Ⅹ
Omoreng’anio bw’eero ye ching’ondi
Ⅰ “Ekeene, ekeene, nabateebirie: Oyotasoereti egesieri ki’eero ye ching’ondi, korende aetere aao, oyio nomoibi naende nomokurumi.
Ⅱ Korende oyogosoera gesieri oyio nomorisia bwe ching’ondi.
Ⅲ Omorendi bw’egesieri nigo akomoigorera, ne ching’ondi nigo chikoigwa eriogi riaye; ere nigo akorangeria ching’ondi chiaye ase amarieta abo na gochiira isiko.
Ⅳ Gakorusia isiko ching’ondi echire echiaye, nigo agochitang’ana, ne ching’ondi nigo chikomotunyana, ekiagera nchimanyete eriogi riaye.
Ⅴ Omonto omoao tichikomotunyana nonya ng’ake, korende nigo chiramotame, ekiagera tichimanyeti eriogi ri’abaanto abaao.”
Ⅵ Omoreng’anio oyo Yeso akabateebia, korende barabwo tibamanyete amang’ana ayio abateebeetie.
Omorisia omuya
Ⅶ Erio Yeso akabateebia naende, “Ekeene, ekeene, nabateebirie: Ninche inde egesieri gie ching’ondi.
Ⅷ Bonsi abantang’anerete nabaibi na abakurumi, korende ching’ondi tichiabaigwete.
Ⅸ Ninche inde egesieri; omonto karasoe goetera ase ’nde, natooreke, nasoe na gosoka, na konyora oborisia.
Ⅹ Omoibi tagocha, otatiga aibe, na konyenya, na gosaria; inche nigo nachete erio babe nobogima, naende babe naborobwo ase obonge.
Ⅺ Inche ninche Omorisia omuya; omorisia omuya nigo akorua obogima bwaye ase engencho ye ching’ondi.
Ⅻ Omonto orikire, tari ere omorisia, gose ching’ondi tichiri echiaye; gakorora esese y’orosana egocha, nigo agotiga ching’ondi, otama, na esese y’orosana yachisakora, na gochiserebania.
ⅩⅢ Ere nigo agotama ekiagera nomorikwa, gose tarengerereti amang’ana e ching’ondi.
ⅩⅣ Inche ninche omorisia omuya, na echire echiane ninchimanyete,
ⅩⅤ buna Tata amanyete inche, na inche nimomanyete Tata, na obogima bwane naborure ase engencho ye ching’ondi.
ⅩⅥ Naende ching’ondi chinde mbwate, chitari chie riicho eri, na chirochio nabo engwenerete gochirenta, na eriogi riane nachiriigwe. Igo nachibe riicho erimo na omorisia oyomo.
ⅩⅦ Ase ayio Tata nanyanchete, ekiagera narure obogima bwane, erinde inyare koboirania naende.
ⅩⅧ Tari omonto okobonduera, korende ninche omonyene naborure. Ninde nokobua koborua; naende ninde nokobua koboirania. Ogochika oko nigo nakonyorire ase Tata one.”
ⅩⅨ Erio gokaba naende ogwatananekana ase Abayahudi ase engencho y’amang’ana aya.
ⅩⅩ Abange babo bakaboora, “Nigo abwatire nekerecha, naende nigo are ebarimo; nase ki mokomotegerera?”
ⅩⅪ Abande bakaboora “Amang’ana aya tari ay’omonto obwatire nekerecha. Inee! Ekerecha nkenyare koramokia ’emeuko amaiso?”
Yeso ore ase Rituko Rinene ri’okoinyora okoigorwa na ogosaberwa gwe Hekalu ya Yerusalemu
ⅩⅫ Ndiarenge Rituko Rinene ri’okoinyora okoigorwa na ogosaberwa gwe Hekalu aria Yerusalemu.
ⅩⅩⅢ Nigo kiarenge ekero ki’obokendu, na Yeso nigo arenge gotaara ase Hekalu ime, ase egoora ya Sulemani.
ⅩⅩⅣ Erio Abayahudi bakamoetanana, bakamobooria, “Ngoika ririri oratoichanie emioyo yaito? Onye naye Kristo, toteebia maiso marore.”
ⅩⅩⅤ Yeso akabairaneria, “Nabatebirie, na inwe timori kwegena; emeremo eye ngokora ase erieta ria Tata one, nero ekombera kirori.
ⅩⅩⅥ Korende inwe timori kwegena, ekiagera timori abamo ase ching’ondi chiane.
ⅩⅩⅦ Ching’ondi chiane nigo chikoigwa eriogi riane, na inche ninchimanyete, na chirochio nigo chigontunyana;
ⅩⅩⅧ inche nachieire obogima bwa kare na kare, na chirochio tichigosira nonya ng’ake, nonya nomonto tagochitaboria korwa ase okoboko kwane.
ⅩⅩⅨ Tata one oching’eire nomonene kobua bonsi, na onde takonyara gochitaboria korwa ase okoboko gwa Tata.
ⅩⅩⅩ Inche na Tata nigo tore oyomo.”
Obobisa bw’Abayahudi
ⅩⅩⅪ Erio Abayahudi bakaimokia amagena naende, erinde bamoake.
ⅩⅩⅫ Yeso akabairaneria, “Naborokirie emeremo emiya emenge erwete ase Tata; nereri ase emeremo eyio mokong’akera amagena?”
ⅩⅩⅩⅢ Abayahudi bakamoiraneria, “Titogokoaka amagena ase emeremo emiya, korende nase okorama, ekiagera aye nomonto ogwekora omonyene ng’a naye Nyasae.”
ⅩⅩⅩⅣ Yeso akabairaneria, “Tarikiri ase amachiiko aino ng’a: Inche nateebete ng’a inwe nigo more chinyasae?
ⅩⅩⅩⅤ Onye orogete baria chinyasae, abacheretwe ne ring’ana ria Nyasae (na amariiko takonyara gosareka),
ⅩⅩⅩⅥ inee, nigo mogoteeba igoro yaye, ere oyo Tata aatananete akamotoma ase ense: Nkorama are, ekiagera nateba: Inche n’Omwana o Nyasae?
ⅩⅩⅩⅦ Onye tindi gokora emeremo ya Tata one, timonyegena.
ⅩⅩⅩⅧ Korende konda yekore, nonya timonyegeneti inche, egene emeremo eria, monyare komanya na kwegena ng’a Tata nigo are ime yane, na inche ime ase Tata.”
ⅩⅩⅩⅨ Bakarigia eria kabere komobwata, korende akarua ase amaboko abo.
ⅩⅬ Akagenda naende ng’umbu ya Yorodani goika aase aria Yohana arenge kobatisera ritang’ani, akabeera aroro.
ⅩⅬⅠ Abanto abange bakamochiera, bakaboora, “Yohana takorete egekone kende gionsi, korende onsi aya Yohana ateebete igoro y’omonto oyo nigo are ay’ekeene.”
ⅩⅬⅡ Abange bakamwegena aroro.