ⅩⅩⅩⅣ
Ⅰ Erio Elihu akagenderera gokwana, akabora:
Ⅱ “Inwe abanto abang’aini, igwa amang’ana aane!
Inwe abamanyi chisemi, ntegerera!
Ⅲ Amang’ana amato akoigwa, nigo akoyateema,
buna oromeme rokomena endagera.
Ⅳ Tochore ayare amaronge;
intwe amo toteeme komanya ayare amaronge.
Ⅴ Ayubu nigo agoteeba: Inche nomonyene oboronge,
korende Nyasae ong’urire oboronge bwane.
Ⅵ Nonya inde omonyene oboronge, nabarirwe ng’a nomonyaborimo inde;
amaote aane takonyara kogwena,
nonya gosaria konde tikori ime ase ’nde.
Ⅶ “Inee! Monto ki onga buna Ayubu,
oyio okonywa ogochaywa, ogokomera buna amaache?
Ⅷ Ere oyio ogosanga nabanyabibe
na gotaara nabakori amabe.
Ⅸ Naende ere oteebire ng’a
kobwatana na Nyasae, ayio tari komokonya gento kende.
Ⅹ “Ase ayio, inwe abanto abamore nokomanya, inyigwa!
Nyasae tabaisa gokagerwa ng’a nakore amabe.
Inee! Ere Omonguru nakore ebibe?
Ⅺ Ere nigo agoakana omonto koreng’ana buna emeremo yaye ere;
nabo akoa omonto eng’eria buna orogendo rwaye rore.
Ⅻ Ekeene, Nyasae tagokora ayare amabe;
ee, ere Omonguru tari gosaria ayare ay’ekeene.
ⅩⅢ Ning’o oete Nyasae okobua gw’okogambera ense?
Ning’o obeegete ense yonsi koba eyaye?
ⅩⅣ Ere aise koirania omoika oye,
ee, airanie gochia asare omoika bw’obogima,
ⅩⅤ Mwanyabaanto bonsi pi goika bakwe,
bairane ase amaroba.
ⅩⅥ “Onye more nokomanya, igwa aya;
tegerera moigwe aya ngoteeba:
ⅩⅦ Inee! Omonto ogechete ekeene nanyare kogamba?
Nonachere ekiina omonyene oboronge oyore nokobua?
ⅩⅧ Nonyare goteebia omorwoti: Aye nigo ore omonto bosa,
gose noteebie abanene basikire: Inwe nabakori amabe?
ⅩⅨ Nyasae tari gwanchereria abagaambi,
gose tari kobara abanda ng’a mbare nengencho enene kobua abataka,
ekiagera abwo bonsi nigo bare emeremo y’amaboko aye.
ⅩⅩ Abanto nigo bagokwa ara rimo;
nigo bakonyegerigwa botuko gati, basira kegima,
baria bare nokobua nigo bagosirigwa ko tari namaboko a Mwanyabaanto.
ⅩⅪ Nyasae nigo arigereretie chinchera chi’omonto;
ere nigo aroche amatambokero aye onsi.
ⅩⅫ Aase aamwamu tari, gose omosunte ekerima,
ase omokori amabe aranyare kwebisa.
ⅩⅩⅢ Nyasae taganeti engaki entambe korigereria,
goika abeeke omonto ase ekiina.
ⅩⅩⅣ Ere nigo agosenyenta abare nokobua atari kona‐kouna‐unia,
erio abeeke abande aase abo.
ⅩⅩⅤ Ekiagera ere namanyete emeremo yabo,
nigo akobaonchorana botuko baitwa kegima.
ⅩⅩⅥ Nyasae nigo akobaita maiso marore,
ase engencho y’ebibe biabo,
ⅩⅩⅦ na ekiagera baonchokire na gotiga komobwatia,
gose tibari korengereria igoro ye chinchera chiaye nonya ng’ake.
ⅩⅩⅧ Abwo bagerire ekerero ki’abataka giaikire asare,
nere oigure ekerero ki’abagokorerwa bobe.
ⅩⅩⅨ “Inee! Nyasae karakire‐kiri ning’o oramonachere ekiina?
Karabise obosio bwaye, ning’o oranyare komorigereria,
gokerabe egesaku gete gose omonto gete,
ⅩⅩⅩ ekero ararusie okogamba korwa ase abatamoirogeti
na abatange tibaaba emeribo ase abanto?
ⅩⅩⅪ “Inee! Monto onde nare oteebirie Nyasae:
Inche naremereirie egesusuro gi’okondongeyia,
nonya tinkorereti monto onde bobe.
ⅩⅩⅫ Bono inyorokererie aya ntamanyeti,
na onye nakorire ebibe, tingwancha kobikora naende.
ⅩⅩⅩⅢ Nigo okagete ng’a Nyasae nigo aragoakane buna oranche,
ekiagera gwakanire ande onsi?
Aye goika ochore, gose tari inche;
ase ayio, kwana aya omanyete.
ⅩⅩⅩⅣ “Abanto abare nokomanya,
na kera omonto omong’aini orabe okonyigwa, nigo baranteebie:
ⅩⅩⅩⅤ Ayubu nigo agokwana atari na semi;
na amang’ana aye tari ay’obong’aini.
ⅩⅩⅩⅥ Nigo yagwenerete Ayubu ateemwe goika omoerio,
ekiagera nigo akoiraneria buna abakori amabe bakoiraneria.
ⅩⅩⅩⅦ Ere nigo akomenta ogosaria ase ebibe biaye,
naende nigo agotoakera chinkobi ase ogotochaya
na gokwana amang’ana amange are mamincha ya Nyasae.”