ⅩⅩⅩⅤ
Ⅰ Elihu akagenderera gokwana, akabora:
Ⅱ Aye Ayubu, nigo okorengereria ng’a ayio nekeene?
Gose nigo ogoteeba ng’a nomonyaboronge ore ase obosio bwa Nyasae?
Ⅲ Naende nigo okoboria ng’a mbuya ki oboronge bokogokorera
kobua ogokora ebibe?
Ⅳ Bono ngokoiraneria nde aye amo nabasani bao abamore komo.
Ⅴ Rigereria gochia igoro, orore;
rora amare buna are igoro mono kogoetania.
Ⅵ Aye noisa gokora ebibe, ninki ayio arakore ase Nyasae?
Na ogosaria nagoisa komentekana mono, ninki okwo koramokorere?
Ⅶ Onye kore omonyene oboronge, ngento ki okoa Nyasae,
gose ninki akonyora korwa ase okoboko kwao?
Ⅷ Amabe ao ogokora nigo akorenta emechando ase omonto onde onga buna aye,
na oboronge bwao nabo boragere omonto onde anyore ayare amaya.
Ⅸ Ekiagera ogokorerwa bobe kwabuchire,
abanto nigo bakorera mono ng’a bakonywe;
nigo bakorangeria bakonywe korwa ase amaboko ay’abare nokobua.
Ⅹ Korende monto onde tari okobooria:
Ng’ai Nyasae, oria ontongete, are,
oyio okogera amatera ay’ogotogia aterwa botuko?
Ⅺ Ere nigo agotworokereria kobua ching’iti chi’ense,
na otokora twaba nobong’aini kobua chinyoni.
Ⅻ Abanto nigo bakorera, korende Nyasae tari koiraneria,
ase engencho y’ogokora okobe kw’oboenenu kwa’ banyabibe.
ⅩⅢ Ekeene, Nyasae tari koigwa okorera gotari ogw’ekeene,
gose ere Omonguru takogwechandera.
ⅩⅣ “Nonya kogoteeba ng’a tori komoorora,
ere tagokoigwa;
ekiina kiao nigo kere ase obosio bwaye,
bono nigo omoganyete nogosemeria.
ⅩⅤ Korende bono nigo okorengereria ng’a Nyasae tari korua egesusuro
ase engencho y’endamwamu yaye,
naende ng’a ere tari gwechandera ogosaria.
ⅩⅥ Ayio naro akogera aye Ayubu ogokwana amang’ana atari nengencho,
nigo okomenta gokwana amang’ana atari ay’obong’aini.”