ZABURI
Ogochaakera
Egetabu gia Zaburi nigo kere egetabu egetambe goetania ebitabu bionsi bia Biblia. Egetabu eke nigo kere eki’engencho enene ekiagera nonya gekageire koba egetabu ekemo nigo kere riboa ri’amatera y’echingencho n’echingaki ao ao. Amatera aya na yogotogia Nyasae; ayande n’ogosaba Nyasae amaabera, komoakera Nyasae ng’a mbuya na komosaba ae ababisa egesusuro. Amatera ande na’yokworokereria obosera bw’obogima nayande amange.
Amange y’amatera aya nigo are igoro y’okogania kw’omonto beene, n’ayande nigo agokwanera igoro y’egesaku ekegima, okogania, emechando, na ogosemeria kw’abaanto bonsi ba Nyasae.
Amatera aya nigo agotworokia buna Mwanyabaanto aranyare gokwana na Nyasae. Ase amatera nigo tokonyora amang’ana ayio agochanda omonto, boigo naria akomworokereria. Nakio gekogera Abaisraeli ase omogano obo omotambe babegete chinguru mono amang’ana y’amatera, nigo bare koyaira buna chisara na gochitera. Boigo nonya Yeso n’aborokigwa baye nigo bare goteera amatera aya. Boigo korwa omochakano bw’ekanisa Aamatera abeire egetabu kiabeene ase chisara ase ekanisa yonsi y’Abakristo.
Okobagwa kw’egetabu eke:
Amatera ayio rigana erimo na emerongo etano nigo aatananetwe ase ebitabu bitano buna iga:
Amatera 1—41
Amatera 42—72
Amatera 73—89
Amatera 90—106
Amatera 107—150
EGETABU KI’E RITANG’ANI
Ⅰ
(1—41)
Omogoko bw’ekeene
Ⅰ Nasesenirie omonto otari gotunyana chingencho chi’abakori amabe,
n’otari kobwatia chinchera chi’abanyabibe,
gose otari gosanga amo nabwo bagochecheria.
Ⅱ Korende richiko ri’Omonene nigo rikomogokia mono,
na okorengereria kwaye gwonsi nigo kore ase richiko erio, omobaso na obotuko.
Ⅲ Ere nigo anga buna omote osimekire rooche mbarabare,
oyokwama amatunda amaya ekero engaki yaye egoika,
na amato aye tari kwoma ngaki ende yonsi,
na rinde rionsi agokora nigo agosesenigwa.
Ⅳ Abakori amabe tibari bo,
korende nigo banga buna omoiriro okoirurukigwa nomwaga.
Ⅴ Ase ayio, abakori amabe tibagocha gwekengera ase rituko ri’ekiina,
gose abanyabibe tibagosangererekana amo n’abanyene oboronge.
Ⅵ Omonene nigo akoraa enchera y’abanyene oboronge,
korende enchera y’abakori amabe nesire.