ⅩⅩⅦ
Ayubu
Ⅰ Ayubu akagenderera gokwana emerabaaro yaye akabora:
Ⅱ Ekeene, buna Nyasae are moyo, oyo ong’urire ebiantungetie,
na buna Omonguru aeire omoyo one obororo,
Ⅲ naende omoika bw’obomoyo ogendererete koba ime yane,
na omoika o Nyasae ore ase chimioro chiane,
Ⅳ omonwa one togokwana aya atari a boronge,
gose oromeme rwane ay’obong’ainereria.
Ⅴ Abe aare korwa ase ’nde kobabara ng’a nabanyaboronge more;
goika ogokwa kwane ningenderere goteeba ng’a tindi nokomocha.
Ⅵ Nimbwaterere bokong’u oboronge bwane, tinkobotiga,
enkoro yane tekongambia ase amatuko ande inde moyo.
Ⅶ Tiga omobisa one abarwe buna omokori amabe,
na oyore mamincha yane buna oyotari omonyaboronge.
Ⅷ Ngosemeria ki omonto otamoirogeti Nyasae abwate, ekero arakwe,
ekero Nyasae aramoure obogima bwaye?.
Ⅸ Inee, ekero emechando eramochere Nyasae,
namoigwe gose?
Ⅹ Omonto oyio nagokigwe ase Omobui?
Nabe okorangeria Nyasae ase chingaki chionsi?
Ⅺ Nimborokererie igoro y’okobua kwa Nyasae;
amang’ana onsi igoro y’Omonguru tinkoyabisa.
Ⅻ Rora, inwe mwensi mweroreire ayio;
bono, nase ki rende mogokwana amang’ana abosa?
ⅩⅢ Ekio nakio egetari Nyasae akoa omokori amabe,
na omwando Omobui akoa abwo bagochanda abanto.
ⅩⅣ Abana b’omokori amabe nabaisa komentekana,
nigo bareo ase ogocha goitwa n’omoro,
abanto b’ororeria rwaye tibakonyora endagera eisaine.
ⅩⅤ Abatigari baye nigo oborwaire borabaite,
na abakungu baratigwe bare ababoraka, tibakonyara kobareera.
ⅩⅥ Omonto oyio naisa gosangereria chifeta chinyinge buna orotu
naende atumbe chianga chibe chinyinge mono;
ⅩⅦ nonya ochitumbire igo, nomonto omooronge orachibeeke,
na abatari na komocha baatanane chifeta chiaye.
ⅩⅧ Enyomba omonto oyio araagache nigo erabe buna ey’oronyambobe,
na buna ekegutu omorendi akoagacha.
ⅩⅨ Omonto oyio nigo akogenda korara ore omonda,
korende takoba bo rinde;
ekero akoramokia amaiso kabokire anyore obotenenku bwaye bwasirire.
ⅩⅩ Obwoba obonene bonga buna eooro nigo bokomocheera;
erio ekembugu‐mbugu kiamocheera botuko kiamoira.
ⅩⅪ Omwaga okorwa moocha nigo okomoirurukia;
omorusia aase aye, omosiria kegima.
ⅩⅫ Nyasae nigo akomoruta emegwe atari namaabera,
nere otama bokong’u korua ase okoboko kwaye.
ⅩⅩⅢ Abanto nigo bagoaka chinkobi igoro yaye,
bamoseria neriogi ri’okomwogerera, orua aase aye.