ⅩⅩ
Sofari
Ⅰ Erio Sofari Omonaama akairaneria, akabora:
Ⅱ “Bono ebirengererio bire ime yane bianchandire,
ase ayio biagerire imbe omwango koiraneria.
Ⅲ Naigure ogokuurerwa gw’okonyomania ng’a inche nomomochi,
korende omoika bw’okomanya ore ime yane ogerire ing’iranerie.
Ⅳ Inee! Aye tikwana komanya ng’a korwa kare, ekero Mwanyabaanto babeegetwe ase ense,
Ⅴ omochengo bw’abakori amabe noyo bw’engaki enke,
na omogooko bw’abatamoirogeti Nyasae nomweng’e?
Ⅵ Ere naisa koba nobonene boigete igoro,
na omotwe oye oike ase amare,
Ⅶ goika asire kare na kare,
buna obonyira bwaye bogosira.
Abwo bamorooche mbaborie; Omonto oria, ng’ai are?
Ⅷ Nigo arasire buna chindoto, takonyorekana,
ee, nigo aragikerigwe buna amaroro a botuko.
Ⅸ Eriso riarenge komoorora, tirikomoorora naende,
gose aase aye takomorigereria naende.
Ⅹ Abana baye mbabe bagosaberera korwa ase abataka,
na amaboko aye nairanie obotenenku bwaye bwonsi.
Ⅺ Amauga aye nigo aichire ne chinguru chi’oboke bwaye,
korende chinguru echio nigo chiraraare nere ase riroba.
Ⅻ “Nonya obobe bore obwansu ase
omonwa oye ime,
nabobise inse y’oromeme rwaye,
ⅩⅢ nonya obwatererete obobe obwo
bokong’u, takobotiga,
korende nabogache ase omonwa oye ime,
ⅩⅣ endagera eyio nigo erarore se ase enda yaye,
ebe buna obosongo bw’eng’iti engenda inse ime yaye.
ⅩⅤ Ere nigo akomera chinibo, naende ochiroka;
Nyasae nigo agochiseria korwao.
ⅩⅥ Omonto oyio nanyunyunte obosongo bw’eng’iti nomonwa,
na obosongo bokorwa ase oromeme rw’eng’iti eria mbomoite.
ⅩⅦ Ere takwegokia ase okorora chindooche,
chinsoko chiichire namooke na amabeere.
ⅩⅧ Ebinto akoreire emeremo emekong’u nabiiranie, takobimera,
gose takonyara kwegokeria ebitoki biria anyorire.
ⅩⅨ Ekiagera obeire ogokorera abataka bobe na kobatiga bare bosa,
naende obeire okoira ne chinguru enyomba ende yonsi ere ataagachete.
ⅩⅩ Ekeene, ribero ri’omonto oyio riagerire taba n’obotoereru,
takonyara kogaacha gento kende gekomogokia.
ⅩⅪ Ekero arageire tari gotigaria kende,
ase ayio obotenenku bwaye tibokogenderera.
ⅩⅫ Nebe ekero agendererete gotenenka mono nachandwe,
na obokong’u obonge mbomochere.
ⅩⅩⅢ Nebe ng’a ekero aisire koigota,
Nyasae namotomere ekeririanda gi’okogechigwa kwaye;
egesusuro ekio nigo keramochere ekero agendererete koragera.
ⅩⅩⅣ Nabe ogotama korwa ase ekerwanero gi’ekioma,
abetwe nensara y’etai.
ⅩⅩⅤ Ensara eyio eng’uswe korwa ase omobere oye,
ee, ensonga ekomesa nesokere ase endorwe yaye,
erio ekeondoko ki’amakweri nakemosoe.
ⅩⅩⅥ Omosunte ekerima nigo ogacheire chinibo chiaye;
omorero otautiri nonde nomosirie,
na ebitigarete ase obomenyo bwaye mbisambwe biere.
ⅩⅩⅦ Igoro neorokie ebibe biaye maiso marore,
na ense nemoimokere komorwania.
ⅩⅩⅧ Ebinto asangereretie ase enyomba yaye mbiirwe;
bionsi nigo birairwe ase rituko ri’endamwamu ya Nyasae.
ⅩⅩⅨ “Eke nakio egetari ki’omokori amabe gekorwa ase Nyasae,
naende oyio noro omwando oye Nyasae amochikerete.”