ⅩⅩⅨ
Ogokwana kw’omoerio kw’Ayubu ase ekiina kiaye
Ⅰ Erio Ayubu agachaaka gokwana naende.
Ayubu
Ⅱ Onye ndiria obogima bwane bware koba buna bwarenge ase amatuko a kare,
amatuko aria Nyasae andendete!
Ⅲ Engaki eria etaya yaye yarenge komorekera omotwe one,
na ase oborabu bwaye nkaba ngotaara ase omosunte.
Ⅳ Ase amatuko aria nakinete inde ne chinguru,
na obosani bwa Nyasae bwagendererete kobeera ase obomenyo bwane.
Ⅴ Engaki eria Omonguru nigo arenge amo nainche,
na abana baane nigo bang’etanaine;
Ⅵ nigo narenge gwesibia amagoro aane namabeere,
emezeituni ekamera ase egetare,
nkanyora chindooche chi’amaguta ’amazeituni.
Ⅶ Ekero narenge kogenda ase egeita ki’omochie,
goikaransa ase ekerogo kiane agwo ase ekeraario,
Ⅷ abasae abaare kondora nigo barenge kogobera,
na abanto abagotu batenena konyorokia amasikani.
Ⅸ Abagaambi b’abaanto nigo baare gokira tibagokwana,
batuba emenwa yabo namaboko.
Ⅹ Amariogi ’abagaambi nigo arenge gokea,
chimeme chiabo chiabwatana namang’ang’ura abo.
Ⅺ Ekero abanto barenge konyigwa, nigo barenge kondoka oyosesenirie,
ekero baare kondora, baba birori ase ’nde,
Ⅻ ekiagera nigo nabeete ngotooria abataka abwo barenge korera,
ne chintakana chitabwate onde ogochikonya.
ⅩⅢ Ogosesenigwa kw’omonto konya obeire ang’e gosira nigo gwanchicherete,
nkagera ababoraka bagateera nechinkoro chire nomogooko.
ⅩⅣ Nigo neboyetie oboronge, naborobwo bogantuba;
ekeene kiane nigo kiarenge buna omwambaro na ekegogwa.
ⅩⅤ Ninche narenge eriso ase emeuko,
na okogoro ase ebirema.
ⅩⅥ Ninche narenge ise bw’abataka:
na omonto ochandegete ntamanyete, nigo namwechanderete.
ⅩⅦ Nigo nabunete chinsea chi’abatari abanyaboronge,
ngatooria korwa ase emenwa yabo abwo konya babwatirwe.
ⅩⅧ Erio nkaba nkorengereria ng’a amatuko aane nigo arabe amange buna omokenye,
erio ngokwa imbe ase egeswa kiane.
ⅩⅨ Nigo narenge buna omote emeri yaye ekoranda yaika ase chindooche;
chinsagia chiane chikagenderera gotoora riime ase obotuko bwonsi;
ⅩⅩ obonene bwane nigo bwarenge kona‐koba oboyia ase ’nde,
na obota bwane bokona‐konyora chinguru chinyia ase amaboko aane.
ⅩⅪ Ekero narenge korua ogosemia,
abanto nigo barenge gontegerera, bakira‐kiri.
ⅩⅫ Ekero nakoorire gokwana, monto onde tarenge komenta ing’ana rinde,
ekiagera amang’ana aane nigo arenge kobagwera buna amatoima ’embura.
ⅩⅩⅢ Nigo barenge koba baganyete buna embura ekoganywa;
bakaba bagwasamia emenwa yabo buna embura y’okwamia endagera egwasamerwa.
ⅩⅩⅣ Ekero konya berusirie moyo nigo narenge kobasekera;
obwasioku bw’obosio bwane tibabosieereretie.
ⅩⅩⅤ Inche nigo nachorete enchera bagwenerete kobwatia,
naende nkabeera egati yabo buna omogambi;
nigo namenyete ase bare buna omorwoti akomenya nabarwani baye b’esegi,
naende buna omonto okoremia baria bakorera.