ⅩⅩⅩⅥ
Ⅰ Elihu akagenderera gokwana, akabora,
Ⅱ Indemereria ake igo, inche nkworokie amang’ana;
nimbwate ring’ana ngokwana ribaga ria Nyasae.
Ⅲ Inche nindusie chisemi chiane korwa aare,
ing’orokie ng’a Omotongi one nere omonyene oboronge.
Ⅳ Ekeene, amang’ana aane tari ay’oborimo;
inche oyo nteneine aiga amo naye nomoikeranu inde ase okomanya.
Ⅴ Rora, Nyasae nigo are Omonguru, ere tachayeti onde;
nigo are nokobua ase chinguru na obong’aini.
Ⅵ Ere tagotiga omokori amabe agenderere koba moyo,
korende nigo akoa abachandire oboronge bwabo.
Ⅶ Tari gotiga korigereria abanyene oboronge,
korende nigo akobabeeka amo nabarwoti ase ebirogo bi’obonene.
Ee, nigo akobakinia bagenderera kobeera aroro,
Ⅷ na onye bagosibwa chingataare na baba bare ase emechando,
gose kobwatwa ase emeeto y’emechando,
Ⅸ Nyasae nigo akobaorokeria ayabakorire, na ogosaria kwabo,
boigo obaorokeria buna bakororekana abaenenu.
Ⅹ Nigo agotinora amato abo baigwa ogokuurerwa,
na obachika baonchoke, batige gokora amabe.
Ⅺ Kobaraigwere na komokorera,
rirorio mbabe bagoseseneka ase amatuko abo onsi,
naende babe bakwegokia ase obogima bwabo.
Ⅻ Korende onye tibakoigwera, nigo baraitwe nemioro,
erio bakwe batamanyeti kende.
ⅩⅢ Abatamoirogete Nyasae nigo bagachete endamwamu ime ase chinkoro chiabo;
barabwo tibari korera barigie bakonywe, ekero Nyasae akobaa egesusuro.
ⅩⅣ Barabwo nigo bagokwa ekero bare abake,
obogima bwabo nigo bogosirigwa buna obw’abanyaka.
ⅩⅤ Nyasae nigo agotooria abataka goetera ase emechando yabo,
otinora amato abo goetera ase ogokorerwa bobe kwabo.
ⅩⅥ Ee, nigo akoebereretie, agakorusia korwa ase chimbanderana,
agakorenta aase aagare, ase komigwa gotaiyo;
boigo chindagera kwabeekeretwe emesa nigo chiarenge chinoru.
ⅩⅦ Korende bono aye nigo okonacherwa ekiina buna eki’abakori amabe,
ekiina na ayare ay’ekeene mbikonyore.
ⅩⅧ Bono erende, endamwamu tebaisa gokoebereria na kogokora obe omochecheria,
tobaisa gwancha obonge bw’embooria bogosirie.
ⅩⅨ Inee! Obotenenku bwao mbonyare kogotanga korwa ase emechando?
Gose okobua kwao ne chinguru chiao mbinyare?
ⅩⅩ Tobaisa kogania ng’a obotuko boria boche,
obwo abanto baraitwe basirigwe.
ⅩⅪ Bwerende, tobaisa koirana gokora amabe,
ekiagera nigo gwanchire gokora ayio kobua konyora emechando.
ⅩⅫ Rora, Nyasae nigo agokora amanene ase okobua kwaye.
Inee! Ning’o okworokereria buna ere?
ⅩⅩⅢ Ning’o ochikeire Nyasae enchera yaye?
Gose ning’o oranyare komoteebia: Aye gwakorire bobe?
ⅩⅩⅣ Inyora gotogia emeremo yaye,
eyio abanto babeire bagoteera na koyetogia.
ⅩⅩⅤ Abanto bonsi bayerorire,
ee, Mwanyabaanto mbayerigereretie korwa aare.
ⅩⅩⅥ Rora, Nyasae nigo are omonene mono, na intwe titomomanyeti;
omobaro bw’emiaka yaye temanyekaneti.
ⅩⅩⅦ Ere nigo akong’usa chintonyi chi’amaache gochia igoro,
na chirochio chiatwa buna embura chiaba riime.
ⅩⅩⅧ Embura eyio nigo egotwa gocha ase ense,
yatwera Mwanyabaanto ase obonge.
ⅩⅩⅨ Inee! Monto onde nanyare komanya buna amare agwesiarera,
gose buna okogukura gw’enkoba gokorua ase obomenyo bwa Nyasae?
ⅩⅩⅩ Rora, nigo agosiarera okomesa kwamoetanana,
naende otuba enkori y’enyancha.
ⅩⅩⅪ Ase enchera eyio nigo akonachera abanto ekiina;
naende nigo akobaa chindagera ase obonge.
ⅩⅩⅫ Ere nigo amumegete amaboko aye ase okomesa,
erio ochika goake ase ekerenga kere.
ⅩⅩⅩⅢ Ekerundo gi’okomesa nigo gekoraria igoro ya Nyasae,
nonya ne ching’iti nigo chikomanya ng’a ekerundo ngocha kere.