ⅩⅨ
Ayubu
Ⅰ Erio Ayubu akairaneria, akabora:
Ⅱ “Inee! Ngoika ririri morabe mokogechia omoyo one
na mogonsenyenta namang’ana aino?
Ⅲ Mwabeire mogonchecheria ara ikomi.
Inee! Timori korora obosooku gonkorera bobe iga?
Ⅳ Ee, nonya ekeene nakorire okomocha,
okomocha okwo nokwane inche omonyene.
Ⅴ Inwe onye mogwetogia ng’a nabaya more kombua
na kong’enekeria igo kobwatekana nogochaywa kwane,
Ⅵ rirorio momanye ng’a Nyasae orentire amabe aya ase ’nde,
na ontegire noboreba bwaye.
Ⅶ Rora, nigo nkorera mono ngoteeba: Nakoreirwe bobe,
korende tindi koiranerigwa;
nigo nkorangeria neriogi rinene ng’a nkonywe,
korende ekeene, oboronge tibori gokorwa.
Ⅷ Nyasae oagachire orwaki aase ngoeta,
obeekire omosunte ase ebinchera ngoeta.
Ⅸ Ong’urire obonene bwane.
Orusirie egutwa korwa ase omotwe one.
Ⅹ Korwa ase chinsemo chionsi ong’iyeirie,
bono inche nasirigwe;
osimoire ogosemeria kwane buna omote ogosimorwa.
Ⅺ Obeire nekeririanda ekenene ase ’nde,
na ombarire ng’a nomobisa oye inde.
Ⅻ Ebiombe bi’abarwani baye b’esegi nigo bigocha bire amo,
biabekire eburi ase ngoetera;
biatoorire biang’etananire ase chinsemo chionsi chi’Obomenyo bwane.
ⅩⅢ “Nyasae ogerire abaminto bantigire, bambeereire aare,
na abanto twamanyaine bantigire, babeire buna tibamanyeti.
ⅩⅣ Abanto baminto bantigire, na abasani twanchaine mono banyebire.
ⅩⅤ Abageni bamenyete mwane banyebire;
na abasomba baane abaiseke bambarire buna omoeti;
nabeire omomenyi ase amaiso abo.
ⅩⅥ Ekero nkorangeria omosomba one, ere tari kong’itabera,
otatiga ekero namosoroire, nario rioka agocha.
ⅩⅦ Omoika okorwa ase omonwa one nigo ogotiokera omokungu one bobe;
nigo inde okogechia ase abamura baminto torwete enda eyemo.
ⅩⅧ Nonya n’abana abake banchayire;
ekero ngotenena nigo bagonkwana bobe.
ⅩⅨ Abasani abagisangio banyinyerire na kogechigwa nainche;
nabwo nanchete bang’onchokeire na gonkora bobe.
ⅩⅩ Amauga ’omobere one atongononire ase risankwa ne chinyama,
natigeirwe egesabo getubete amaino gioka.
ⅩⅪ Inwe abasani baane, ndorera amabeebe, ndorera amabeebe,
ekiagera okoboko kwa Nyasae kwang’akire!
ⅩⅫ Nase ki nainwe mogonchanda buna Nyasae anchandire?
Inee! Timoisanegeti ase ogonchanda omobere one?
ⅩⅩⅢ “Naki yare koba buya onye amang’ana aane narikwa bono!
Yare koba buya arikwe ase egetabu,
ⅩⅩⅣ ee, arikwe nekaramu eroisirie korwa ase risasi, ekioma egekong’u,
amang’erwe ase egetare abeo kare na kare.
ⅩⅩⅤ “Korende nimanyete ng’a Omobooria one moyo are,
omoerio nigo aratenene igoro ye riroba.
ⅩⅩⅥ Nyuma risankwa ri’omobere one korirabe riasarekire,
erio nindore Nyasae ’nde ase omobere one.
ⅩⅩⅦ Nimwerorere inche omonyene;
amaiso aane namorigererie, ayane, tari ay’omonto omoao.
“Nimoganetie mono ase enkoro yane ime.
ⅩⅩⅧ Moise goteeba: Nase nchera ki tokomochanda?
Nigo mokorengereria ng’a ninche nagerire amabe onsi anyorire?
ⅩⅩⅨ Inwe iroka ogoitwa n’omoro,
ekiagera oyore nekeririanda nigo akoegwa egesusuro ki’ogoitwa nemioro;
erio monyare komanya ng’a okogambigwa nkoreo.”