ⅩⅣ
Ⅰ “Mwanyabaanto okoiborwa nomokuungu,
amatuko aye namake;
ayio aichire nemechando.
Ⅱ Ere nigo akororekana buna egesicha giasichire na giasira bwango,
nigo agoeta bwango buna omorengari, tari kogenderera kobao.
Ⅲ Inee! Aye nigo okorigereria omonto buna oyio?
Nigo okondeta ase obosio bwao na kongambia ekiina?
Ⅳ Ning’o oranyare korenta egento gechenegete korwa ase egetachenegeti?
Onde taiyo, nonya noyomo.
Ⅴ Omonto nigo abareire amatuko aye,
na omobaro bw’emetienyi yaye naye kwayochikire,
naende kwamobeekeire chimbebe atanyare goetania.
Ⅵ Tiga komorigereria, motige anyore obotoereru,
erinde agokere amatuko aye buna omonto orikire emeremo.
Ⅶ “Ogosemeria nkoreo ase omote,
ekero ogechirwe noseboke naende,
na emeseboko eyio tegosira.
Ⅷ Emeri y’omote oyio neisa kogota ime ase riroba,
na egetugi kiaye nkegote gesire ime ase riroba,
Ⅸ nonya naboigo, ekero embura eratwe,
nigo keraseboke na gosokia ebisabo buna ekemeri ekeyia.
Ⅹ Korende omonto nigo agokwa, bwarerigwa riroba inse;
omonto nigo agotiga koeyana, ng’ai agochia?
Ⅺ “Buna koreng’ana amaache e chinyancha agosira pi,
naboigo naye chindooche agokama chioma pa,
Ⅻ naboigo na Mwanyabaanto kararire, tagotenena naende;
tagoturwa goika ekero igoro na ense bitabeo;
tagotaboborwa korwa ase chitoro chiaye.
ⅩⅢ “Naki anga yaba buya, onye nkwambisa agwo aase abakuure;
onye kwandenda aase are bobisi, goika endamwamu yao ebe yaetire,
onye gwanchikera engaki na kong’inyora!
ⅩⅣ Inee! Omonto gakuure, nairane koba moyo naende?
Inche ase amatuko aane onsi inchikeire, nimbe nganyete,
goika ogosiborwa kwane goche.
ⅩⅤ Aye korandangerie, na inche ningoitabere,
ekiagera noganie emeremo y’amaboko ao.
ⅩⅥ Bono aye nigo okobara amatambokero aane,
gose tori korigereria ebibe biane.
ⅩⅦ Ogosaria kwane kware komumekerigwa egunia ime,
aye nigo kware gotuba ebibe biane.
ⅩⅧ “Buna egetunwa gekogwa na giasamunyokana,
na egetare giasukigwa korwa aase aye;
ⅩⅨ buna amaache agwata amagena asamunyokana,
ne chiooro chiaira amaroba aera,
naboigo aye ogosiria ogosemeria kwa Mwanyabaanto.
ⅩⅩ Aye nigo ogendererete kobua omonto,
na ere nigo agoeta osira,
nigo okoonchora ekieni kiaye kwamosiria.
ⅩⅪ Abana baye nigo bakoegwa ogosikwa,
korende ere tari komanya ayio;
nigo bakourwa ogosikwa kwabo na gokoigwa,
korende ere tari komanya ayio.
ⅩⅫ Ere nigo akoigwa obororo ase omobere oye,
na oba okona‐kwereera omonyene.”