ⅩⅩⅪ
Ⅰ Inche nakorire okobwatana kw’ogotianania namaiso aane
ng’a tinkorigereria omoiseke omwekungi ase okomogania.
Ⅱ Naki rende egetari kiane gekorwa ase Nyasae o igoro kerabe?
Na omwando one okorwa ase Omobui ore igoro, naki orabe?
Ⅲ Inee! Emechando teri konyora abatari abanyaboronge,
na ogosirigwa gwachera abagokora ebibe?
Ⅳ Inee! Nyasae tarochi chinchera chiane chionsi
na kobara amatambokero aane onsi?
Ⅴ Inee! Nabeire ngotaara ase chinchera chi’obong’ainereria,
gose amagoro aane naminyokeire ay’oborimo?
Ⅵ Tiga ndengwe ase ekerengo ekeronge,
na Nyasae amanye oboikeranu bwane.
Ⅶ Onye nagobeire korwa ase enchera,
na enkoro yane yabeire ekobwatia okogania kw’amaiso aane,
na onye komocha konde kwabwatereire amaboko aane,
Ⅷ rirorio inche nsimeke endagera, na omonto omoao ayeire,
na kende gionsi kiane keramere gesimorwe.
Ⅸ Onye omoyo one obeire okoebererigwa na gwancha omokungu omoao,
na igo nabeire nkoboera omonto onde ase egesieri kiaye imosirie,
Ⅹ rirorio tiga omokungu one abe ogoseera omonto omoao obosie,
naende abasacha bande babe bakoba nere.
Ⅺ Okwo nigo kware koba ogosaria okobe mono goetania,
na kware koegwa egesusuro nabagaambi ebiina bonsi.
Ⅻ Boigo nigo kware koba omorero ogosamba gochia aase ay’ogosiria
na koria ebinto biane bionsi kobikoora.
ⅩⅢ Inse kwanga koroisia amang’ana omosomba one, omosacha gose omokungu,
ekero baremurunganie igoro yane,
ⅩⅣ ninki ndakore ekero Nyasae aranyimokere?
Ninki ndamoiranerie ekero arabe okorua egesusuro ki’ebibe biane?
ⅩⅤ Inee! Oyio ontongete ase enda ya baba, tari ere otongete oyio boigo?
Tari ere oyomo otobombete ase enda ime?
ⅩⅥ Inche tinarinete omotaka egento aganetie,
gose tinatigete omoboraka kwerusia moyo;
ⅩⅦ tinarenge koria endagera yane inche bweka,
nigo naete nentakana nero, ekayeria.
ⅩⅧ Oyio inche nabeete ise korwa obosae bwaye,
na korwa okoiborwa kwaye nkaba nkomorera na komoraa.
ⅩⅨ Inee! Monto onde nare ochandegete ase okoborwa chianga,
gose omotaka otabwati ekiebisio, ntakonyete?
ⅩⅩ Barabwo nigo bansesenetie,
ekiagera nabaete chingobo chi’amarionya e ching’ondi chikorwa ase amaicho aane.
ⅩⅪ Onye nakorerete entakana bobe
ekiagera namanyete ng’a ekegambero agwo ase egeita ngenkonye,
ⅩⅫ rirorio tiga amareko aane ongoke agwe inse,
ne chinengo chi’amaboko aane chisomoke.
ⅩⅩⅢ Nigo nare gocha kwoboigwa nemechando korwa ase Nyasae;
na tinare konyara gotenena bosio bw’obonene bwaye.
ⅩⅩⅣ Tinasemeretie etaabu,
nonya netaabu echenire;
ⅩⅩⅤ tinagokerete gose gochengera obotenenku bwane obonge,
gose ebinto nenyorerete namaboko aane.
ⅩⅩⅥ Tinarigereretie erioba ekero riabarete,
gose omotienyi ekero omesete,
ⅩⅩⅦ goika enkoro yane ekaebererigwa bobisi ase okobisasiima,
gose tinanyunyuntete okoboko kwane ase okobisika.
ⅩⅩⅧ Onye nakorete ayio nigo nare koegwa egesusuro nabagaambi ebiina,
ekiagera ayio nokomokana Nyasae ore igoro.
ⅩⅩⅨ Inee! Nagokerete ogosirigwa kw’omobisa one?
Gose netogetie ekero amabe amocherete?
ⅩⅩⅩ Yaya, tinatigete omonwa one okore ebibe
ase okomoragereria na komoganeria amakweri.
ⅩⅩⅪ Abanto bonsi bamenyete aa bwone babeire birori ng’a
kera omonto obeire oisanegete nendagera nkomoa.
ⅩⅩⅫ Nigo narenge koigorera abaeti ebisieri biane basoa;
gose motaari onde tabeete okorara isiko botuko.
ⅩⅩⅩⅢ Tinatubete ogosaria kwane buna engencho ya Mwanyabaanto ere,
gose ebibe biane ase egekuba kiane ime.
ⅩⅩⅩⅣ Tinairogete omoganda omonene bw’abaanto,
gose kwoboa abaamate abwo barenge gonchaya,
erinde imbe nkirete na kobeera nyomba ime.
ⅩⅩⅩⅤ “Naki yare koba buya onye nanyora omonto okonyigwa.
Inche nakoorire amang’ana aane!
Oria Omonguru nang’iranerie!
Ninganetie ndore amang’ana omobisa one andikerete ase okonyomania.
ⅩⅩⅩⅥ Ekeene, nigo nare koyabogoria igoro ase amareko aane;
nanga nigo nayesiberania abe buna egutwa ase ’nde.
ⅩⅩⅩⅦ Nanga namoteebia igoro y’orogendo rwane rwonsi;
nigo nare komochiera inde buna omogambi.
ⅩⅩⅩⅧ “Inee! Oboremo bwane bwanakondeera?
Gose emeng’ororia ye chintinde yana‐korererana?
ⅩⅩⅩⅨ Onye nabeire nkoria okwama kwaye ntari goakana
na kogera abanyene bakwe,
ⅩⅬ rirorio tiga amagwa amereo ribaga ri’engano,
na amabanchore ribaga ri’esairi.”
Amang’ana ’Ayubu aereire aa.