Ⅶ
Ⅰ “Ekero omonto are ase ense,
nigo abwate obogima buna obw’oyokorwana esegi.
Amatuko y’obogima bwaye nigo anga buna ay’omorikwa emeremo.
Ⅱ Buna koreng’ana omosomba akogania anyore aase agokenderera,
na buna koreng’ana omonto orikire emeremo akogania aegwe eng’eria yaye,
Ⅲ naboigo nainche ngendererete koba nobobe omotienyi ase omotienyi,
na obotuko ase obotuko nigo inde ase emechando.
Ⅳ Ekero nararire nigo nkobooria: Indi bogocha gokia mboke?
Obotuko bwatambeire mono.
Agwo naba nkona‐kweonchaonchora bokia goika mambia.
Ⅴ Amakonde ne riko biatubire omobere one;
omobere one nigo okona‐gosaboka amasabo,
erio otandoka, na obogundo bwaruao.
Ⅵ Amatuko ’obogima bwane nigo agoeta bwango kobua egekorero gi’okoroisia egetambaa,
nigo akoera ntabwati gosemeria konde.
Ⅶ “Manya ng’a obogima bwane nigo bore buna embeo bosa;
amaiso aane takorora amaya naende.
Ⅷ Omonto ondoche bono takondora naende nonya ng’ake,
bono aye nondoche, korende bwango nimbe tindio.
Ⅸ Buna koreng’ana riire rigokubakubana riasira,
naboigo noyokogenda aase abakuure atakoirana korwao.
Ⅹ Oyio takoirana gocha mwaye,
na aase aye taakomonyoora naende.
Ⅺ Ase ayio, tinkonyara gokira tinkwana,
nimbe ngokwana emechando y’omoyo one
na kwemurungania nobororo ase omoyo one.
Ⅻ “Nase ki obegete oborendi igoro yane?
Inche nenyancha inde, gose neng’iti enene mono ya nyancha?
ⅩⅢ Ekero nkorengereria ng’a oborere bwane mbonyare kondemia,
na ebirengererio biane mbinyare gonkeaneria obororo bwane,
ⅩⅣ erio aye nigo okongosa ase ogontomera chindoto
na kong’a obwoba goetera ase amaroro.
ⅩⅤ Ase igo nachorire ng’a ng’entwe inkwe,
ekiagera amakweri namaya kobua obororo bore ase omobere one.
ⅩⅥ Nagechire obogima bwane; tinganeti kogenderera koba moyo.
Takondosia namange; amatuko aane nigo are buna embeo bosa.
ⅩⅦ “Inee! Omonto ninki aisaine,
goika okomokora koba oyo bw’engencho enene,
naende oba komorengereretie mono?
ⅩⅧ Nigo okomorigereria kera emambia,
naende nigo okomorenga kera engaki.
ⅩⅨ Inee! Nengaki eng’ana naki ogochia koba gokona‐kondigereria?
Naki otagontiga, erinde inyore obosibore imere amate?
ⅩⅩ Aye omorigereria bw’abaanto, onye ngokora ebibe, ninki nagokoreire?
Nase ki gwankorire nabeire ekerenga kiao?
Nase ki nabeire buna egurube endito asore?
ⅩⅪ Nase ki otakonyabera ogosaria kwane,
erinde otige ebibe biane kegima?
Bono inche nkogenda inde korara ime ye riroba;
aye nigo orabe gokondigia, korende tokonyora aande.”