ⅩⅩⅩⅢ
Ⅰ Aye Ayubu, bono inyigwe,
ntegerera ase onsi aya ngokwana.
Ⅱ Rora, bono namumoire omonwa one,
na oromeme rwane rwachakire gokwana.
Ⅲ Amang’ana aane nigo akoorokia oboronge bore ime ase enkoro yane,
na ase omonwa one nigo ngokwana aya imanyete.
Ⅳ Omoika o Nyasae noro ontongete,
na omoika bw’obomoyo bw’Omonguru noro okong’a obogima.
Ⅴ Bono ing’iranerie onye gokonyara;
beka amang’ana ao ang’e, otenene bokong’u!
Ⅵ Rora, inche nigo inde buna aye ase obosio bwa Nyasae;
inche boigo nigo natongetwe korwa ase riroba.
Ⅶ Rora, inche tindi kende ogwenerete konyoboa;
gose tindi gochia koba buna egurube endito asore.
Ⅷ “Ekeene, gwakwanire ase ntegererete,
na inche naigure amang’ana ao.
Ⅸ Aye nigo ogoteeba iga: Inche nigo nchenegete,
tindi nogosaria konde, na bibe tibiri ime yane.
Ⅹ Naama! Nyasae onyorire amasoero ase ’nde,
na ombarire ng’a nomobisa oye inde.
Ⅺ Osoirie amagoro aane ase rikorogoto,
na nigo akoba ondigereretie ase oboeto bwane bwonsi.
Ⅻ “Naama! Nigo ngokoiraneria ng’a ase amang’ana aya tokwaneti ekeene;
Nyasae nigo are omonene goetania Mwanyabaanto.
ⅩⅢ Nase ki okoamererania nere
kogoteeba ng’a ere takoiraneria amang’ana aya nonya nerimo?
ⅩⅣ Ekeene, Nyasae nigo agokwana ase enchera eyemo, gose ibere;
nonya nabo monto onde tari okomotegerera.
ⅩⅤ Nigo agokwana ase chindoto na amaroro a botuko,
na ekero abanto bararire chitoro chindito,
na ekero basundokire ase amarere abo.
ⅩⅥ Erio agwo otinora amato abanto,
na obarentera ogokuurera gw’okoondokia
ⅩⅦ ng’a anyare koonchora omonto atige ogokora kwaye okobe,
na atange oboenenu bw’omonto.
ⅩⅧ Nigo agotanga omonto tagenda ase oboina,
naende orenda obogima bwaye tibosirigwa n’omoro.
ⅩⅨ Omonto nigo akonyora egesusuro gi’okomoorongeyia,
ekero are nobororo ase oborere bwaye,
na amauga aye agendererete komwatia.
ⅩⅩ Omoyo oye ogecha endagera,
nonya endagera ere engiya mono.
ⅩⅪ Chinyama chi’omobere oye nigo chikoera, tichikororekana,
na amauga aye atongonona.
ⅩⅫ Ere omonyene nigo agosuka gochia ang’e noboina,
na obogima bwaye gochia ase abagosiria obogima.
ⅩⅩⅢ “Onye omomalaika nkoba arenge asare,
oyomo bwa baria chilifu bagokora okobwatania asare,
erinde amworokie ayare ay’oboronge,
ⅩⅩⅣ erio amororere amaabera, ateebe:
Tooria omonto oyo tabaisa gotirimboka gochia ase oboina,
ekiagera inche namonyoreire embooria.
ⅩⅩⅤ Omobere oye oiranigwe obe buna oyo bw’obosae bwaye,
naende aonchorwe abe buna ekero arenge ne chinguru.
ⅩⅩⅥ Ekero arabe ogosaba Nyasae, nere namororere amaabera;
omonto oyio nachiche ase obosio bwaye ore nomogooko,
na Nyasae nairanie oboronge bw’omonto oyio.
ⅩⅩⅦ Omonto oyio natere ase amasio ’abaanto, ateebe:
Nigo nakorete ebibe, nkaonchorana aya arenge amaronge,
gose tinanyorete egesusuro buna nagwenerete.
ⅩⅩⅧ Ere obooririe omoyo one togenda ase oboina,
bono obogima bwane mborore oborabu.
ⅩⅩⅨ Rora, Nyasae nigo agokora amang’ana ayio onsi ase omonto
ara kabere, gose ara gatato,
ⅩⅩⅩ erinde amoiranie korwa ase oboina,
ng’a oyio anyare komorekerwa noborabu bw’obogima.
ⅩⅩⅪ “Aye Ayubu, ntegerera,
okire‐kiri, inche nkwane.
ⅩⅩⅫ Onye kobwate ing’ana rinde okong’iraneria, kwana,
ekiagera nigo nganetie gokoa oboronge bwao.
ⅩⅩⅩⅢ Onye tobwati kende, kira‐kiri ontegerere,
na inche ninkworokererie obong’aini.”