ⅩⅩⅩⅨ
Ⅰ “Inee! Nomanyete chingaki ekero chimbori chi’orosana chikobiara?
Gose ekero chinsune chikobiara?
Ⅱ Nonyare komanya omobaro bw’emetienyi chigokoora,
naende nomanyete chingaki chikobiara?
Ⅲ Nigo chigwekumba chiabiara chimanwa chiabo,
na ekero chiabiarire, obororo bw’okobina bwasira.
Ⅳ Chimanwa chiabo nigo chikoba ne chinguru chiakinera ase orosana.
Nigo chikogenda kegima, tichiri koirana.
Ⅴ “Ning’o otigire etigere y’orosana esiboire?
Gose ning’o bwororobirie ebisibo bi’etigere ere enyango?
Ⅵ Inche nayeeire ekerubo ekiomo kebe enka yaye,
na ense ere nomonyo, emenyeo.
Ⅶ Ero nigo egochaaya eriogi rire ase omochie,
teri koigwa okwoga kw’omotemi onde bwensi.
Ⅷ Nigo ekona‐kogenda aaria na aaria ase ebitunwa ekorisia,
yaba ekorigia kera ekemeri ekebese.
Ⅸ “Inee! Eng’era nayanche egokorere emeremo?
Nenyare korara ase obweri bwao botuko?
Ⅹ Inee! Nonyare koyesiba ne chingori eete ase emeng’ororia ye chintinde?
Gose ebutorane chintinde ase rikura riao?
Ⅺ Inee! Noyesemerie ekiagera ere ne chinguru chinyinge?
Nonyare gotiga emeremo yao, ng’a ero ekoyekorere?
Ⅻ Inee! Nigo oyiegenete ng’a neirane
na ekorentere endagera ase ekeoreri kiao?
ⅩⅢ “Esagero nigo egosamunsa chimbaaba chiaye chioga;
korende, Inee, chimbaaba echio nchibwate obwanchani?
ⅩⅣ Esagero eaberi nigo egotiga amagena aye ase amaroba ime
anyora riberera korwao.
ⅩⅤ Ero nigo ekoyeba, tekomanya ng’a naatwe namagoro,
naende ng’a gose eng’iti y’orosana neyatache.
ⅩⅥ Nigo ere entindi mono ase ebichuchu biaye,
yabikorera biaba buna mbitari ebiaye;
teri gwechandera oroiboro rwaye,
ⅩⅦ ekiagera Nyasae nigo ayerinete obong’aini,
gose tayeete okomanya.
ⅩⅧ Ekero ekoimokerera igoro, egwesamunsa eminyoke,
nigo egosekerera ebarasi na oyo oyerinete.
ⅩⅨ “Inee! Naye okoa ebarasi chinguru?
Naye oboetie ebigoti biaye namanya?
ⅩⅩ Naye oyeete chinguru egocharokera buna engige?
Eriogi egochuria nigo rire ri’okoirokia.
ⅩⅪ Nigo egokura‐kura riroba ase ense omweya, yagokera chinguru chiaye.
Erio yaminyoka koumerana nabare nebirwanero bi’esegi.
ⅩⅫ Ero nigo egosekerera obwoba, teri koondokigwa na kende;
gose teri koonchoka etame korwa ase emioro.
ⅩⅩⅢ Chinsara nigo chikorutwa chiaba chikwoga goeta igoro yaye,
na amatimo akomesa, ne chisimisi boigo.
ⅩⅩⅣ Nigo egotitiria riroba ere nobotindi na ekeririanda,
gose teri gotegerera ekire, ekero egetureri gekobugigwa.
ⅩⅩⅤ Ekero egetureeri gekobugigwa, nigo ekwana eriogi riaye ri’okoega‐ega.
Nigo ekoigwa omonyonko bw’esegi korwa aare,
na buna abachiki b’esegi bagochika, na okwoga gw’esegi.
ⅩⅩⅥ “Inee! Nobong’aini bwao bokogera ekebaki kiairuruka igoro,
naende kiarambora chimbaaba chiaye koiruruka gochia Irianyi?
ⅩⅩⅦ Inee! Naye ogochika ekeongo kiairuruka gochia igoro,
kiaagacha egeswa kiaye aase a igoro mono?
ⅩⅩⅧ Ekeongo nigo gekomenya ase egetare;
ase omwenya bw’egetare, aase gekonyora oborendi obuya.
ⅩⅩⅨ Korwa aaria igoro nigo kegotengera ebi kegotwara,
amaiso aye nigo akobirora korwa aare.
ⅩⅩⅩ Amage aye nigo akonywa amanyinga,
na aase emebere ekwete ere, nao ekeongo kere.”