Ⅻ
Ayubu
Ⅰ Erio Ayubu akairaneria, akabora:
Ⅱ Ekeene, inwe ninwe abanto bori,
ekero morakwe, obong’aini nigo borasire.
Ⅲ Korende nainche nabo inde nokomanya buna inwe,
gose timombueti.
Ning’o otamanyeti amang’ana buna ayio?
Ⅳ Abasani baane nigo bagonchecheria, inche oyo narenge korangeria Nyasae,
na ere akaba okong’iraneria,
inche omonyaboronge ntari na komocha,
bono nigo ngochecherigwa.
Ⅴ Omonto otari na mechando ende, nigo agochaaya emechando,
nigo are ang’e gotindachera inse abwo batererigwe.
Ⅵ Chinka chi’abauri nigo chigendererete koba nomorembe,
na abwo bagechete Nyasae nigo barendire buya,
na enyasae yabo nigo ere ase amaboko abo.
Ⅶ Bono boria ching’iti, nchikworokererie;
boria chinyoni chia igoro chigoteebie amang’ana;
Ⅷ gose kwana ne riroba, ndikworokererie,
ne chinswe chia nyancha, nchikoraarerie.
Ⅸ Ning’o otamanyeti amang’ana aya onsi
ng’a okoboko kw’Omonene nakwo gwakorire aya?
Ⅹ Obogima bwa kera egetongwa kere moyo
na omoika o Mwanyabaanto, nigo bire ase okoboko kwaye.
Ⅺ Inee! Amang’ana ogoto gokoigwa, tikori koyateema
buna oromeme rokomena rwaigwa endagera?
Ⅻ Obong’aini nigo bore ase abanto abanene,
na okomenya emiaka emenge nakwo okomanya.
ⅩⅢ Korende Nyasae nigo are nobong’aini na okobua,
boigo nare nogosemia na obomanyi.
ⅩⅣ Ere aise gotagora, onde tari oraagache naende;
aise gosiekera omonto, onde tari oramoigorere.
ⅩⅤ Aise gotanga amaache, ense igo erome pa,
na ekero akoyarenta nigo akoonchorana ense.
ⅩⅥ Chinguru na obong’aini nigo bikorwa asare.
Abwo bakong’aineka na abakong’ainereria nigo bare ase okoboko kwaye.
ⅩⅦ Omonene nigo akoombogania abare abasemia obatiga getirianda,
nigo agokora abagaambi ebiina baba abariri.
ⅩⅧ Nigo agosibora chinkini chi’abarwoti,
erio obaboyia ebibarachi.
ⅩⅨ Ere nigo akoombogania abakuani,
obatiga getirianda,
na oonchorana abanto bare nokobua.
ⅩⅩ Abanto abwo basemeirie nigo akobaura amang’ana bagokwana,
na oura abanto abagotu ogosemia.
ⅩⅪ Omonene nigo akorentera abagaambi ogochaywa,
na abanto bare nokobua nigo akobaura chinguru.
ⅩⅫ Ere nigo akoorokia obobisi ase omosunte,
erio okora obobisi boria bore ase omosunte bwaba oborabu.
ⅩⅩⅢ Nigo agokinia ebisaku, naende obisiria;
nigo akobikora biabucha, naende obing’anyia.
ⅩⅩⅣ Ere nigo akorusia obong’aini ase abatang’ani b’abaanto bare ase ense,
erio obatiga bakoombogana erooro bosa.
ⅩⅩⅤ Abanto abwo nigo bagotaba‐taba ase omosunte borabu botaiyo,
na ogera baong’anya buna omonto otindire.