ⅩⅩⅩ
Ⅰ Korende bono abanto bare abake ase ’nde, nigo bagonsekerera,
abwo abaise babo batagwenereti kende,
anga ntababegete nonya nase egati ye chisese chikorenda amaicho aane.
Ⅱ Abanto abwo chinguru chiabo chiaerire ase obogotu,
ngokonywa ki ndanyore korwa ase amaboko abo?
Ⅲ Ase engencho y’okoremerwa na enchara babeire ebigonkobe,
nigo bakona‐kogokona namaino abo riroba eriomo pa,
erio riasaregete.
Ⅳ Nigo bakona‐gosangereria ebimeri bie chinsana,
na baremora emeri y’emete enga buna ebisanka.
Ⅴ Abwo nigo bagoserigwa korwa ase egati y’abanto,
baakerwa amariogi korwa magega na kwogererwa buna abaibi.
Ⅵ Ase igo bagenda komenya ase amakuruma are ase amagoko,
na ase chingoro inse y’ense, na ase ebitare.
Ⅶ Ime ase ebitutu nigo bakwogererana,
inse y’amase akorura nao bagosangererekana amo.
Ⅷ Barabwo nabana b’abaanto abariri na ab’abakayayu;
nigo baseretigwe nemecharichi barue ase ense.
Ⅸ Na bono inche nabeire engero egoterwa ase bare,
ee, nabeire ase bare ring’ana rikorabaarwa.
Ⅹ Barabwo nigo bangechete, bantamire;
tibetangeti gontwera amate obosio bwane.
Ⅺ Nyasae ong’urire chinguru, naende onkorire koba omoitongo,
na abanto abwo babeire abaremu ase ogonkorera bobe.
Ⅻ Ekeombe ki’abanto abasaria nigo bagontubokera korwa ensemo yane ya borio,
erio baminyokia gonseria;
nigo bagokora emeroberio emenge y’ogonsiria.
ⅩⅢ Basaririe enchera yane ngoetera;
abwo batabwate ogosemia konde abanyene,
nigo bagokonya abande ase ogonsiria.
ⅩⅣ Nigo bagoeta aase omogwa omogare banchichera ne chinguru,
erio bang’umokera goetera ase omogwa oyio baabagoire.
ⅩⅤ Obwoba obonene bwanchicheire;
ogosikwa kwane gwasirigwe buna omwaga ogosiria,
na obotenenku bwane bwasirire pi buna amare agosira.
ⅩⅥ Na bono omoyo one oberire ime yane;
amatuko ’emechando ambwatereire bokong’u.
ⅩⅦ Amauga omobere one nigo akonyatia botuko bokia,
na obororo bokondia tibori gokenda.
ⅩⅧ Oborwaire bwane bwabeire ne chinguru bwaonchoire risankwa ri’omobere one,
bono nigo ring’usererete buna rigoti ri’eanga yane.
ⅩⅨ Nyasae ontugutire ase etintira ime,
nabeire buna orotu ne ribu.
ⅩⅩ Nigo nkorera asore, korende aye tori kong’iraneria;
nigo nteneine asore, korende aye nigo onsonchete rioka.
ⅩⅪ Aye kwabeire omotindi ase ’nde;
nigo okondwania nokoboko kwao kore ne chinguru.
ⅩⅫ Aye nigo onyimokereretie igoro kwambekire ase omwaga
na kondiinia igoro yaye.
Aye nigo okona‐konduchania gochia aaria na aaria,
naba bosa ase omwaga omotindi.
ⅩⅩⅢ Ee, namanyire ng’a nong’ire aase abakuure,
ase enyomba eria echikeire abare moyo bonsi.
ⅩⅩⅣ Inee! Omonto karagwe takorambora okoboko kwaye,
na ase emechando yaye arere akonywe?
ⅩⅩⅤ Inee! Tinarerete ase engencho y’abwo barenge ase emechando?
Omoyo one tochandekerete abataka?
ⅩⅩⅥ Korende ekero nasemeretie konyora amaya, amabe agacha,
na ekero nabeete nsemeretie konyora oborabu, omosunte ogaacha.
ⅩⅩⅦ Enkoro yane nigo ere nemechando mono, teri n’obotoereru,
amatuko ’emechando anchicheire.
ⅩⅩⅧ Nigo nkona‐koong’anya inde nemechando ntarochi omobaso;
nigo ngotenena ase omosangererekano, narera ng’a nkonywe.
ⅩⅩⅨ Inche nabeire oyomwabo chisese chi’orosana,
na omogisangio bwe chisagero.
ⅩⅩⅩ Risankwa riane riaonchokire riamwamire ti,
na nigo rikona‐kobutoka,
na amauga aane nigo akoyia buna omorero.
ⅩⅩⅪ Obokano bwane bw’ebirigisa nigo bokominwa bwaba obw’ebirero,
na ekeroria kiane kiaonchoirwe kobugigwa ase abanto bakorera.