Ⅸ
Ayubu
Ⅰ Erio Ayubu akairaneria, akabora:
Ⅱ Ekeene, namanyire ng’a ayio nabo are,
korende naki omonto aranyare koba omonyaboronge ase obosio bwa Nyasae?
Ⅲ Omonene karaamereranie nomonto amang’ana elifu eyemo,
omonto takonyara komoiraneria nonya nerimo.
Ⅳ Omonene nigo are nobong’aini ase enkoro yaye, na omonyene chinguru,
monto ki oratoorigwe onye takomoigwera?
Ⅴ Ekero Omonene akoba nendamwamu nigo akoonchorana ebitunwa,
obitigeria korwa aase abo, na abanto tibari komanya ayio.
Ⅵ Nigo agotengechia ense yarwa aase aye,
erio chintenenero chiaye chianyegerigwa.
Ⅶ Nigo agochika erioba tirigosoka;
ne ching’enang’eni ochibeeka ekemanyererio.
Ⅷ Nere bweka oramborete igoro chionsi, agachiaara,
nere ogotaara igoro ase emerindo y’enyancha.
Ⅸ Nyasae nere otongete ching’enang’eni chia igoro Edubu.
Orioni,
boigo neching’enang’eni chiinde chikorokwa Abaiseke batano na babere bamwabo,
boigo na Amakundia a Irianyi.
Ⅹ Nigo agokora amang’ana amanene aetanetie obomanyi bwonsi,
na amakumia amange atari kobareka.
Ⅺ Rora! Ere nigo akong’ika ang’e oeta, tinkomoorora;
nigo akong’etania, tinkomomanyereria.
Ⅻ Ere nigo akoira eki aganetie.
Ning’o oranyare komotanga?
Ning’o oranyare komobooria ng’a ninki ekio agokora?
ⅩⅢ Nyasae tari gotigeria endamwamu yaye,
abanto abagokonya Rahabu,
nigo bagotung’ama inse asare baumama.
ⅩⅣ Naki rende ndakore imanye gochora amang’ana agwenerete,
erinde inyare koiraneria Omonene.
ⅩⅤ Nonya inche nare koba tindi nokomocha, tinarenge komoiraneria;
nigo narenge gosaba amaabera korwa ase omonsoeri.
ⅩⅥ Onye narenge komorangeria, na ere ang’itabere,
rirorio tinarenge kwegena ng’a nategererete eriogi riane.
ⅩⅦ Ere ong’akire nomwaga ore nomoubera,
na omentire amaote aane ngencho ende etaiyo.
ⅩⅧ Tang’eti ribaga nkoeyanera,
korende omenteire obororo obonge mono.
ⅩⅨ Onye namang’ana e chinguru, rora ere nigo are ne chinguru.
Onye igoro y’oboronge, monto ki oranyare koamererania nere?
ⅩⅩ Nonya nare koba omonyaboronge,
amang’ana ngokwana nigo are kongambia;
nonya nare koba ng’a tindi na komocha,
aya nigo are kombera kirori ng’a nomokori amabe inde.
ⅩⅪ Inche tindi na komocha.
Tinyemanyeti;
tinkobara obogima bwane ng’a negento.
ⅩⅫ Mang’ana taiyo. Ase ayio nigo ngoteeba:
Ere nigo agosiria omonyaboronge na omokori amabe amo.
ⅩⅩⅢ Ekero ebiku bikorenta amakweri a mobosokano,
na abanto batari na komocha banyorwe namaakwa,
ere nigo akobachecheria.
ⅩⅩⅣ Ense nigo ebeekire inse y’amaboko ’abakori amabe,
Nyasae otubire amasio ’abagaambi ebiina.
Onye tari ere, ning’o rende okorire ayio?
ⅩⅩⅤ Amatuko aane nigo agoeta bwango kobua omominyoki okominyoka;
nigo akoera bwango, tari korora maya ande.
ⅩⅩⅥ Ee, nigo agoeta bwango buna obwato obonyerere bw’ebirigisa,
buna ensoti egotaboria ebiekoria biaye.
ⅩⅩⅦ Inse goteeba ng’a nyebe ogwechanda kwane,
na ntige omoichano one inyeremie,
ⅩⅩⅧ nigo ndabe nobwoba igoro y’emechando yane yonsi,
ekiagera nimanyete ng’a aye goika ombare ng’a nomomochi inde.
ⅩⅩⅨ Inche goika mbarwe ng’a nomokori amabe inde.
Nase ki rende ngwechanda nemeremo ere bosa?
ⅩⅩⅩ Ninsa gwesibia namaache arabete buna amagena ’embura,
na goisaba nesabuni,
ⅩⅩⅪ nigo orantugute ime ase engoro,
ne chianga chiane chigechigwe ase engencho yane.
ⅩⅩⅫ Nyasae tari omonto buna inche, erinde imoiranerie,
na ngende nere ase ekegambero.
ⅩⅩⅩⅢ Monto onde tari orabe omogayani oito,
oyio oratogambie inche nere.
ⅩⅩⅩⅣ Tiga ere arusie enyimbo yaye korwa ase ’nde;
okogosa kwaye tikobaisa kong’ondokia.
ⅩⅩⅩⅤ Erio inyare gokwana ntari nobwoba ase engencho yaye,
nimanyete ng’a tindi nokomocha.