Ⅲ
Ayubu okwemurunganeria Nyasae
Ⅰ Nyuma y’amang’ana ayio onsi Ayubu agachaaka gokwana, akaragereria rituko riria aiboretwe.
Ⅱ Ayubu agateeba,
Ⅲ Rituko riria naiboretwe, tiga risire riebwe kegima,
boigo obotuko boria amang’ana aya akwanetwe:
Omwana omoisia otongirwe enda ime.
Ⅳ Tiga rituko riria ribe omosunte;
Nyasae ore igoro tabaisa koriechandera,
gose omobaso tobaisa koribarera.
Ⅴ Tiga omosunte na ekiriri ekemwamu biritube.
Tiga amare aritube,
na kende gionsi egekorenta obomwamu ase rituko kerioboyie.
Ⅵ Omosunte ekerima otube obotuko boria,
tibobaisa kobarwa amo namatuko ande ay’omwaka,
gose kobarwa amo namatuko ande ay’emetienyi.
Ⅶ Ee, obotuko boria tiga bogombae;
eriogi ri’omogooko tiribaisa koigugwa ase borobwo.
Ⅷ Boragererigwe nabwo bamanyete koragereria amatuko,
abwo baganyete korenta Leviatani eng’iti enene y’okwoboyia.
Ⅸ Ching’enang’eni chiaye chia ituko ria mambia chibe omosunte;
obotuko tiga bochie koganya ng’a bokie, korende tibokia rinde,
gose tibobaisa korora ogokiamoka kwa mambia,
Ⅹ ekiagera borobwo tibwatangete baba tanyibora,
gose tibwatangete emechando korwa ase amaiso aane.
Ⅺ Ninki kiagerete tinakwera inda ya baba?
Ninki kiagerete tinakwa ekero keria nasogete korwao?
Ⅻ Ninki kiagerete baba akaang’agata?
Ninki kiagerete akangonkia amabeere aye?
ⅩⅢ Onye nakwete, anga nindaire ntoererete,
anga nindaire chitoro ntimogete,
ⅩⅣ buna abarwoti b’ense amo nabasemia babo bakaraire,
abwo beagacherete amaagacho ’obosareku.
ⅩⅤ Inche anga nigo inde buna abanene batenengete ne chitaabu,
baichoretie chinyomba chiabo ne chifeta.
ⅩⅥ Nigo nanga nabeete buna enda erekeire egatindekwa,
na buna abana bataroche omobaso.
ⅩⅦ Aroro agwo abakori amabe tibari gochanda abande,
boigo abarosire kobaikire aroro, nigo bagotimoka.
ⅩⅧ Ekero abasibwa baikire aroro, nigo bakoba bagotimoka amo,
tibari koigwa amariogi y’abarendi babo bakobabetereria nobotindi.
ⅩⅨ Abanto batasikiri na abasikire nigo bareng’anetie aroro;
omosomba nigo are omosibore korwa ase oyorenge omonene oye.
ⅩⅩ “Nase ki oyochandegete akoegwa korora omobaso?
Nase ki oria obwate obororo ase enkoro akoegwa obogima?
ⅩⅪ Abwo baganyete amakweri, korende tibari koyanyora;
nigo bakoyarigia kobua korigia chinibo chibisire.
ⅩⅫ Abanto abwo bakogoka mono na gochenga,
ee, nabo bakogoka kobabeire ang’e kogenda ase chimbeera na gotubererwa.
ⅩⅩⅢ Nase ki omobaso oorokire ase omonto chinchera chiaye chibisire,
oyio Nyasae agiteire chinsemo chionsi?
ⅩⅩⅣ Obororo bw’emechando yane bwabeire buna endagera nkoria,
na ebirero biane nigo bigoiteka buna amaache.
ⅩⅩⅤ Naki ring’ana riria inyoboete rianchicheire,
na riria rikoondokia rianyorire.
ⅩⅩⅥ Inche timbwati omorembe gose botoereru bonde;
timbwati ogotimoka, korende emechando nigo egendererete konagocha.”