ⅩⅦ
Ⅰ “Omoika ong’ereire, amatuko aane aikeire omoerio;
oboina mbonganyete.
Ⅱ Ekeene, abachecheria bang’etananire, na amaiso aane nigo agendererete korora okogechia kwabo.
Ⅲ Aye omonyene obe ntenenera ase ’nde, imbe asore.
Inee! Ning’o rende oranyare kwerua abe ntenenera ase ’nde?
Ⅳ Aye gwasiekire ebirengererio biabo tibiba nokomanya,
ase ayio tokobaimokereria igoro na kobaa okobua.
Ⅴ Omonto ogosigaana abasani ase okwenyorera chinibo chiabo,
amaiso abana babo nigo araukore.
Ⅵ Omonene onkorire nabeire ring’ana abanto bakorabaara,
nabeire oyo abanto bagochaaya ase ogotwa amate.
Ⅶ Emechando yagerire amaiso aane abeire orotutu,
na ebiimo biane bionsi biabeire buna omorengari bosa.
Ⅷ Abanto abaronge bakumirie amang’ana aya,
ee, omonto otari na komocha oimokire gokorera bobe oria otamoirogeti Nyasae.
Ⅸ Korende omonyene oboronge nabwaterere enchera yaye,
na oyio obwate amaboko achenegete nagenderere koba ne chinguru.
Ⅹ Korende inwe mwensi, moirane gocha;
tinkonyara konyora nonya nomonto oyomo ase egati yaino ore omong’aini.
Ⅺ Amatuko aane aetire, emeroberio yane yasarekire,
nonya nokogania gw’enkoro yane.
Ⅻ Abanto abwo baonchoire obotuko bwabeire omobaso;
nigo bagoteeba ng’a omobaso nigo ore ang’e,
korende omosunte noreo.
ⅩⅢ Nonya inde nogosemeria, aase abakuure nao obomenyo bwane,
nindambore oborere bwane ase omosunte ime.
ⅩⅣ Ninteebie oboina: Naye tata
Ninteebie amakonde: Ninwe baba na abaiseke baminto.
ⅩⅤ Inee! Ng’ai rende ogosemeria kwane kore?
Ning’o oranyare gokorora?
ⅩⅥ Ogosemeria okwo nigo koragende gochia aase abakuure.
Nintirimboke amo nakorokwo gochia gotimoka ase riroba ime.”