ⅩⅩⅩⅦ
Ⅰ “Ayio nigo akogera enkoro yane yaiguswa,
yatuma gocha ase omoyo.
Ⅱ Tegerera oigwe okogukura kw’eriogi riaye,
na okoruma gokorwa ase omonwa oye.
Ⅲ Nigo agotoma okoruma okwo korwa igoro gocha ase ense yonsi;
okomesa kwaye gwe chinkoba nigo kogochera chinsinyo chi’ense.
Ⅳ Erio eriogi riaye rikoruma,
ere nigo akogukura neriogi ri’obonene,
gose tari gotanga okomesa ekero eriogi riaye ri’okogukura riaigurwe.
Ⅴ Nyasae nigo akogukura neriogi riaye ase enchera y’ogokumia mono,
nigo agokora amang’ana amanene, ayio totanyare komanya.
Ⅵ Ere nigo agoteebia amagena ’embura: Kagwe igoro ase ense;
na otoma omonyirira na embura enene ere ne chinguru.
Ⅶ Nyasae nigo agotanga emeremo y’amaboko a kera omonto,
erinde abanto bonsi banyare komanya emeremo yaye.
Ⅷ Erio ching’iti chi’orosana chiagenda kwebisa,
chiagenderera kobeera ase amakuruma abo.
Ⅸ Ekembugu‐mbugu nigo kegosoka korwa ase chiero chiaye agwo Irianyi,
na omwaga ore nobokendu orua sugusu oseria amare.
Ⅹ Nyasae nigo akorua omoika bw’obokeng’entu obwatania amaache,
na amaache oyarenta abwatana oma pa.
Ⅺ Nigo agoichoria amare amarito namaache,
amare nigo agosiarera chinkoba chiaye.
Ⅻ Amare nigo agoetanana gochia aaria na aaria, akoraagwa nere,
goikerania aya onsi ere achiikire akore ase ense.
ⅩⅢ Nyasae nigo agokora ayio aba bo,
ase okorua ebisusuro bi’okorongeyia,
gose ase engencho y’obwanchani bwaye.
ⅩⅣ Aye Ayubu, igwa aya;
karategerera, orengererie igoro y’emeremo y’ogokumia ya Nyasae.
ⅩⅤ Inee! Nomanyete buna Nyasae agokora ochika ayio,
naende buna agokora okomesa kwamoreka goetera ase amare,
ⅩⅥ Inee! Nomanyete buna areng’anetie amare,
eyio ere emeremo y’ogokumia y’oria ore nobong’aini oboikeranu?
ⅩⅦ Inee! Nomanyete egekogera chianga chiao chigosamba ne riberera,
ekero ense egotoererigwa nomwaga okogusa korwa Irianyi?
ⅩⅧ Inee! Nonyare korambora igoro buna ere ayeramborete,
igoro eria ere enkong’u buna ekerore gi’ekioma?
ⅩⅨ Tworokererie aya togochia gokwana asare;
titokonyara konyora amang’ana togochia gokwana,
ekiagera tore ase omosunte.
ⅩⅩ Inee! Nyasae nigo agochia goteebigwa ng’a inche ninganetie gokwana?
Onde nare oganetie ere amosirie?
ⅩⅪ “Abanto tibakonyara korigereria amasase ’erioba,
kabarire igoro ekero amare abisirwe nomwaga.
ⅩⅫ Oborabu bokomeka‐meka nigo bokorwa sugusu;
ee, Nyasae nigo eboetie nobonene bw’ogosikwa gw’okoondokia.
ⅩⅩⅢ Oyio Omobui, intwe titokonyara komoorora buna are;
nigo abwate okobua okonene, naende nigo are omonyene ekeene,
ere nigo are omonyene oboronge mono, takorega onde.
ⅩⅩⅣ Ase ayio Mwanyabaanto nigo bamoirogete;
ere tari gosika oyokwerengereria ng’a nomong’aini are.”