Ⅵ
Ayubu
Ⅰ Erio Ayubu akairaneria, agateeba:
Ⅱ Onye ndiria obororo bwane bwarenge korengwa,
na emechando yane yonsi ebeekwe ase ekerengo erengwe!
Ⅲ Ebio nigo biare ebirito kobua omokenye ore ase enyancha;
ase ayio nabeire omwango ase ogokwana ayio.
Ⅳ Nyasae Omonguru ombetire chinsara chiaye,
na omoika one ong’usire obosongo bwabo;
okogosa kwa Nyasae kwarobeire kondwania.
Ⅴ Inee! Etigere y’orosana nkwana ere, ekero egotakuna obonyansi?
Gose eng’ombe nkwana ere, ekero egendererete korisia?
Ⅵ Onye endagera tebekiri omonyoo okoyiansia, neriegwe?
Inee! Omochununu bwe rigena ri’engoko nobwate obwansu?
Ⅶ Chindagera echio omoyo one ochiangire,
chiabeire chindagera chikongechia.
Ⅷ Naki nanga yaba buya onye nanyora aya nkobooria,
onye Nyasae nanchera aya nganetie!
Ⅸ Nigo nganetie Nyasae anche ang’ake ansegenye,
arambore okoboko kwaye ang’ite nkwe!
Ⅹ Ayio nigo are kogera ndemigwe;
nigo narenge kogoka ntari koigwa obororo bw’okoromwa oko okonene.
Ekiagera tinkaneti amang’ana a Nyasae ore Omochenu.
Ⅺ Chinguru chiane inki chiisaine imbe nokoganya kore nogosemeria?
Na omoerio one naki ogochia koba, ngenderere koremereria?
Ⅻ Inee! Chinguru chiane nigo chire chinkong’u buna echi’amagena?
Gose omobere one nigo ore omokong’u buna etai?
ⅩⅢ Ekeene gokonywa konde gwonsi tikori ime yane,
amagenderero nabwate naurirwe.
ⅩⅣ Oyotakororera omosani oye amaabera oyio, rirorio otigire koiroka Omobui.
ⅩⅤ Abaminto bakorire obong’ainereria babeire buna chintuboka chi’amaache,
na buna chiooro chi’emegoko chigoeta chiaera.
ⅩⅥ Barabwo nigo banga buna chindooche chiamerire amaache ’obokendu abwataine,
na amagena ’embura are imeo.
ⅩⅦ Ekero ki’omobaso chiasunkera chiakea;
na omorakera ogocha chiasira kegima korwa aase abo.
ⅩⅧ Abagendi babwate chitugo chiabo nigo bakogobera korigia amaache,
tibakoyanyora; ase igo bakwera ase erooro.
ⅩⅨ Abagendi ba Tema nigo bakoriga‐rigia amaache,
naboigo abaonchoreria ba Seba basemeria koyanyora.
ⅩⅩ Abwo nigo bagoichana, ekiagera tibanyorete eki basemeretie;
ekero bachete aase agwo, bakanyora ng’a nigo bang’ainetwe.
ⅩⅪ Nabogio nainwe mwabeire ase ’nde buna chintuboka chiria;
mwarorire emechando yane, mwakumirie na kwoboa.
ⅩⅫ Inee! Inche nateebirie onde ng’a andetere ekeegwa?
Gose naboririe onde ng’a arue embooria korwa ase chinibo chiaye?
ⅩⅩⅢ Gose nateebirie onde ng’a antoorie korwa ase okoboko kw’omobisa one?
Gose nateebirie onde ng’a amboorie korwa ase amaboko ’abachandi baane?
ⅩⅩⅣ Inyorokererie, na inche ninkire‐kiri
imanyie amamocho nakorire.
ⅩⅩⅤ Naki amang’ana ’ekeene agwansa!
Korende amang’ana ayio aino ay’obong’ainereria, inki agokonya?
ⅩⅩⅥ Inee! Nigo mokorengereria ng’a amang’ana ’omonto bwerusirie moyo nigo anga buna omwaga?
ⅩⅩⅦ Onye naboigo, rirorio monyare goaka obomera igoro ye chintakana,
monyare gokorera abasani baino amagori amake ase okobaoonia.
ⅩⅩⅧ Bono, komoranche mondigererie;
ninde nobomaene kegima, tingokwana oborimo ase more.
ⅩⅩⅨ Nabasoroire, irana, timobaisa gokora ing’ana rinde riibe.
Bono irana naende, ekiagera ring’ana riane neri’oboronge.
ⅩⅩⅩ Inee! Amang’ana aane ngokwana nay’oborimo?
Inee! Tinkonyara gokwana inyatanane ayare amabe?