ⅩⅩⅢ
Ayubu
Ⅰ Ayubu akairaneria, akabora,
Ⅱ Nonya ngoika reero okwemurungania kwane nigo kore okororo se;
ogoakwa kwane nigo kore okorito kobua okweng’ereria kwane.
Ⅲ Onye ndiria nare komanya aase ndamonyore,
rirorio nigo nare kogenda goika ase obomenyo bwaye bore.
Ⅳ Nigo narenge komoteebia amang’ana aane,
ing’ichorie omonwa one namang’ana nkoamererania nere.
Ⅴ Igo nigo nare komanya eki akong’iraneria,
na komanya ayarenge gonteebia.
Ⅵ Inee! Nyasae nkoamererania arenge nainche ase okobua kwaye kore okonene?
Yaya, nigo arenge gontegerera.
Ⅶ Agwo omonto omonyaboronge nigo are konyara koamererania nere,
rirorio nigo nare gotigwa kegima noyokongambia.
Ⅷ Rora, nabeire nkogenda gochia bosio, korende ere taiyo;
naende nabeire nkoirana gochia magega, korende tindi komoorora.
Ⅸ Nigo nkomorigeria ensemo y’okobee, korende ere nigo akwebisa;
naonchoka gochia ase ensemo y’okorio, korende tindi komoorora.
Ⅹ Korende ere namanyete chinchera chiane ngoetera.
Ekero arakoore gonteema, nimbioke buna etaabu ekobioka korwa riko.
Ⅺ Inche natachire bokong’u ase amabarato aye,
nabeire ndendete chinchera chiaye,
gose tindi koonchoka nchitige.
Ⅻ Tinana gotiga kobwata amachiiko akwanete;
nimbwatetie amang’ana ere akwanete,
gose tari aya naroberetie inche omonyene.
ⅩⅢ Korende ere tari koonchoka, ning’o oranyare komoonchorana?
Egento aganirie gokora, nigo akogekora.
ⅩⅣ Aya achiikire igoro yane, goika ayaikeranie,
na amange buna ayio nigo agachire ase ebirengererio biaye.
ⅩⅤ Ase ayio nabeire nobwoba koba ase obosio bwaye,
na ekero nkoyarengereria nigo nkomwoboa.
ⅩⅥ Nyasae ogoyirie omoyo one,
ee, Omobui ongosire,
ⅩⅦ ere tantigete ase omosunte nsire,
nonya noria ekerima otubete obosio bwane.