ⅩⅩⅣ
Ⅰ Nase ki Omonguru atabegeti chingaki chi’ekina?
Naende nase ki baria bamwanchete batararora rituko riria riaye?
Ⅱ Abanto nigo bagotigeria chimbebe,
baira amaicho e chitugo nechinguru, bachia koyarisia aba ayabo.
Ⅲ Barobwo nigo bakoira chitigere chie chintakana,
baira chiombe chi’ababoraka koba intenenera.
Ⅳ Nigo bagotwoma abaremeire korwa inchera,
bagera abataka bonsi b’ense eyio bachia kwebisa amo.
Ⅴ Rora, abataka abwo babeire buna chitigere chi’orosana chire ase erooro;
nigo bagokora emeremo emekong’u ase okonyora ebi bakoria.
Ase ekerubo ekiomo nao bakorigeria abana babo endagera.
Ⅵ Nigo bakogesera omonto onde chindagera chi’echitugo chiaye,
naende basangereria amasabibu agotigwa ase omogondo bw’omokori amabe.
Ⅶ Nigo bakorara gesobono ase obotuko bwonsi, batabwati eki bakwebisia,
gose tibabwati eki bakobeeka ekero ki’embeo.
Ⅷ Emebere yabo nigo enyiete nembura egotwa ase ebitunwa,
erio bamigererania ase chingako chi’ebitare koigama aroro.
Ⅸ Abande nigo bagotaboria chintakana korwa ase chimbeere chi’abang’ina,
na baira abana ebing’werere b’abataka babe intenenera.
Ⅹ Abataka baria bakona‐koong’anya bare getirianda,
nigo bakobogoria emesaima bare nenchara.
Ⅺ Nigo bakomita amaguta ’amazeituni,
boigo edivai korende nonya naboigo nigo bare nerang’o.
Ⅻ Abanto bachandegete ase omochie nigo bakweumia,
abanto baakire chingoma nigo bakorera,
nonya naboigo Nyasae tari gotegerera ogosaba kwabo.
ⅩⅢ Abanto bande bangire oborabu,
nonya ne chinchera chi’oborabu tibachimanyeti,
gose tibari kobwatia chinchera chi’oborabu obwo.
ⅩⅣ Omoiti nigo akoboka mambia chuni ng’a
aite abataka na abachandegete,
na ase obotuko emeremo yaye neyoboibi.
ⅩⅤ Eriso ri’omotomani nigo rikoganya kobwairire,
ere oteeba: Onde tari ondoche,
erio otuba obosio bwaye bwekona.
ⅩⅥ Omosunte gosoire, abaibi nigo bakobochora chinyomba basoa ime.
Barabwo mobaso nigo bagwesiekerera bebisa;
tibamanyeti oborabu.
ⅩⅦ Omosunte ekerima nigo onga buna emambia ase bare;
barabwo nigo bare abasani b’okwoboyia kw’omosunte.
ⅩⅧ Inwe nigo mogoteeba:
Omokori amabe nigo akoirwa bwango ne chiooro,
na egetari kiaye ase ense eye nigo keragereirie,
ere takonyara koirana ase emegondo yaye y’emesabibu.
ⅩⅨ Buna koreng’ana egurugura ne riberera bigokoora amaache ’amagena ’embura,
naboigo nabaanto bakorire ebibe barairwe gochia aase abakuure.
ⅩⅩ Chinda chi’abaiborete nchibange pi;
amakonde nabarie baere, tibakoinyorwa nonya ng’ake;
igo oyogokora amabe nabunwe buna omote.
ⅩⅪ Omokori amabe nigo akoibera omokungu omogomba;
gose tari gokorera omoboraka amaya.
ⅩⅫ Nonya naboigo Nyasae ase okobua kwaye nigo akoa omokori amabe chinguru;
ekero erusirie moyo, nigo agotenena naende.
ⅩⅩⅢ Nabo Nyasae akomorenda buya na komokonya,
na nigo akoba origereretie mono chinchera chiaye.
ⅩⅩⅣ Ase engaki enke nabo abakori amabe bagokinigwa, erio bwango basirigwa;
nigo bakogwa inse, bakwa buna abande,
babutorwa buna ebigara bikobutorwa ekero bikogeswa.
ⅩⅩⅤ Onye amang’ana ayio tari bo,
ning’o oranyare kong’enekia ng’a nomorimo inde,
naende aorokie ng’a amang’ana nakwanire nigo are bosa.