Chinkwana chi’eritang’ani ase egati y’Ayubu na abasani baye
Ⅳ
(4:1—14:22)
Ogokwana kw’Eritang’ani
Elifasi
Ⅰ Bono Elifasi Omotemani akairaneria, akabora:
Ⅱ Inee! Omonto arateema gokwana naye, nogechigwe nere?
Nonya naboigo, monto ki oranyare gokira‐kiri takwana?
Ⅲ Rora, aye kworokereirie abanto abange,
na amaboko atabwate chinguru kwayakong’irie.
Ⅳ Amang’ana ao abeire akoremia oyo konya osinyirwe kogenderera,
na aye gwakong’irie amaru aye arenge koiguswa.
Ⅴ Bono naye emechando yacheire, na tori noboremu bonde bwonsi,
yagokunire na aye kwegosire.
Ⅵ Aye buna omoirogete Nyasae, tori noboremu?
Naende buna chinchera chiao chire chindonge, tori nogosemeria?
Ⅶ Bono rengereria, indi yabeete ng’a omonto omoikeranu nasiretigwe?
Naende indi yabeete ng’a abanto abaronge mbatugutetwe?
Ⅷ Aya naroche naya: Baria bakorema obosareku,
na baria bagosimeka emechando, nabagese ayio ayio.
Ⅸ Nyasae nigo akobaeyanera basira,
na ase okogusa kw’endamwamu yaye baerigwa.
Ⅹ Nonya bakoruma buna endo ere entindi, bakirigwe,
na amaino e chindo chinsae nigo akobunwa.
Ⅺ Endo engotu nekwe ase okoborwa chinyama ekoria.
Ne chimanwa chi’endo eaberi nigo chigosererebekana.
Ⅻ Ring’ana ndire rianchicherete bobisi,
nigo nariigwete rikomonyerera.
ⅩⅢ Ekero abanto bararire chitoro chindito
na inche narenge nebirengererio na korora amaroro,
ⅩⅣ obwoba bokambwata amo nokoiguswa,
na amauga onsi ay’omobere one agachaaka gotengechigwa.
ⅩⅤ Embeo egaeta ase obosio bwane,
na amarionya ’omobere one agatenena.
ⅩⅥ Omogwekano bw’egento gete ogatenena ase obosio bwane,
korende tinanyarete komanya ng’a ngento ki gose nkieni ki;
erio nkaigwa eriogi eriororo rigoteeba:
ⅩⅦ Inee! Mwanyabaanto nanyare koba omooronge kobua Nyasae?
Nanyare koba oyochenegete kobua Omotongi oye?
ⅩⅧ Rora, Nyasae tari gosemeria nonya nabasomba baye;
ere nigo akobabeekeera abamalaika baye obobe.
ⅩⅨ Onye naboigo, naki rende arasemerie abwo bamenyete ase chinyomba chi’amaroba,
abwo amaroso abo abekire ase riroba?
Barabwo nigo bagoakwa na komionogorwa buna ebigwankwa.
ⅩⅩ Abanto nabo baranyare koba moyo ase engaki ya mambia,
korende omogoroba otaraika, kwanyora baitirwe,
basirire goika kare na kare,
na onde tari okobechandera.
ⅩⅪ Bionsi ebi’abaanto abwo basemeretie nigo bigosira kegima.
Nigo bagokwa bataraikera komanya obong’aini bonde bwonsi.