ⅩⅩⅫ
Ogokwana kw’Elihu
32:1—37:24.
Ⅰ Bono ekiagera Ayubu arenge omonyaboronge ase amaiso aye ere omonyene, abanto baria batato bagatiga komoiraneria.
Ⅱ Erio Elihu akaba nendamwamu ase Ayubu, ekiagera ekorete omonyakeene kobua Nyasae. Elihu oyio nigo arenge mosinto o Barakeli Omobusi, na oyo bw’eamate ya Ramu.
Ⅲ Boigo akaba nendamwamu ase abasani baria batato b’Ayubu, ekiagera batanyorete amang’ana bakoiraneria, nonya bateebeete ng’a Ayubu nomomochi.
Ⅳ Elihu akaba okoganya baria batato barakwana n’Ayubu, ekiagera ere arenge omoke ase emiaka.
Ⅴ Na ekero aroche ng’a baria batato tibabwate ing’ana baare koiraneria, akaba nendamwamu.
Elihu
Ⅵ Elihu mosinto o Barakeli Omobusi, agateeba:
Inche nigo inde omoke ase emiaka, korende inwe nabakoro more;
ayio naro agerete nkaba nobwoba, ngakira‐kiri,
na tinakwana ay’ebirengererio biane ase more.
Ⅶ Korende ngateeba: Tiga abanto b’amatuko amange bakwane,
abanyamiaka menge borokererie obong’aini.
Ⅷ Korende omoika nore ime ase Mwanyabaanto,
omoika oyio bw’Omonguru noro okobaa okomanya.
Ⅸ Bono tari ng’a nabaanto b’emiaka emenge bare abang’aini,
gose tari ng’a nabagotu bamanyete ayare boronge.
Ⅹ Nigo nkoboria, montegerere,
erinde nkwane ayare ase ebirengererio biane.
Ⅺ Naama! Nigo nategererete mono ekero mwarenge gokwana;
nkaba ndemereretie koigwa chinkwana chiaino chi’obong’aini,
ekero mwarenge koriga‐rigia ng’a mang’ana ki mwagwenerete gokwana.
Ⅻ Ee, nigo nabategererete mono,
korende onde tarenge ase more obuete Ayubu,
gose onde tanyarete koiraneria amang’ana aye.
ⅩⅢ Inwe erende mono, timobaisa goteeba:
Intwe twanyorire obong’aini.
Nyasae nere orabue Ayubu na amoiyerie, tari Mwanyabaanto.
ⅩⅣ Ayubu takwanete nainche amang’ana ande ay’okweegerera,
na inche tinkomoiraneria buna inwe.
ⅩⅤ Bono batang’ang’ire, tibakonyara kong’iraneria nonya ng’ake;
tibabwati ring’ana bagokwana.
ⅩⅥ Inee! Nainche nigo nkogenderera koganya, ekiagera tibari gokwana,
na ekiagera bateneine agwo batari koiraneria?
ⅩⅦ Inche ngokwana inde ayane,
erinde ng’orokie ayare ase ebirengererio biane.
ⅩⅧ Inche nimbwate amang’ana amange nganetie gokwana,
ekiagera omoika ore ime yane onsukirie.
ⅩⅨ Rora, enda yane nigo enga buna edivai ekunekire mono,
buna ebirandi biroisirie korwa ase amasankwa amayia bire ang’e kworeka.
ⅩⅩ Goika nkwane, erio nario ndanyore obotoereru;
goika imaanore omonwa nkwane, ing’iranerie.
ⅩⅪ Inche tinkonyara gwanchereria monto onde bwensi, gose gokwana
amang’ana ay’okweansia.’
ⅩⅫ Inche timanyeti gokwana amang’ana ’okweansia,
inse gokora bo, Omotongi one nigo aransirie bwango.