Chinkwana chia kabere ase egati y’Ayubu na abasani baye
ⅩⅤ
(15:1—21:34)
Elifasi
Ⅰ Erio Elifasi Omotemani akairaneria, akabora:
Ⅱ “Inee! Omonto omong’aini nagwenerete airanerie amang’ana are buna omwaga okogusa,
na goichoria enda yaye nomwaga okogusa korwa moocha?
Ⅲ Inee! Nemogwenerete koamererania ne chinkwana chitari nengencho,
gose amang’ana atari korenta buya bonde?
Ⅳ Aye nigo ogosiria okomoiroka Nyasae,
naende gwatanga ogosaba ase obosio bwaye.
Ⅴ Ebibe biao biorokereirie omonwa oo amang’ana ogokwana,
aye gwachorire gokwana amang’ana y’obong’ainereria.
Ⅵ Tari inche ngokonachera ekiina, korende amang’ana aya ogokwana,
ee, aya ogokwana nomonwa oo akobereire kirori.
Ⅶ “Inee! Naye ore omonto bw’eritang’ani koiborwa?
Gose naye gwatongetwe ritang’ani ebitunwa bitarabao?
Ⅷ Inee! Kwana koigwa emeroberio y’obobisi bwa Nyasae?
Aye nigo kwenyoreire obong’aini aye bweka?
Ⅸ Inee! Aye ninki omanyete intwe totamanyeti?
Mbong’aini ki omanyete intwe totamanyeti?
Ⅹ Abanto bamerire chimbuche amo nabakoorire emiaka emenge nao bare aa amo naintwe,
barabwo mbabuete iso ase emiaka.
Ⅺ “Inee! Okoremia koria Nyasae akoeire tikogoisaini?
Gose ring’ana ri’oboitongo agokwana naye nigo rire bosa asore?
Ⅻ Nase ki enkoro yao ere morero,
na amaiso ao akomogora,
ⅩⅢ goika omoyo oo obeire mamincha ya Nyasae,
na bono aye ngosokia ore amang’ana aya korwa ase omonwa oo?
ⅩⅣ Inee! Mwanyabaanto ninki are goika anyare koba oyochenegete?
Gose ere oyio oiboire nomokuungu ng’a anyare koba omonyaboronge?
ⅩⅤ Rora, Nyasae tari gosemeria nonya nabachenu baye,
na igoro chionsi tichichenegeti ase obosio bwaye.
ⅩⅥ Onye nabo, naki rende ase omonto oyio ogokora ay’okogechia na gosaria,
oyio okonywa ebibe buna amaache?
ⅩⅦ “Integerera oigwe, na inche nkworokie;
amang’ana narorire ninyararie.
ⅩⅧ Ayio abanto abang’aini bateebeetigwe ne chisokoro chiabo,
nabarabwo tibayabisete.
ⅩⅨ Barabwo bakaegwa ense eria,
na abanto b’ense engeni tibaetete aroro.
ⅩⅩ “Omokori amabe nigo akogenderera gochandeka nobororo ase amatuko aye onsi,
na omochandi boigo ase emiaka ere achikeretwe.
ⅩⅪ Amariogi ay’okwoboyia nigo agosoa ase amato aye;
na ekero are n’obotoereru, oyo ogosiria nigo akomocheera.
ⅩⅫ Ere tari koba nogosemeria ng’a gose narue ase omosunte naende,
ekiagera omoro nigo omoganetie.
ⅩⅩⅢ Omonto oyio nigo akoba okoombogana korigia endagera, oboria:
Ng’ai ere?
Nigo amanyete ng’a rituko ri’omosunte riamoikeire ang’e.
ⅩⅩⅣ Emechando na obwoba nigo bikomoondokia.
Ebio nigo bikomorwania na komobua,
ne chinguru buna echi’omorwoti bwebekire ang’e korwana esegi.
ⅩⅩⅤ “Ere oramboire okoboko kwaye mamincha ya Nyasae,
naende oba nomokia gokora ay’oboenenu ase obosio bw’Omonguru.
ⅩⅩⅥ Oyio nigo akobogoria ching’aya chiaye chikumbire,
ominyoka ore nebigoti ebikong’u ochia korwania Omonene.
ⅩⅩⅦ Nigo atubire obosio bwaye namaguta ’obonoru,
naende onorire ase ebibono biaye.
ⅩⅩⅧ “Oyio obeire omenyete ase emechie yasaretigwe
agwo ase chinyomba chitamenyiri nonde,
echio konya chiarurwe ase ogosarigwa chibe amatombe.
ⅩⅩⅨ Omonto oyio takoba omonda,
obotenenku bwaye tibokogenderera kobao,
gose tibokobucha ase ense.
ⅩⅩⅩ Tagotooreka korwa ase omosunte;
omorero mbwomie emeseboka egoseboka,
ere omonyene nasire ase omoika bw’Omonene.
ⅩⅩⅪ Tabaisa kweng’aina ase ogosemeria amang’ana abosa,
ekiagera obosa obwo nabwo borabe eng’eria yaye.
ⅩⅩⅫ Naakanwe obosa obwo ritang’ani engaki yaye etaraika,
na nigo arabe buna orosagia rwaye rotarasicha.
ⅩⅩⅩⅢ Oyio nigo arabe buna omosabibu okoarora amasabibu ataratoba,
na buna omozeituni okoarora ebisicha biaye.
ⅩⅩⅩⅣ Ebiombe bi’abatamoirogete Nyasae nigo biragombae,
na omorero nosambe emechie y’abanchete amaaki.
ⅩⅩⅩⅤ Abanto abwo nigo bakoroberia amabe, barenta ogosaria;
okwama kwabo bakorenta nokw’obong’ainereria.”