ⅩⅥ
Ayubu
Ⅰ Erio Ayubu akairaneria, akabora:
Ⅱ Inche naigure amang’ana amange buna ayio,
inwe mwensi nigo more abaremia mogonchanda.
Ⅲ Inee! Amang’ana ayio anga buna omwaga okogusa aerire?
Gose nkere egekogoseegeta oiranerie ayande?
Ⅳ Onye ndiria obogima bwaino bware koba ribaga ri’obwane,
nanga nigo nakwana buna inwe;
nigo nare gokwana amang’ana amange mamincha yaino
na gosingisia omotwe one.
Ⅴ Amang’ana nare ngokwana korwa ase omonwa one, nigo are kobabeeka chinguru;
ee, amabeebe ay’ebikoba igoro nigo are kobaremia.
Ⅵ Ninsa koba ngokwana, obororo bwane tibogokea;
na ninsa koremereria nkire,
emechando yane tegokea nonya ng’ake.
Ⅶ Ekeene, Nyasae okoorire chinguru chiane,
na osiririe abanto bonsi b’enka yane.
Ⅷ Ere okorire omobere one obeire nemenia,
na eyio yambereire kirori;
oboreu bwane bwaorokeire ase obosio bwane kombera kirori.
Ⅸ Omonene obeire nendamwamu ase ’nde,
ontandoranire, naende ongechire;
oromananirie amaino aye ase ’nde;
omochandi one omogoreirie inche amaiso bobe.
Ⅹ Abanto nigo banyansameretie emenwa yabo,
bang’akire chindoe ase chinsea. Bakondama;
nigo bagosangererekana amo ng’a bankore bobe.
Ⅺ Nyasae ondure ase abanto batamoirogeti,
ombekire ase amaboko abakori amabe.
Ⅻ Inche nigo narenge inde n’obotoereru, korende ere agansenyenta,
ee, Nyasae akambwata ebigoti, akambutorana ebing’ese,
bono onkorire nabeire ekerenga kiaye gekoraswa.
ⅩⅢ Abaruti emegwe baye bang’etananire aande onsi,
ombetire chinyigo chiane, tandorereti amaabera;
oumoire amaache endorwe yane igoro ase riroba.
ⅩⅣ Ong’akire amaakwa igoro ase amaakwa ande;
nigo akondindokera buna omorwani esegi ore ne chinguru.
ⅩⅤ Bono natubire omobere one negunia,
ne chinguru chiane nachitugutire ime ase orotu.
ⅩⅥ Amaiso aane abariirire ase obosio bwane,
na ekiriri kiarorekanire ase obosio bwane,
ⅩⅦ nonya tindakora bobe bonde namaboko aane,
na ogosaba kwane kore ogoikeranu.
ⅩⅧ Aye riroba, tobaisa gotuba amanyinga aane,
na ekerero kiane tikenyora ase kegotimokera.
ⅩⅨ Rora, Kirori one igoro are nonya mbono,
ee, Oyokondwanerera igoro are.
ⅩⅩ Nonya nabasani baane nigo bagonsekerera,
inche nigo nkoiyeria amariga ndigereretie Nyasae.
ⅩⅪ Kirori one nansororere ase Nyasae,
buna omonto agosororera omonto onde.
ⅩⅫ Emiaka emeke netigarete,
inche mbwatie enchera ekogenda aase ntanyare koirana korwao naende.