ⅩⅬ
Ⅰ Naende Omonene akagenderera gokwana, agateebia Ayubu,
Ⅱ “Inee! Omonto okona‐korigia amamocho naamereranie n’Omonguru?
Aye okona‐koamererania na Nyasae, iraneria rende.”
Ayubu
Ⅲ Erio Ayubu akairaneri’Omonene, agateeba:
Ⅳ “Naama! Inche ting’isaini kende,
ngento ki ndanyare gokoiraneria?
Natubire omonwa one nokoboko kwane.
Ⅴ Inche nakwanire rimo, tinkomenta gento;
ee, nakwanire kabere, korende tinkogenderera goetania ayio.”
Omonene
Ⅵ Erio korwa ase ekembugu‐mbugu ime Omonene akairaneria Ayubu, akamoteebia:
Ⅶ “Tenena okong’e buna omosacha,
inche ngokoboria nde, naye ong’iranerie.
Ⅷ Inee! Nonyare kombara ng’a nomomochi inde?
Norigetie kongambia inche, erinde obarerwe oboronge?
Ⅸ Aye nobwate okoboko buna okwane inche Nyasae?
Nonyare kogukura neriogi riao buna inche nkogukura?
Ⅹ Aye echabere nobonene na obwari,
eboyie ogosikwa na okobua.
Ⅺ Siara ekeririanda gi’okogechigwa kwao,
erio origererie kera omonto ore omoenenu, omokeyie.
Ⅻ Ee, rigereria oyio ore omoenenu, omokeyie,
na abakori amabe obatindachere inse agwo ase bateneine.
ⅩⅢ Abwo bonsi babise ime ase amaroba;
obwateranie bokong’u amasio abo ime y’ense inse.
ⅩⅣ Igo inche ninyancherane naye,
ng’a okoboko kwao gw’okorio ngokoe okobua.
ⅩⅤ “Rigereria engubo! Eyio natongete buna nagotongete aye.
Nigo ekorisia obonyansi buna eng’ombe.
ⅩⅥ Rora, chinguru chiaye nigo chire ase ekeneema kiaye,
na okobua kwaye nigo kore ase chinyama chi’enda yaye.
ⅩⅦ Ekemincha kiaye nigo kere egekong’u pa buna omocharake,
na emekia y’amariagati aye nigo esisekaine amo.
ⅩⅧ Amauga aye nigo are amakong’u buna emebirangwa eroisirie korwa ase etai;
ee, amauga ’omobere oye nigo anga buna emeriibo y’ebioma.
ⅩⅨ “Ero negetongwa ki’ogokumia inche Nyasae natongete;
inche nayetongete, nayeete amaino anga buna emioro.
ⅩⅩ Endagera ekoria nigo ekwama ase ebitunwa igoro,
agwo ase ching’iti chi’orosana chikogosoreria.
ⅩⅪ Nigo ekorara ase ekiriri ki’omote okorokwa lotusi,
yebisa na gokenderera ime ase ebitonto bire ase etente.
ⅩⅫ Omote oyio noro ore ekiriri kiaye;
ee, emete enga buna emesobeti nigo eyeetanaine.
ⅩⅩⅢ Rora, nonya orooche rore nemerindo, ero teri kwoboa;
nonya orooche rwa Yorodani rokominyoka gocha ase omonwa oye,
nigo ere noboremu.
ⅩⅩⅣ Inee! Omonto nanyare koyebwata ekero ere ase riraro riaye?
Gose nabochore chimioro chiaye ayesibe nengori?”