Ⅹ
Ⅰ “Omoyo one ogechire obogima bwane;
nimbe nobosibore gokwana na kwemurungania,
ninkwane nobororo bore ase omoyo one.
Ⅱ Ninkwane, nteebie Nyasae: Tobaisa kongambia;
imanyie egekogera aye okondwania iga.
Ⅲ Inee! Nigo ogokirie ase ogonchanda
na gochaaya emeremo y’amaboko ao,
na gwanchera ogosemania kw’abakori amabe?
Ⅳ Inee! Amaiso ao naya Mwanyabaanto are?
Gose nigo okorora buna Mwanyabaanto akorora?
Ⅴ Inee! Amatuko ao nabo ang’ana buna aya Mwanyabaanto,
gose emiaka yao buna ey’omonto,
Ⅵ goika okona‐gotuka okomocha kwane
na korigia ebibe biane?
Ⅶ Nonya nabo nomanyete ng’a inche tindi nokomocha,
na onde tari orantoorie korwa ase okoboko kwao?
Ⅷ “Amaboko ao naro ambombete, akandoisia;
na bono kwang’onchokeire na gonsiria.
Ⅸ Inyora ng’a naye kwambombete buna esike.
Inee! Nigo okong’irania imbe orotu naende?
Ⅹ Inee! Tari aye kwang’umorete buna amabeere,
na okambomba buna ekerimu kiabwatanire?
Ⅺ Aye okaboyia omobere one risankwa okayobekera chinyama,
okayobwatania namauga na emekia.
Ⅻ Aye kwang’eire obogima na konyorokia obwanchani bwao botari koera;
na oborendi bwao nigo borendete omoika one.
ⅩⅢ Nonya nabo nigo obisete amang’ana ayio ase enkoro yao,
nimanyete ng’a oko nakwo kwarenge okogania kwao.
ⅩⅣ Inse gokora ebibe, aye nigo ondigereretie,
na totiga kong’a egesusuro ase engencho y’ebibe biane.
ⅩⅤ Obobe nobwane onye inde omokori amabe;
na onye inde omonyaboronge tinkonyara gwetogia;
nigo ing’ichire nobosooku,
ase ayio aye origererie emechando yane.
ⅩⅥ Kondaimokererie omotwe one igoro,
aye nigo okondigia buna endo egotwara orotwari,
erinde ogenderere koorokia amakumia ao igoro yane.
ⅩⅦ Aye nigo okomenta oborori bwao igoro yane,
na kwamentera ekeririanda igoro yane.
Nigo okona‐kondetera ababisa bakondwania.
ⅩⅧ “Nase ki kwandusetie ase enda ya baba?
Naki anga yare koba buya onye nakwete ekero monto onde atarandora,
ⅩⅨ imbe buna tinarengeo,
anga nigo narusetigwe ase enda ya baba ntindekwe.
ⅩⅩ Inee! Amatuko y’obogima bwane tari amake?
Intige, imbe n’obotoereru ase engaki eye enke,
ⅩⅪ ekero ntaragenda aase ntanyare koirana korwao rinde,
ense eria y’omosunte ekerima na ey’ekiriri ki’amakweri,
ⅩⅫ ense emwamu ti buna omosunte ekerima;
naende ey’ekiriri ki’amakweri na obotantanu,
agwo oborabu bwaye bore obomwamu ti buna obw’obotuko gati.”