Ⅷ
Bilidadi
Ⅰ Erio Bilidadi Omosua akairaneria, akabora:
Ⅱ “Ngoika ririri orabe kogokwana amang’ana aya,
na amang’ana ’omonwa oo abe buna omwaga omonene?
Ⅲ Inee! Nyasae nanyare koonchorana ekeene?
Gose Omonguru naonchorane ayare ay’oboronge?
Ⅳ Onye abana bao bakorete ebibe asare,
ere obaeire egesusuro ase engencho y’okomocha kwabo.
Ⅴ Korende aye korarigie Nyasae
na gosaba ase oboitongo ase ere Omonyanguru,
Ⅵ korabe oyochenegete na ore nenkoro endonge,
ekeene, rirorio ere nagochandekere,
nakoroiserie obomenyo, na oboronge bogenderere kobao.
Ⅶ Eki kwabwate ritang’ani kerorekane kere egeke,
koreng’anigwa neki oramenterwe magega.
Ⅷ “Korende boria omanye ay’ebigori bia kare,
bweigwere aya chisokoro chiao chianyorete.
Ⅸ Intwe nigo tonga buna abaiborwa igoro totamanyeti kende,
naki amatuko aito tomenyete ase ense nigo anga buna omorengari ogosira.
Ⅹ Inee! Amang’ana ’obong’aini chisokoro chiria chiakwanete,
takonyara gokworokereria, erinde bwegere?
Ⅺ “Inee! Amauncho nanyare komera ase entente etari?
Gose ebitonto nabimere ase amaache atari?
Ⅻ Ekero bigendererete gosicha, engaki y’okobitema etaraika,
nigo birasusane bitige ebimeri binde.
ⅩⅢ Naboigo nabaanto bonsi abebire Nyasae bakoba,
ogosemeria kw’omonto otamoirogeti Nyasae nagosire.
ⅩⅣ Aya asemeretie nasirigwe kegima,
na aya egenete nigo are buna enyomba y’oronyambobe.
ⅩⅤ Ere nigo agwesiirera ase enyomba yaye,
korende tekogenderera gotenena,
nigo ayesemeretie, korende tekogenderera kobao.
ⅩⅥ “Nabo akoreereta buna ekemeri kere ase omobaso,
ekio gekoranda ase omogondo bwonsi;
ⅩⅦ emeri yaye nigo egwesiserania ase etui y’amagena;
buna eyekwemigereria ase egati y’amagena y’egetare.
ⅩⅧ Geise gosirigwa korwa aase aye,
aase aria nigo aragekanie ng’a tana gokerora.
ⅩⅨ Ee, oyio noro omogooko ere abwate ase obogima bwaye,
naende abande mbache babe ase ribaga riaye.
ⅩⅩ “Rora, Nyasae takonyara kwanga na gotiga omonto omoikeranu;
gose tagokonya abakori amabe.
ⅩⅪ Ekeene, nagoichorie namaseko,
na omonwa oo otere nomochengo.
ⅩⅫ Abanto abakogechete mbarenterwe obosooku,
na obomenyo bw’abakori amabe tibokogenderera kobao.”