅫ Onde nare oranyare kworokereria Nyasae obong’aini,
ere oria okogambia abwo bare igoro mono?
ⅩⅩⅢ “Omonto oyomo nigo agokwa ore nobotenenku obonge,
ore n’obotoereru bwonsi na orendire buya,
ⅩⅩⅣ ebirandi biaye biichire namabeere,
na amauga ’omobere oye aichire nemeseto.
ⅩⅩⅤ Omonto onde igo agokwa ore nobororo bw’omoyo oye,
atana konyora amaya nonya ng’ake.
ⅩⅩⅥ Abwo bonsi nigo bakobeekwa ase riroba bareng’anetie,
bagunda, na amakonde abatuba.
ⅩⅩⅦ “Rora, nimanyete ebirengererio biaino,
na emeroberio yaino y’ogonkora bobe.
ⅩⅩⅧ Inwe nigo mokoboria: Ng’ai enyomba y’omochandi oria ere?
Naende: Ng’ai obomenyo bw’abakori amabe bore?
ⅩⅩⅨ “Inee! Inwe timori koboria abaeti chinchera,
naende mwanchera oborori bwabo,
ⅩⅩⅩ ng’a omokori amabe nigo akorendwa ekero emechando yachire,
naende atoorigwe ase rituko ri’endamwamu?
ⅩⅩⅪ Ning’o oranyare koorokeria omokori amabe chinchera chiaye?
Ning’o oramoakane amabe ayio akorire?
ⅩⅩⅫ Ekero arabeekwe ase oboina,
oboina boria nigo boraarendwe.
ⅩⅩⅩⅢ Amaroba erigoko nabe amansu asare;
abanto bonsi mbamotunyane korwa magega,
na omobaro bw’abamotang’anerete tori kobareka.
ⅩⅩⅩⅣ “Nase ki rende mokondemia namang’ana abosa?
Ayatigaire ase amairanerio aino nigo are oborimo bwoka.”