Ⅴ
Ⅰ Bono rangeria! Inee! Onde nareo oragoitabere?
Ase abwo abachenu, ning’o oraonchokere?
Ⅱ Ekeene, ogwechanda nigo kogoita omoriri,
na emoko nigo egoita oyo otari omong’aini.
Ⅲ Nabeire nkorora omonto omoriri okogenderera bokong’u,
korende mobosokano nkaragereria enka yaye.
Ⅳ Abana baye tibakonyora ogokonywa,
nigo bakomionogorerwa geita,
gose monto onde tari okobatooria.
Ⅴ Abanto bare nenchara nabwo bakoria endagera eye omonto oria akogesa,
abwo nigo bakoyerusia nonya egiteire namagwa;
abasaneri nigo bagosanera obotenenku bwaye.
Ⅵ Obobe tibori korwa ase riroba,
gose emechando teri komera korwa inse ase riroba,
Ⅶ korende Mwanyabaanto nigo akoiborwa ase okonyora emechando,
buna chinsase chi’omorero chigotaroka gochia igoro.
Ⅷ Yare koba ng’a ninche nanga nigo narigia Nyasae,
nere bweka nare goteebia amang’ana aane.
Ⅸ Nyasae nigo agokora amang’ana amanene atari komanyekana buna are,
boigo namakumia atanyare kobareka.
Ⅹ Nigo akorua embura yatwa igoro ase ense,
na emegondo yanyora amaache.
Ⅺ Ere nigo akoimokereria abanto abaitongo igoro,
na abwo bachandegete bakorera, nigo akobabeka ase oborendi obuya.
Ⅻ Nyasae nigo agosaria emeroberio y’abang’ainereria,
erinde emeremo bagokora namaboko abo tegoikerana buna baganetie.
ⅩⅢ Ere nigo akobwata abare nobong’aini ase obong’ainereria bwabo,
emeroberio yabo y’ogotega nigo egosirigwa bwango.
ⅩⅣ Abanto abwo nigo bakobwatwa nomosunte mobaso gati,
bataba‐taba mobaso gati buna nobotuko bore.
ⅩⅤ Korende Nyasae nigo agotooria abataka korwa ase emenwa egoita,
na abaremeire korwa ase abwo bare ne chinguru.
ⅩⅥ Ase ayio abaremerwa mbabe nogosemeria,
korende abakori amabe nigo barakirigwe‐kiri.
ⅩⅦ Nasesenirie omonto oyio Nyasae akoa egesusuro ase okomoorongeyia;
ase ayio tobaisa gochaaya ogoaka, gw’okorongeyia kw’oyore Omonguru.
ⅩⅧ Ere nigo akorenta amaote, naende oyaboa;
ere nigo agoaka chingoma, naende okoboko kwaye kwagwenia.
ⅩⅨ Ere nagotoorie korwa ase emechando etano nomo,
ee, nonya nkorwa ase etano na ebere, na amabe tagokonyora.
ⅩⅩ Ekero ki’enchara nagotoorie korwa ase amakweri,
na ekero gi’esegi korwa ase abwo bagoita nemioro.
ⅩⅪ Ekero abanto bakogokwana bobe nobiswe,
na ekero amabe agoita arache, toyoboa.
ⅩⅫ Ekero ogosiria na enchara birache, aye nobe gokobisekerera,
gose tokwoboa ching’iti chintindi chire ase ense.
ⅩⅩⅢ Nonya namagena are mogondo, nobwatane naro,
ne ching’iti chi’orosana nobe nomorembe nachirochio.
ⅩⅩⅣ Erio nonyare korora ng’a obomenyo bwao mborendire buya,
na ekero orabe gokorata ase ameri e chitugo chiao,
nonyore ng’a ende tesireti korwao.
ⅩⅩⅤ Norore buna abana bao babeire abange,
na ororeria rwao ndobuche robe oronge buna obonyansi bore ase ense.
ⅩⅩⅥ Nogende ase embeera kore nobogotu obuya,
buna emesaima y’endagera ekorentwa ekero engaki yabo yaikire.
ⅩⅩⅦ “Naama! Twabeire togokora obotuki ase amang’ana ayio;
naro nay’ekeene.
Ase ayio bono igwa amang’ana ayio,
oyagache ase omoyo oo.”