ⅩⅩⅧ
Ogotogia obong’aini
Ⅰ “Ekeene, ribwago ase chifeta chigokunywa korwa ndire,
na aase abanto bagosiberia chitaabu nare.
Ⅱ Ebioma nigo bigokunywa korwa riroba inse,
ne chitaai nigo chikonyorwa ase amagena ’ebitare anyititorwa.
Ⅲ Abanto nigo bagotongia chitaaya ime aaria, basiria omosunte;
erio baba bakoriga‐rigia amagena ase ebinunchi bire ase omosunte ekerima.
Ⅳ Abanto nigo bagokunya chingoro chintambe gochia inse.
Abwo nigo bakoba bebirwe nabaanto bagotaara igoro ye riroba,
nigo bagotirimbokigwa basung’unaine bairwa aare korwa ase abanto.
Ⅴ Ase riroba igoro nao endagera ekwama
ime y’ense inse aroro aonchoranwa aba buna omorero ogosamba oonchorana.
Ⅵ Aroro agwo nao are amagena e rigori rinene akorokwa safiro,
amo namagena e chitaabu.
Ⅶ Enchera ekogenda aase agwo enyoni ende yonsi egotwara orotwari teyemanyeti,
gose ekebaki tikiana koyerora.
Ⅷ Eng’iti y’orosana eng’enenu tiyana koyetacha,
gose endo tiyana goetera aroro.
Ⅸ “Mwanyabaanto nigo agokunya egetare ekiomo pa,
erio osensema ebitunwa korwa inse obionchorana.
Ⅹ Nigo akorema emetaro ime ase ebitare,
na amaiso aye arora kera egento kie rigori rinene.
Ⅺ Nigo akogita chindooche, otanga amaache tagoeta,
erio egento kebisekanete ime, okerenta aase aarabu.
Ⅻ Korende ng’ai obong’aini boranyorekane?
Na ng’ai okomanya komenyete?
ⅩⅢ “Mwanyabaanto tamanyeti rigori ri’obong’aini;
borobwo tibori konyorekana ase ense emenyire nabare moyo.
ⅩⅣ Chindiba nigo chigokana chiateeba: Tibori ase ’nde aa,
na enyancha nigo egoteeba: Tibori aiga ase ’nde.
ⅩⅤ Tibokogorwa chitaabu,
gose chifeta tichikorengwa koba rigori riaye.
ⅩⅥ Tibokoreng’anigwa ne chitaabu chikorwa Ofiri,
gose namagena e rigori rinene akorokwa oiniki na safiro.
ⅩⅦ Chitaabu na ebirore ebiya tibikoreng’anigwa naborobwo,
gose tibokoonchorerigwa n’ebinto bi’ogwechabera,
biroisirie korwa ase chitaabu chichenire.
ⅩⅧ Amakorongote na ebirore bichenire tibigwatorwa.
Rigori ri’obong’aini nigo rire rinene kobua eri’amagena erigori rinene akomeka‐meka.
ⅩⅨ Topasio, rigena rie rigori rinene rikorwa Ethiopia, tirikoboreng’anigwa,
gose tibokoreng’anigwa netaabu echenire.
ⅩⅩ “Bono rende, obong’aini ng’ai bokorwa?
Na ng’ai okomanya komenyete?
ⅩⅪ Nigo bobisire korwa ase amaiso ’ebitongwa bionsi bire moyo;
ee, nigo botubire chinyoni tichiborora.
ⅩⅫ Aase ay’obosareku na amakweri nigo bigoteeba:
Intwe twaigure chinkuma chiaye.
ⅩⅩⅢ “Nyasae bweka namanyete enchera y’obong’aini,
namanyete aase aye.
ⅩⅩⅣ Ere nigo arigereretie goika chinsinyo chionsi chi’ense,
aroche kera egento kere inse y’erioba.
ⅩⅩⅤ Ekero Nyasae arengete chinguru chi’omwaga,
na akarenga obonge bw’amaache,
ⅩⅩⅥ ekero abegete ogochika ase embura,
na akaroisia enchera y’okomesa gw’enkoba,
ⅩⅩⅦ nario aroche obong’aini naende akaboraria;
akaboikerania na koboenekia ase abanto.
ⅩⅩⅧ “Erio Nyasae agateebia Mwanyabaanto:
Naama! Okomoiroka Omonene, okwo nakwo obong’aini;
na ogweatanana korwa ase ebibe, okwo nakwo okomanya.”