Ⅺ
Sofari
Ⅰ Erio Sofari Omonaama agakwana, akabora:
Ⅱ “Inee! Amang’ana aya amange natigwe tairanerigwa?
Na omonto obwate amang’ana amange buna iga nabarerwe oboronge?
Ⅲ Inee! Amang’ana ao atari nengencho nagere abanto bakire‐kiri?
Na ekero ogokwana amang’ana ay’ogochecheria, monto onde takogosookia?
Ⅳ Aye nigo ogoteeba ng’a amang’ana ogokwana nay’ekeene,
naende ng’a nigo ochenegete ase amaiso a Nyasae.
Ⅴ Korende onye ndiria Nyasae are gokwana
na akoorokie buna ore,
Ⅵ erinde akomaanorere orore obobisi bw’obong’aini!
Ere nigo abwate obomanyi botari korengeka.
Ase ayio manya ng’a nigo akoeire egesusuro egeke,
tari buna okomocha kwao kogwenerete.
Ⅶ “Inee! Nonyare komanya ebinto bia Nyasae bibisekanete?
Nonyare komanya oboikeranu bw’Omonguru?
Ⅷ Onye bore obonene gochia igoro, inki oranyare gokora?
Onye bore obotambe inse gochia aase abakuure, inki oranyare komanya?
Ⅸ Obotambe bwaye nigo boetanetie obw’ense,
na obogare bwaye mboetanetie obw’enyancha.
Ⅹ Karaete asibe abanto,
gose kobagambia, ning’o oramotange?
Ⅺ Ere nigo amanyete abanto batagwenereti.
Ekero akorora amabe agokorwa,
Inee, takorengereria igoro y’ayio?
Ⅻ Onye omoriri okonyara koba omong’aini,
rirorio emori y’etigere y’orosana nenyare koiborwa ebe omonto.
ⅩⅢ “Oise kwebeeka ang’e ase enkoro yao gokora amaronge,
na orambore amaboko ao gochia ase Nyasae;
ⅩⅣ onye kogotuguta ebibe bire ase amaboko ao,
na togotiga obobe bomenye ase eema yao,
ⅩⅤ amaene, rirorio norigererie otari na komocha,
naende norendwe buya tokoba nobwoba.
ⅩⅥ Nigo orebe emechando yao,
buna amaache aetire, takoinyorwa naende.
ⅩⅦ Na obogima bwao nigo borarabe se kobua erioba ria mobaso gati;
omosunte oye nigo oraonchoke obe buna ekero bogokia mambia.
ⅩⅧ Aye nomenye kore noboremu, ekiagera ogosemeria nkoreo;
norendwe na gotimoka ase obotoereru.
ⅩⅨ Ekero okorara, monto onde tagokwoboyia;
abanto abange mbache asore bagosorore ng’a banyore ogwancherwa.
ⅩⅩ Korende abakori amabe mbabe bakouna‐una ase omosunte, tibakorora omobaso.
Tibagotooreka nonya ng’ake;
ogosemeria kwabo ngosire pi.”