Ⅺ
Ogokwa kwa Lazaro
Ⅰ Nabo omonto gete narenge omorwaire, erieta riaye Lazaro o Bethania, omonto bw’omochie o Mariamu na Martha mosubati omwabo.
Ⅱ Mariamu nere oyo oagete Omonene amaguta na komotinyia amagoro aye netukia yaye. Bono Lazaro momura omwabo nigo arenge omorwaire.
Ⅲ Nabo baria basubati bamwabo bagatoma amang’ana asare, bakaboora, “Omonene, ere oyobwanchete orwarire.”
Ⅳ Yeso agachia koyaigwa, akabora, “Oborwaire obwo tari obw’amakweri, korende ase okoorokia obonene bwa Nyasae, erinde Omwana o Nyasae abakwe ase obwo.”
Ⅴ Na Yeso nigo anchete Martha, na mosubati omwabo, na Lazaro.
Ⅵ Ekero achia koigwa ng’a nomorwaire, agateebana amatuko abere aria aase arenge.
Ⅶ Erio magega ase aya agateebia aborokigwa baye, “Togende Boyahudi naende.”
Ⅷ Aborokigwa bakamoteebia, “Rabii, moisonde Abayahudi nigo barenge gokorigia gokoaka amagena, na aye gokogenda aroro naende?”
Ⅸ Yeso akairaneria, “Chinsa chi’omobaso tichiri ikomi na ibere? Omonto karagende mobaso takogochwa, ekiagera aroche omobaso bw’ense eye.
Ⅹ Korende omonto karagende botuko, igo akogochwa, ekiagera omobaso tori ime yaye.”
Ⅺ Agakwana aya; erio magega ase aya akabateebia, “Lazaro omosani oito orarire, korende nkogenda nde inyare komotura.”
Ⅻ Aborokigwa baye bakamoteebia, “Omonene, onye orarire, nagwene.”
ⅩⅢ Korende Yeso nigo akwanete amang’ana ’amakweri aye; na barabwo bagakaga ng’a nigo agokwana amang’ana y’okorara chitoro.
ⅩⅣ Erio agwo Yeso akabateebia maiso marore, “Lazaro okuure.
ⅩⅤ Na inche nagokire ase engencho yaino, ekiagera ntarenge aroro, erinde monyare kwegena. Korende bono togende asare.”
ⅩⅥ Nabo Thomas, ore korokwa Barongo, agateebia aborokigwa bamwabo, “Togende naintwe, tokwe amo nere.”
ⅩⅦ Erio Yeso agachia goika aroro akanyora Lazaro ng’a oikire koba ase embeera amatuko ane.
ⅩⅧ Bethania nigo orenge ang’e na Yerusalemu, koreng’ana chimaeli ibere.
ⅩⅨ Na abanto abange ase Abayahudi bagacha ase Martha na Mariamu, erinde baabaremie ase engencho y’ogokwa kw’oyomwabo.
ⅩⅩ Nabo Martha agachia koigwa ng’a Yeso ngocha are, akagenda komoorotota, korende Mariamu nigo aikaransete nyomba ime.
ⅩⅪ Erio Martha agateebia Yeso, “Omonene, onye naa kwarenge, momura ominto anga takwete.
ⅩⅫ Korende nonya mbono namanyire ng’a kende gionsi orasabe Nyasae, Nyasae nakoe.”
ⅩⅩⅢ Yeso akamoteebia, “Momura omino naboke.”
ⅩⅩⅣ Martha akamoteebia, “Namanyire ng’a nache kobokigwa ase okobokigwa rituko ri’omoerio.”
ⅩⅩⅤ Yeso akamoteebia, “Inche ninche okobokigwa na obogima; oyonyegenire inche, naisa gokwa, nabe moyo.
ⅩⅩⅥ Na onde bwensi ore moyo na onyegenire, tagokwa nonya ng’ake. Inee! Kwegenire aya?”
ⅩⅩⅦ Akamoteebia, “Ee, Omonene; inche negenire ng’a aye naye Kristo, Omwana o Nyasae, oria ogocha ase ense.”
Okobokigwa kwa Lazaro
ⅩⅩⅧ Naende gakwanire aya, akagenda, akarangeria Mariamu mosubati omwabo, agakwana ng’ora igo, “Omworokia ochire, ngokorangeria are.”
ⅩⅩⅨ Mariamu agachia koigwa, akaimoka bwango, akamochiera.
ⅩⅩⅩ Na Yeso konya taraika omochie ime, korende nigo arenge aase aria arototeretwe na Martha.
ⅩⅩⅪ Erio Abayahudi baria barenge amo nere nyomba ime bakomoremia, bagachia korora Mariamu buna aimoka bwango na gosoka, bakamotunyana, bakagete ng’a nigo akogenda embeera erinde arere aroro.
ⅩⅩⅫ Erio Mariamu agachia goika aase aria Yeso arenge, akamorora, akagwa ase amagoro aye, akamoteebia, “Omonene, onye naa kwarenge, momura ominto anga takwete.”
ⅩⅩⅩⅢ Erio Yeso agachia komoorora okorera, na Abayahudi baria bachete amo nere bakorera; agasogwa nobororo ase omoyo oye, agaichana.
ⅩⅩⅩⅣ Akababoria, “Ng’ai mwamobeka?” Bakamoteebia, “Omonene, inchwo orore!”
ⅩⅩⅩⅤ Yeso akaiyeria amariga.
ⅩⅩⅩⅥ Erio Abayahudi bakaboora, “Rora buna amwanchete.”
ⅩⅩⅩⅦ Korende abande bakaboora, “Inee! Oyo oramogetie amaiso ’omouko oria, tare konyara kogwenia oyo takwa?”
ⅩⅩⅩⅧ Nabo Yeso oichanete naende ase omoyo oye, agaika ase embeera. Ero nigo yarenge rikuruma, naende rigena ndiabegetwe igoro yaye.
ⅩⅩⅩⅨ Yeso akabora, “Tigeria rigena.”
Martha, mosubati omwabo bw’oria okwete, akamoteebia, “Omonene, otiokire bono, ekiagera obeire egetondo ase amatuko ane.”
ⅩⅬ Yeso akamoteebia, “Tinagoteebia ng’a koregene norore obonene bwa Nyasae?”
ⅩⅬⅠ Nabo bakarusia rigena riria. Yeso akaimokia amaiso aye igoro, akabora, “Tata, nakoiraneria ng’a mbuya mono, ekiagera okonyigwa.
ⅩⅬⅡ Na inche nimanyete ng’a nigo okonyigwa amatuko onsi; korende ase engencho y’omoganda oyo ong’etanaine konya nakwanire aya, banyare gwancha ng’a naye gwantomete.”
ⅩⅬⅢ Ekero akwanire igo, agaaka eriogi rinene, “Lazaro, soka isiko!”
ⅩⅬⅣ Oria okwete agasoka, oboyirie egetambaa amagoro na amaboko; obosio bwaye boboyirie egetambaa. Yeso akabateebia, “Mosansore, momotige agende.”
Abakuani abanene bakomoboera Yeso bamoite
(Mat 26:1-5; Mar 14:1-2; Luk 22:1-2)
ⅩⅬⅤ Nabo abange ase Abayahudi abachete amo na Mariamu na korora aya Yeso akorete, bakamwegena.
ⅩⅬⅥ Korende abande babo bakagenda ase Abafarisai, bakabateebia aya Yeso akorete.
ⅩⅬⅦ Abakuani abanene na Abafarisai bagasangererekana ase ekegambero, bakaboora, “Ninki togokora? Ekiagera omonto oyo nigo agokora ebikone ebinge.
ⅩⅬⅧ Toise komotiga iga, abanto bonsi mbamwegene; na Abarumi mbache, batoure Aase aito Aachenu na egesaku giaito.”
ⅩⅬⅨ Omonto oyomo ase bare, Kayafa, oyorenge Omokuani omonene ase omwaka oria, akabateebia, “Inwe timomanyeti kende gionsi.
Ⅼ Gose timorengerereti ng’a mbuya omonto oyomo akwe ase engencho y’abanto, erinde egesaku ekegima tigesira.”
ⅬⅠ Naende eri takwanete ase omoyo oye omonyene, korende ekiagera arenge Omokuani omonene ase omwaka oria, akabana ng’a Yeso nakwe ase engencho y’egesaku keria;
ⅬⅡ gose tari ase engencho y’egesaku keria gioka, korende amo naya asangererie abana ba Nyasae baria baatananekire, babe abamo.
ⅬⅢ Nabo korwa rituko riria bakarengereria buna baranyare komoita.
ⅬⅣ Yeso tataarete naende maiso marore ase egati y’Abayahudi, korende akarua aria akagenda aase ang’e nerooro, goika omochie okorokwa Efraimu; akamenya aroro amo naborokigwa baye.
ⅬⅤ Naende Epasaka y’Abayahudi nigo yarenge ang’e; abange bagatiira korwa chinka chiabo kogenda Yerusalemu gotang’anera Epasaka, erinde besibie.
ⅬⅥ Nabo bakarigia Yeso, bagateebania barabwo ase barabwo, bagotenena ase Hekalu, “Naki morooche? Tagocha‐gocha ase rituko rinene nonya ng’ake?”
ⅬⅦ Bono abakuani abanene na Abafarisai bakarua ogochika ng’a onye monto onde omanyete aase are, arente amang’ana, banyare komobwata.