ⅩⅬⅠ
Ⅰ Inee! Aye nonyare kong’usa Leviatani, eng’iti enene y’okwoboyia, korwa rooche nendobio.
Gose nonyare gosiba oromeme rwaye nengori?
Ⅱ Nonyare gosoyia engori ime ase chimioro chiaye,
gose kobochora orosea rwaye nendobio?
Ⅲ Inee! Nenyare gokoboria amang’ana amange ase oboitongo?
Gose nenyare gokwana naye amang’ana amororo?
Ⅳ Ero nekore okobwatana amo naye,
ng’a ebe omosomba oo kogenderera botambe?
Ⅴ Inee! Nokore egosori nero buna orakore nenyoni?
Gose oyebeke ekorere abasomba bao abaiseke egosori?
Ⅵ Inee! Abaoonia mbakorerane rigori igoro yaye,
gose bayebutorane ase okoyeonerania?
Ⅶ Nonyare kobochora riiyo riaye ne ritimo rikobeta chinswe?
Gose ritimo erio ndibete omotwe oye riyobochore?
Ⅷ Rambora okoboko kwao oyebwate,
erio oteeme gokora esegi nero.
Tokoiranera eria kabere.
Ⅸ “Ekero omonto agoteema igo, nigo ogosemeria kwaye kogosira kegima;
nonya nase okoyerora rioka, omonto nigo akwerusia moyo.
Ⅹ Onde tari ore omotindi oraremererie ayechegie.
Ning’o rende oranyare gotenena ase obosio bwane?
Ⅺ Ning’o ong’eire egento ritang’ani ng’a nainche imogeakane?
Gento kende gionsi kere inse y’erioba nekiane.
Ⅻ “Inche tingotiga ting’orokia buna ebiimo biaye bire,
naende buna okobua ne chinguru chiaye bire,
na buna amauga ’omobere oye aagachegete buya.
ⅩⅢ Ning’o oranyare koyiaboria risankwa riaye?
Ning’o oranyare gosoyia okoboko kwaye gati‐gati y’amaino aye?
ⅩⅣ Ning’o oraasamie omonwa oye?
Amaino aye nigo are ay’okwoboyia mono.
ⅩⅤ Obonene bwaye namagonko aye anga buna chinguba, achokaine chindwaro;
nigo abwataine amo, buna ayanantirie.
ⅩⅥ Rigonko erimo nigo risoaine nerinde ang’e kegima,
nonya nembeo tekonyara gosoera gati yabo.
ⅩⅦ Nigo erinde ribwatanirie nerinde;
naro nigo asoaine, takonyara gwatananwa.
ⅩⅧ Ekero egwasimora, chinsase nigo chigosoka chiamoreka,
amaiso aye nigo anga buna amasase agosakia mambia.
ⅩⅨ Chinsase chi’omorero nigo chikorwa ase omonwa oye;
ee, chinsase nigo chigotaroka korwa asere.
ⅩⅩ Erioki nigo rigosoka korwa ase chimioro chiaye,
buna enyongo ekobera egosokia omwoki bw’amaache.
ⅩⅪ Omoika bw’omonwa oye nigo ogosoka buna ekebemberi ki’omorero,
na omorero nigo ogosoka korwa ase omonwa oye,
ⅩⅫ Rigoti riaye nigo ribwate chinguru,
na okoondokia nigo kore bosio bwaye.
ⅩⅩⅢ Emenia y’omobere oye nigo ekinyaine amo;
nigo yesibete bokong’u ase omobere oye, tekonyarwa kobwatokanigwa.
ⅩⅩⅣ Enkoro yaye nenkong’u buna
rigena, ee, nenkong’u buna orogena rogosia.
ⅩⅩⅤ Ekero ekoimoka gotenena, abanto chituoni nigo bakwoboa mono;
ekero ekorindoka gocha nigo bagotang’ang’a.
ⅩⅩⅥ Nerutwa omoro oyegwere, tori koyekorera kende,
nonya ne ritimo, gose ensara, gose esimisi.
ⅩⅩⅦ Ekioma nigo kenga risakwe asere,
na etai nigo enga omote ogundire.
ⅩⅩⅧ Ensara tekoyioboyia etame;
amagena ’enduruche akorutwa nigo anga buna amasakwe.
ⅩⅩⅨ Chinungu nigo chinga buna amasakwe asere;
ekero amatimo akwoga gocha nigo egoseka.
ⅩⅩⅩ Ase enda yaye nigo ebwate ebigionkorio ebioge;
nigo egotiga ebimanyerererio buna ebi’egari y’okoorera egokurura ase etintira.
ⅩⅩⅪ Nigo egoserokia amaache korwa ase chindiba inse,
nigo egokora amaache ’enyancha aba buna amaguta aburukanirie.
ⅩⅩⅫ Enchera yaeteire nigo ekogenderera komesa,
enyancha inse nigo egokagwa ng’a nechimbuche.
ⅩⅩⅩⅢ Getongwa kende tikeri igoro ase ense kenga ero,
ekio giatongetwe getari kwoboa.
ⅩⅩⅩⅣ Nigo ekorigereria kera egento kere igoro mono etari gokioboa,
nigo ere omorwoti bw’ebitongwa bionsi bire noboenenu.”