ⅩⅧ
Bilidadi
Ⅰ Bilidadi Omosua akairaneria, akabora:
Ⅱ “Inee! Ngoika ririri ogochia korigia amang’ana agokwanwa?
Yarengererie, magega yaye naintwe tokwane.
Ⅲ Nase ki tokobarwa koba buna ching’iti?
Nase ki tokobarwa koba abanto batamanyeti gento kende?
Ⅳ Inee! Aye nigo ogwetandora ase engencho y’endamwamu yao,
ense nigo egochia gotigwa bosa ase engencho yao?
Gose egetare ngetigerigwe korwa aase aye?
Ⅴ “Amaene, omobaso bw’omokori amabe norime,
gose amasase aye takobara.
Ⅵ Oborabu bore ase obomenyo bwaye
nigo borabe omosunte,
na etaya yaye ere asare nerimigwe.
Ⅶ Amatambokero aye are ne chinguru nakeeigwe,
na emeroberio yaye emoiyerie inse.
Ⅷ Amagoro aye nabwatwe nomotego,
abe ogotaara ase egati ye chiirima.
Ⅸ Omotego nomobwate ase egetingiro
na omoeto nomobwate omong’userere bokong’u.
Ⅹ Engori y’ogotegerwa nebiswe ase riroba ase agotacha,
na omotego otegwe ase enchera agoeta.
Ⅺ Nabe okogoswa na kwoboigwa korwa ase chinsemo chionsi,
nkomoseria atame namagoro.
Ⅻ Enchara nemorie goika chinguru chiaye chiere,
na emechando nemobeere ang’e komoiyeria.
ⅩⅢ Oborwaire mbokoore risankwa ri’omobere oye,
oborwaire obotang’ani bw’amakweri mbogundie ebiimo biaye.
ⅩⅣ Nataboranwe ne chinguru korwa ase obomenyo konya asemeretie,
erio airwe ase omorwoti bw’okwoboyia okonge.
ⅩⅤ Enka yaye nebe bosa abanto abaao mbabe bakomenya aroro;
amagena omorero nasiarerwe ase enka yaye.
ⅩⅥ Emeri yaye ’nyome inse ye riroba,
ne chinsagia chiaye nachisusane.
ⅩⅦ Oyio takoinyorwa ase ense nonya ng’ake,
gose nonya nerieta riaye tirikogenderera koinyorwa agwo ase enchera.
ⅩⅧ Ere narusigwe korwa ase oborabu arutwe gochia ase omosunte;
naende aserigwe korwa ase ense.
ⅩⅨ Takoba nomwana gose abanto b’ororeria rwaye ase egati y’abanto bamwabo,
gose monto onde oye tagotigara ore moyo agwo ase amenyete.
ⅩⅩ Abanto bamenyete bosongo mbakumie igoro ye rituko ri’ogosirigwa kwaye,
na abamenyete moocha mbaondokigwe namang’ana ayio.
ⅩⅪ Ekeene, obomenyo bw’abatamoirogeti Nyasae nabo bore igo,
na aase ay’abataganeti komomanya Nyasae nabo are igo.”