ⅩⅢ
Ⅰ Naama! Amang’ana aya onsi nayarorire neriso riane,
nayaigure nogoto kwane, nayamanyire.
Ⅱ Aya momanyete, nainche ninyamanyete;
inwe timombueti kende.
Ⅲ Korende nigo nganetie nkwane n’Omonguru;
mbeke amang’ana aane ase Nyasae,
erinde ng’amereranie nere,
Ⅳ Korende inwe nabatongi oborimo,
inwe mwensi nabarwaria bare bosa, motari kogwenia.
Ⅴ Onye ndiria mware gokira‐kiri!
Okwo nanga nigo kwaba obong’aini bwaino.
Ⅵ Bono tegerera moigwe amang’ana ngwekwanera,
naende tegerera moigwe ogosorora gokorwa ase omonwa one.
Ⅶ Inee! Inwe nigo mokorwanerera Nyasae ase ogokwana oborimo?
Naende mokomorwanerera ase obong’ainereria?
Ⅷ Inee! Inwe nigo more nogwanchereria asare?
Nigo moganetie korwanerera Nyasae ase ekegambero?
Ⅸ Inee! Amang’ana nabe amaya ase more Omonene karabarenge abamanye buna more?
Gose mokagete ng’a nigo moramong’aine buna abanto bakong’ainana?
Ⅹ Ekeene ere nabatogonyere Onye mogokora ogwanchereria bobisi.
Ⅺ Inee! Obonene bwaye tibokobaboyia,
na okogosa kwaye kobaondokie?
Ⅻ Emereng’anio y’obong’aini bwaino nigo ere bosa buna ribu,
ne chiburi chiaino nigo chigiteire esike.
ⅩⅢ Inwe kira‐kiri, montige nkwane,
na kende gionsi kegochia konyora, tiga kenyore.
ⅩⅣ Nase ki ndabeeke enyama y’omobere one ase amaino aane?
Ting’egerereti obogima bwane.
ⅩⅤ Omonene naisa kong’ita, ningenderere komosemeria,
nonya nabo goika ndete amang’ana aane ase obosio bwaye.
ⅩⅥ Ayio nabe ogotooreka kwane
ng’a omonto otamoirogeti Nyasae tagocha ase obosio bwaye.
ⅩⅦ Tegerera onyigwe,
tiga ogotebereria kwane gosoe ase amato aino.
ⅩⅧ Rora, naroisirie amang’ana aane,
namanyire ng’a nimbarerwe oboronge.
ⅩⅨ Ning’o oreo ogochia koamererania nainche?
Onye oreo, rirorio inche nigo ndakire‐kiri inkwe.
ⅩⅩ Bono nigo ngokoboria onkorere ebinto bibere,
nario ntebise korwa ase obosio bwao:
ⅩⅪ Rusia okoboko kwao korwa ase ’nde,
na okogosa kwao tikogenderera konyoboyia.
ⅩⅫ Erio aye ondangerie, na inche ng’itabe, gose ing’a ribaga nkwane, naye ong’iranerie.
ⅩⅩⅢ Amamocho aane, na ebibe biane, mbirenga bire?
Imanyie ogosaria kwane, na ebibe biane.
ⅩⅩⅣ Nase ki okobisa obosio bwao na
kombara ng’a nomobisa oo inde?
ⅩⅩⅤ Inee! Nigo orasegenyie rito eriomo rikona‐koirwa nembeo?
Gose aye nigo ogochia gotunya omoiriro korwa magega?
ⅩⅩⅥ Ekiagera gwanchikeire amang’ana ’obororo,
naende kwang’akanire amabe ’obosae bwane.
ⅩⅩⅦ Aye gwasoirie amagoro aane ase rikorogoto,
nigo origereretie orogendo rwane rwonsi;
aye kwabeekire orobebe ase chimbaratero chiane chigotacha.
ⅩⅩⅧ Omonto nigo agosira oruao buna egento ekegundo,
na buna eanga yarirwe nebigwankwa.