ⅩⅬⅡ
Ⅰ Erio Ayubu akairaneri’Omonene, akabora.
Abuyu
Ⅱ “Nimanyete ng’a aye nonyare gokora ebinto bionsi,
naende ng’a aya kwaganirie gokora takonyara gotangwa taba.
Ⅲ Ninche ng’o mbwate ogosemia gotari nobong’aini?
Ase ayio nakwanire aya ntamanyeti,
amang’ana ’ogokumia ansinyire komanya.
Ⅳ Koranche, ontegerere nkwane,
nkoborie, naye onteebie buna are.
Ⅴ Nabeire nkoigwa igoro yao ase okoigwa namato rioka,
korende bono amaiso aane akororire.
Ⅵ Ase ayio nechayire inche omonyene,
naende neakire orotu ne ribu ase ogweitia na goonchoka.”
Omoerio
Ⅶ Omonene gakwanire amang’ana ayio n’Ayubu, agakwana n’Elifasi Omotemani, akamoteebia, “Nabeire nendamwamu asore na ase abasani bao baria babere, ekiagera inwe timokwaneti ayare ay’oboronge igoro yane buna Ayubu, omosomba one, akwanete.
Ⅷ Ase igo bono ira ase Ayubu, omosomba one, chieri isano na ibere, ne chimingichi isano na ibere; mochirue chibe ekeng’wanso ki’ogosambwa ase engencho yaino inwe abanyene. Ayubu, omosomba one, nabasabere, ekiagera inche nigo ndanchere ogosaba kwaye ase engencho yaino, timbaisa kobakorera buna oboriri bwaino bore. Inwe timokwaneti igoro yane amang’ana are ay’oboronge buna Ayubu, omosomba one, akwanete.”
Ⅸ Ase igo Elifasi Omotemani, na Bilidadi Omosua, na Sofari Omonama, bakagenda bagakora buna Omonene abachigete, n’Omonene aganchera ogosaba kw’Ayubu.
Ⅹ Erio magega Ayubu gasabeire abasani baria baye, Omonene akairaneria Ayubu amaya aye, akamoa ebinto ara kabere kobua ebi abwate ritang’ani.
Ⅺ Erio abamura bamwabo Ayubu, na abasubati bamwabo, na abasani baye bonsi abamomanyete agwo ritang’ani, bagacha asare, bakaragera amo nere nyomba mwaye. Bakamororera amabebe na komoremia ase engencho y’amabe aria onsi Omonene amorenterete, na kera oyomo akamoa chitaabu na ebonyi eroisirie korwa ase etaabu.
Ⅻ Omonene agasesenia amatuko a magega ay’Ayubu kobua aye ritang’ani. Boigo Ayubu akanyora ching’ondi chilifu ikomi na inye, ne chingamia chilifu isano nemo, ne chiombe chilifu ibere, ne chitigere chiaberi elifu eyemo.
ⅩⅢ Boigo akaegwa abamura batano na babere, na abaiseke batato.
ⅩⅣ Akaroka omoiseke omotang’ani Yemima, na oyo o kabere Kesia, na oyo o gatato Kereni‐Hapuki.
ⅩⅤ Ase ense eyio yonsi bakungu bande tibarengeo baare abanyabieni buna abaiseke b’Ayubu, na ise akabaa omwando amo nabamura bamwabo.
ⅩⅥ Na magega y’ayio Ayubu akagenderera koba moyo ase engaki y’emiaka rigana erimo, na emerongo ene, akarora abana baye, na abachokoro, na abachokororia, goika ekiaare gia kane.
ⅩⅦ Na Ayubu agakwa kabeire omogotu mono.